سەرەکی » ئاراستە » كادری شەهید چەتۆی موهەندیس

كادری شەهید چەتۆی موهەندیس

حه‌یده‌ر مه‌نتك

رێكخستنە پۆڵاینەكانی كۆمەڵەی رەنجدەرانی كوردستان بۆ ئەوێ‌ رۆژێ‌ سەدان لاوی خوێنگەرم و رۆشنبیرو خاوەن بڕواننامەی بەرزی كۆكردبۆوە و لە ئامێزی گرتبوون، ڕایەڵەی رێكخستنەكانی یەكێتی لە زانكۆكانی بەغداو موسڵ و سلێمانی و سەڵاحەدین وەك فێرگەیەكی پێگەیاندی لێهاتبوو، دەیان سەركردە و كادیری سیاسی بۆ یەكێتی بەرهەمهێنا كە پاش تەواوكردنی خوێندن پەیوەنیان بەشاخەوە دەكرد، یەكێك لەوانە شەهید چەتۆی موهەندیس بوو كە لەگەڵ هەریەك لە هاوڕێكانی (دەشتی موهەندیس، ئەكرەمی موهەندیس) لە ناوەڕاستی ساڵی 1982 و پاش تەواوكردنی خوێندنی زانكۆیان، رویانكردە شاخ.
شەهید چەتۆی موهەندیس پێشمەرگەیەكی بە دیسپلین و گوێڕایەڵ و خاكی بوو، ئاستی رۆشنبیری و هۆشیاری بەرزبوو هەربۆیە لە ماوەیەكی كەمی تەمەنی پێشمەرگایەتییدا كرایە رابەری سیاسی تیپی 85ی بەڕانەتی. ئەوماوەی پێشمەرگەبوو تا رۆژی شەهیدبوونی دڵسۆزانە تێكۆشا و خەباتی كرد بۆ نەمانی زوڵم و ستەمی بەعسییەكان لە سەرمیللەتی كورد.
ژیاننامەكەی
شەهید چەتۆی موهەندیس كە ناوی تەواوی عەبدولستار سەلیم كەریم مەحمودە، لە دایكبووی ساڵی 1960ی گوندی (قزلەر)ی ناحیەی قوشتەپەی هەولێرە.
دەرچووی بەشی شارستانیی كۆلیژی ئەندازیاری زانكۆی سەڵاحەدین 1981-1982ە.
ساڵی 1979 پەیوەندیكردووە بە رێكخستنەكانی كۆمەڵەی رەنجدەرانی كوردستانەوە، رۆڵی كارای گێڕاوە لە كاری نهێنی ناوشار و خۆپیشاندانەكانی خوێندكارانی زانكۆدا.
رۆژی 11/6/1982 بووە بە پێشمەرگە لە ناوەندی كۆمەڵە، دواتر گواستراوەتەوە بۆ كەرتی تیپ- لە تیپی 85ی بەڕانەتی، بەشداریی چەند شەڕێكی سنووری دەشتی هەولێری كردووە و جارێكیش بریندار بووە، دوا پلەی رابەری سیاسیی تیپی 85ی بەڕانەتی بووە.
رۆژی 15/12/ 1985 لە نەبەردییكدا لە سماقوڵی سنووری زیارەت لەگەڵ كادیرێكی هاوڕێی بەناوی حەمە عەلی شەهیدكران و هاوڕێیەكیشیان بەناوی (مامۆستا ئەمیر) دیلكراو دواتر دوژمن لە سێدارەی دا.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*