سەرەکی » چاوپێکه‌وتن » پێناچێت جارێكی تر ئەم دەرفەتە بێتە پێشەوە کە لە سلێمانی پڕۆژەیەكی وەك شەقامی (100) مەتری جێبەجێ بكرێت

سەرۆكی شارەوانی سلێمانی:

پێناچێت جارێكی تر ئەم دەرفەتە بێتە پێشەوە کە لە سلێمانی پڕۆژەیەكی وەك شەقامی (100) مەتری جێبەجێ بكرێت

لە چەند رۆژی رابردوودا ئێستگەی دەنگی گەلی كوردستان چاوپێكەوتنێكی لەگەڵ توانا كەمال جەلال سەرۆكی شارەوانیی سلێمانی سازكرد، وەك هەوڵێك بۆ خستنەڕووی كارو چالاكییەكانی دامودەزگا خزمەتگوزارییەكان لەسلێمانی ‌و وەك هەوڵێكیش بۆ برەودان بە خستنەڕووی چالاكییە میدیاییەكانی ئۆرگانەكانی سەربە مەكتەبی راگەیاندن، كوردستانی نوێ پێی باش بوو كە پوختەیەكی گرنگی ئەو چاوپێكەوتنەكە بڵاوبكاتەوە.

لەبارەی گرنگیدان بە كۆكردنەوە و فەوتاندنی خۆڵ و خاشاكی سنووری پارێزگای سلێمانیی و رۆڵی تیمەكانی شارەوانی لەو پرۆسەیەدا، ئەندازیار توانا كەمال سەرۆكی شارەوانی سلێمانی ئەوەی روونكردەوە كە سنووری شارەوانییان بە سەر چەند زۆنێكدا دابەشكردووە كە بریتییە لە (4) زۆن كە هەر زۆنەو لە ئەستۆی كۆمپانیایەكە و وتیشی: زۆنێكیش بۆ دەوروبەری سلێمانییە كە شارەوانی خۆی سەرپەرشتی دەكات، بە تایبەتی سەیرانگە بچووكەكانی دەوروبەری شاری سلێمانی. بەڵام گەڕەكەكانی شاری سلێمانی لە لایەن (4) كۆمپانیاوە سەرپەرشتیان دەكرێت. هەروەك روونیشیكردۆتەوە كە هەر سێ ساڵ جارێك حكومەتی هەرێمی كوردستان زیاتر لە (56) ملیۆن دۆلار بۆ ئەم پڕۆسەیە تەرخان دەكات، واتا رۆژانە بۆ هەر تۆنێك خاشاك تا كاتی فڕێدانی، (1) ملیۆن دینار تەرخان كراوە.
لەبەشێكی دیكەی روونكردنەوەكانیدا سەرۆكی شارەوانی دەڵێت: ئەمە بەشی یەكەمی پڕۆسەكەیە كە بریتییە لە كۆكردنەوەی خۆڵ و خاشاك و گواستنەوە و فڕێدانی لە شوێنی مەبەست.
هەروەها رایگەیاند: رەنگە لە داهاتوویەكی نزیكدا قۆناغی دووەمی ئەم پڕۆسەیە دەستپێدەكات، واتا خۆڵ و خاشاكی فڕێدراو دەدرێت بە كۆمپانیایەك كە كارگەیەكی ریسایكلینی هەیە و هەموو خاشاكەكە لەوێ لەناو دەبرێت، تەنها بەشێكی كەمی دەمێنێتەوە واتا (20%)، بۆ ئەوەی بخرێتە ژێر زەوییەوە. ئەم رێژەیەش لە ستانداردی جیهانەوە نزیكە.
سەبارەت بەوەش كە بڕیاڕبووە لە بەرامبەر كۆكردنەوەی خاشاكدا پارە لە هاووڵاتییان وەربگیرێت، توانا كەمال دەڵێت: ئەم پڕۆسەیە ئێستا چۆتە بواری جێبەجێكردنەوە كە بڕیاری ئەنجومەنی وەزیران و فەرمانی وەزارەتی شارەوانی و گەشتوگوزاری بۆ دەرچووە و دواتر هاتۆتە سەرۆكایەتی شارەوانی سلێمانی و بۆ ئەو مەبەستەش شارەوانی گرێبەستیان كردووە، بەڵام پێویستیان بە كاتێك بووە بۆ خۆئامادەكردن و كۆكردنەوەی داتا و ناونووسكردنی ماڵەكان،
روونیشیكردۆتەوە كە مانگانە (5)هەزار دینار لە ماڵەكان وەردەگیرێت و بۆ دوكان و شوێنە بازرگانییەكانیش لە (7500) دینار دەستپێدەكات تا (75)هەزار دینار، لە مۆڵەكان و نەخۆشخانە تایبەتەكانیش بە پێی لیتر و قەبارە لێیان وەردەگیرێت كە بڕەكەی بۆ هەر لیترێكی خۆڵ و خاشاك (100) دینارە.
لەبارەی ئاستی رۆشنبیریی هاووڵاتییانیشەوە كە ئاخۆ تاچەند كارئاسانی دەكەن بۆ كارو چالاكی ئەو كۆمپانیایانە، سەرۆكی شارەوانی دەڵێت: ئەمە پڕۆسەیەكی نوێیە، خەڵك بە باشی پێشوازیی لێدەكەن، بەڵام خوازیاری ئەوەن كە وەكو وڵاتانی تر لە كوردستانیشدا ئەم پڕۆسە جێبەجی بكرێت، بۆیە وردە وردە هاووڵاتیان هاوئاهەنگ دەبن لەگەڵ حكومەتدا بۆ پاككردنەوە و جوانكردنی وڵاتەكەمان.
بەڵام ئاماژەی بەوە داوە كە هەندێك لە هاووڵاتییان گلەییان لە بڕی ئەو پارەیە هەیە كە بۆ كۆكردنەوەی خۆڵ و خاشاك لەبەرچاو گیراوە و مۆڵ و شوێنە بازرگانییەكانیش هەمان كێشەیان هەیە، بەوپێیەی پێشتر رێككەوتنیان كردووە لەگەڵ هەندێك لە كۆمپانیاكاندا بۆ كۆكردنەوەی خاشاك. وتیشی: داواكاریی و سكاڵای زۆریشیان گەیاندۆتە ئێمە، بۆ ئەوەی بڕە پارەكە كەم بكرێتەوە.
لەتەوەرێكی دیكەدا سەبارەت بە پڕۆژەی شەقامە 100 مەترییەكەی سلێمانیش، سەرۆكی شارەوانی ئەوەی روونكردۆتەوە كە پڕۆژەی شەقامی (100) مەتری شاری سلێمانی لە چ قۆناغێكدایە و وتی: نییەتێكی جددی هەیە بۆ جێبەجێكردنی پڕۆژەكە كە بە هۆی قەیرانی دارایی و شەڕی داعشەوە، چەند شوێنێك دروستكرابوو، سەرەتا لای پارێزگای سلێمانی بوو، دواتر دراوەتە شارەوانی و ئاوەدانكردنەوە. پاشان وتیان ناكرێت ئەم پڕۆژەیە سێ یان چوار خاوەنی هەبێت، ئەوەبوو لەكۆتاییدا پڕۆژەكە درایەوە بە شارەوانی. وتیشی: ماوەیەك پێش ئێستا لیژنەیەك دانرا بۆ هەڵسەنگاندنی پڕۆژەكە و پێداویستی هەنووكەیی نوێش هاتۆتە پێشەوە، لەوبارەیەشەوە رایگەیاند كە سێ پێشنیاز لەلایەن لیژنەكەوە راگەیەندراوە و روونیكردەوە كە پێشنیازی یەكەم ئەوەیە پڕۆژەكە وەكو خۆی دەمێنێتەوە، پێشنیازی دووەم: بڕە پارەیەك كە پێویست نەبووە بۆ چەند شوێنێك وەكو (باخچە و چەند شوێنێك تر)، كەم كراوەتەوە. پێشنیازی سێیەمیش: لە بەرامبەر لابردنی هەندێك لەو خزمەتگوازرییانە كە بۆ جوانكردنی ئەم شەقامە دانرابوو، پێداویستی هەنووكەیی بەپێی ستانداردی جیهانی دانراوە. دەشڵێت: بە بڕوای من دەبێت زۆر گرنگی بەم پڕۆژەیە بدرێت، چونكە پێناچێت جارێكی تر ئەو دەرفەتە بێتەوە پێشەوە كە لەسلێمانی پڕۆژەی لەم شێوەیە جێبەجێ بكرێت.
لەبارەی بوونی هەر بەربەستێكیشدا بۆ جێبەجێنەكردنی پڕۆژەكە و جددیی بوونی حكومەت بۆ جێبەجێكردنی پڕۆژەكەش، توانا كەمال سەرۆكی شارەوانیی سلێمانی رایگەیاندووە: بودجە بۆ ئەم پڕۆژەیە بەربەستێكی گەورەیە، ئەم پڕۆژەیە بە سەرۆكایەتی ئەنجومەنی وەزیران بڕیاری لێدراوە و لیژنەیەكیش دیاریكراوە بۆ یەكلاییكردنەوەی پڕۆژەكە.
سەبارەت بەوەش كە ئایا شارەوانی تا چەند بەدواداچوون دەكات بۆ جێبەجێكردنی ئەو پڕۆژە ستراتیژییە، سەرۆكی شارەوانی دەڵێت: بە بەردەوامی بەدواداچوونمان هەیە و نوێنەریشمان هەیە لەلیژنەكەدا، لە وەزارەتی شارەوانی و گەشتوگوزاریش بریكار هەیەو ئاگاداری پڕۆسەكەیە و ئێستا بابەتەكە لە ئەنجومەنی وەزیرانە.
لەبارەی هێنانەوەی پاساوی قەیرانی دارایی و شەڕی داعشیشەوە لەكاتێكدا كە لەهەمان ماوەی ئەو قەیرانەدا لە شاری هەولێر شەقامی 120 مەتری ‌و 150 مەتری جێبەجێ دەكرێت، سەرۆكی شارەوانیی سلێمانی دەڵێت: راستە پڕۆژەی شەقامی 150 مەتری و چەندین پڕۆژەی تریش لە هەولێر جێبەجێ دەكرێت، بەڵام ئەوە لە دەسەڵاتی ئەنجومەنی وەزیراندایە.
توانا كەمال ئامادە نەبوو وەڵامی ئەوە بداتەوە كە ئاخۆ هۆكاری ئەوە سیاسییە یان نا و وتی: من ناتوانم وەڵامی ئەو پرسیارە بدەمەوە، چونكە ئێمە لە ئەنجومەنی وەزیران نین بۆئەوەی بڵێم پەیوەندیی بە سیاسەتەوە هەیە، بەڵام ئاشكرایە كە ئەم پڕۆژەیە لە سلێمانی زۆر دواكەوتووە و ئەنجومەنی وەزیرانیش وەڵامی نەرێنی نییە بۆ ئەم پرسە و وتی: هەوڵیش دەدەن بۆ جێبەجێ كردنی.
جەختیشی لەسەر ئەوە كردەوە كە ئەم پڕۆژەیە هەر لەسەرەتاوە كێشەی زۆری تێدابوو، ئاساییە ئەگەر تائێستاش دواكەوتووە.
سەبارەت بە هەنگاونان بۆ نۆژەنكردنەوەی شەقامەكانی ناوشارو هۆكاری ئەوەی كە زۆربەی شەقامەكان دوای ماوەیەكی كەم لە نۆژەنكردنەوەیان، خراپ دەبنەوە، سەرۆكی شارەوانی سلێمانی دەڵێت: بە بڕوای من ئەمساڵ دووچاری ئەو كێشەیە نابین، چونكە پڕۆسەی نۆژەنكردنەوەی شەقامەكان بە رێگەیەكی زانستی كراوە و روونیكردۆتەوە كە ساڵی پێشوو كاری زۆر كراوە، دەتوانم بڵێم زۆربەی شەقامە سەرەكی و فەرعییەكان هەمووی نۆژەن كراوەتەوە، تەنانەت هەندێك شوێنمان بە كۆنكرێت كردووە. ئەمساڵ رەچاوی رەوشی كەشوهەوا و بارانیش دەكەین، بۆیە جۆرە قیرێكی نوێ هەیە كە لە بارانیش دەتوانرێت بەكار بهێندرێت و لەتاقیكردنەوەشدا سەركەوتوو بووە.
دەربارەی پلانی نوێشیان بۆ گەیاندنی خزمەتگوزاریی بە گەڕەكە نوێكانی شاری سلێمانیش توانا كەمال رایگەیاندووە كە ئەوە هەندێك ئاڵۆز و قورسە و وتیشی: حكومەتی هەرێمی كوردستان بۆ ئەم مەبەستە هیچ بودجەیەكی تەرخان نەكردووە، ئێمە هەموو ئامادەكارییەكمان كردووە و وەزارەتەكانی تریش ئامادەن، داواكارییەكانیان بۆ بودجە ناردووە بۆ تەرخانكردنی ئەم بودجەیە لەلایەن وەزارەتی پلاندانان و سەرۆكایەتی ئەنجومەنی وەزیرانەوە، بەڵام هێشتا هیچ وەڵامێكمان پێ نەگەیشتووە.
لەبارەی بوونی هەر پڕۆژەیەكی نوێشەوە بۆ رێكخستنەوەی ناو بازاڕی سلێمانی لەبارەی دانانی كۆشك ‌و كابینەوە بۆ فرۆشتنی كتێب ‌و كە ئاخۆ ئەوانە تاچەند لەڕووی یاساییەوە رێگەپێدراون، سەرۆكی شارەوانی پێیوابوو كە بەو شێوەیە هیچ خزمەتێك بە خوێنەران و خەڵكی شاری سلێمانی ناكرێت و دەڵێت: ئەوە دیاردەیەكی جوان نییە، بەڵام لە بەرامبەردا ژیان و بژێویی بەشیك لە خەڵكی سلێمانی لەو رێگایەوەیە، ناتوانین لەم دۆخەدا ئەوەیان لێ تێكبدەین، وتیشی: لە رێی وەبەرهێنانەوە پڕۆسەیەكی گشتگیرمان بەدەستەوەیە كە لەڕێگەی چەند كۆمپانیایەكەوە چەند كۆشكێكی مۆدێڕن هاوشێوەی وڵاتانی دیكە بهێنرێتە ناوشار و لەو شوێنانە جێگیر بكرێن، بەم كارەش دەتوانین قەرەباڵغی ناوشار كەم بكەینەوە، ئەو كەسەش كە دەبێتە خاوەنی كۆشكەكە كرێیەكی مانگانەی لێ وەردەگیرێت و دەتوانرێت لە كۆشكەكاندا كافیتریا دابنرێت و خەڵك لەوێ كۆببێتەوە.
سەبارەت بەوەش كە ئاخۆ بوونی ئەو كۆشكانە هیچ داهاتێكی بۆ شارەوانی سلێمانی هەیە یان نا، توانا كەمال دەڵێت: بەڵێ ئێمە گرێبەستمان لەگەڵ وەبەرهێنەرەكان دەبێت، ئەوان كرێ بە ئێمە دەدەن و خۆشیان لەو كەسانە كە كۆشكەكەیان پێ دەدەن كرێ وەردەگرن.

print

 815 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*