گوڵه‌چنه‌

سه‌ره‌تا:

به‌لاتانه‌وه‌ سه‌یر نه‌بێت كه‌ مێژوو ده‌بێت ئه‌م جۆره‌ روداوانه‌شی‌ تیا تۆ مار بكرێت، هه‌ڵبه‌ت گوڵه‌چنه‌ روداوێكی‌ ئاسایی‌ نه‌بوو، هه‌ر بۆخۆی‌ برسێتی‌ مه‌رگه‌ ساتێكی‌ گه‌وره‌یه‌ نه‌ك روداوێكی‌ ئاسایی‌، راكردنی‌ هه‌موو خه‌ڵك به‌دووی‌ ده‌ڕاسه‌دا، بۆ كۆكردنه‌وه‌ی‌ گوڵه‌گه‌نم، به‌وتن باس ناكرێت، من له‌نێو روداوه‌كاندا بووم، هه‌رمن نا ته‌واوی‌ خێزانه‌كه‌م، باوكم، دایكم براوخوشكه‌كانم، باوكم له‌هه‌موان ئازاری‌ زیاتر بوو، ئه‌و سه‌ره‌ڕای‌ ته‌مه‌ن، رابردوو، ماندوێتی‌، باوكیش بوو به‌رپرسیاره‌تیه‌كه‌ی‌ زۆر تر بوو، دایكم هه‌ندێجار له‌توڕه‌یی‌ خۆیدا هه‌موو ئه‌و په‌یوه‌ندیانه‌ی‌ بیر ده‌چوه‌وه‌ كه‌سه‌ره‌ڕای‌ هاوسه‌رێتی‌ له‌گه‌ڵ باوكما ئامۆزای‌ یه‌كتریش بوون، ئێمه‌ به‌بارودۆخه‌كه‌ راهاتبوین، راستی‌ كه‌سیان ناهه‌قیان نه‌بوو، دواتر له‌باره‌ی‌ باوكمه‌وه‌ شتی‌ تر هه‌یه‌ باسی‌ بكه‌م، گوڵه‌گه‌نمه‌كانمان كۆده‌كرده‌وه‌و ده‌مانخسته‌ گونیه‌وه‌و جاری‌ هه‌بوو شه‌ویش ده‌ماینه‌وه‌، ئه‌وه‌ ئه‌و چیرۆكه‌ بوو، كه‌ئه‌وانه‌ی‌ ئێستا زۆر كه‌می‌ له‌ باره‌وه‌ ده‌زانن، له‌ نێو رۆژگاره‌كانی‌ گوڵه‌چنه‌دا زۆر چیرۆكی‌ ئازار به‌خش و تراژیدی‌ هه‌ن كه‌ پێویسته‌ تۆمار بكرێن، ئه‌و رۆژگاره‌ش به‌شێك بوو له‌مێژووه‌ ره‌شه‌كه‌ی‌ ئێمه‌، ئه‌و مێژووه‌ی‌ هه‌میشه‌ ره‌ش بووه‌ به‌ ئازارو مه‌ینه‌تی‌ .
خوێندنه‌وه‌ی‌ ئه‌مه‌و هه‌ڵوه‌سته‌ له‌سه‌ركردنی‌ ده‌رفه‌تێكی‌ باشه‌ بۆ بیركردنه‌وه‌ له‌مرۆڤ بوون و نادادی‌ ، من ته‌نها به‌و نیازه‌ ئه‌مه‌ ده‌نووسم، نه‌ك به‌ مه‌به‌ستێكی‌ دیكه‌، له‌نێو چیرۆكه‌كانی‌ گرانیدا ئازاری‌ زۆرهه‌ن بۆ گێڕانه‌وه‌، ئاخر ئه‌وكاته‌ی‌ ژنه‌ رووسوره‌كه‌ دوای‌ هه‌رزان بوونی‌ گه‌نم و ئارد نه‌فره‌تی‌ له‌و ئارده‌ كرد كه‌له‌كۆبوونی‌ خۆراك وه‌ریگرت و پێی‌ وت «تا ناچاری‌ جه‌سته‌ به‌خشیت نه‌كردم هه‌رزان نه‌بوی‌ تازه‌ به‌من چی‌« ناكرێ‌ ئه‌وی‌ تۆزقاڵێك هه‌ستی‌ مرۆڤایه‌تی‌ له‌له‌شیدا بێت و خوێنی‌ مرۆڤ به‌ده‌ماره‌كانیدا بگه‌ڕێت موچوڕكه‌ به‌له‌شیدا نه‌یه‌ت، رێك له‌و سه‌رده‌مه‌دا هه‌ندێك چاوچنۆك و خوێنخۆری‌ مرۆڤ گه‌نم جۆو دانه‌وێڵه‌كانیان ده‌شارده‌وه‌ بۆ ئه‌وه‌ی‌ پاره‌ی‌ زیاتر بكات رۆژانی‌ هه‌ینیش له‌ریزی‌ یه‌كه‌م و له‌دوای‌ مه‌لاوه‌ ده‌ستیان بۆ خوداكه‌یان به‌رزده‌كرده‌وه‌ تا به‌هه‌شتی‌ بن و له‌وێ‌ له‌72و فریشته‌كه‌ بێبه‌ش نه‌كرێن .
ئایه‌ ناكرا دوو ده‌وڵه‌مه‌ندی‌ ویژدان زندوو به‌رله‌وه‌ی‌ خاتونه‌ رووسوره‌كه‌ به‌و ده‌رده‌بچێت بێ‌ به‌رانبه‌رو له‌پێناوی‌ مرۆڤدا هاوكاری‌ بان بۆنا خۆ ره‌نگه‌ ئێستا به‌شێك له‌و چاوچنۆكانه‌ هه‌ر له‌ژیاندانه‌بن و شایلۆك ئاسا ئێسك و پروسكیشیان رزی‌ بێت، نه‌شڕزیبێت ده‌ڕزێ‌ .
ئازاری‌ واتان بینیوه‌
باوكم عه‌ریف فاتیح «به‌ر له‌وه‌ی‌ ببێته‌ پێشمه‌رگه‌، له‌سه‌ر كوشتنی‌ چه‌ند سه‌ربازێك له‌گه‌ڵ كۆمه‌ڵێك كه‌سی‌ تردا ده‌گیرێن و دوای‌ ماوه‌یه‌ك كه‌ساغده‌بێته‌وه‌ كوشتنی‌ به‌مه‌به‌ست نیه‌و هه‌ڵه‌یه‌ك ڕوویداوه‌ ئازاد ده‌كرێن، ئه‌و له‌سوپای‌ عیراقیدا عه‌ریفه‌و كۆتایی‌ 1962 له‌ته‌ك یه‌ك دوو هاوڕێیداو به‌چه‌كه‌كانی‌ خۆیانه‌وه‌ له‌ره‌واندزه‌وه‌ ده‌چنه‌ شاخ و ده‌بنه‌ پێشمه‌رگه‌، له‌وكاته‌وه‌ تا 1975 پێشمه‌رگه‌ ده‌بێت و به‌هه‌وڵی‌ خۆی‌ سه‌رپه‌ل و سه‌رلق و ئامر به‌تالیۆن ده‌بڕێ‌، له‌پێشمه‌رگایه‌تی‌ یه‌كجار بریندار ده‌بێت، له‌كاتی‌ هه‌ره‌سا به‌زۆری‌ دایكم و به‌دڵشكاوی‌ دێته‌وه‌و له‌كۆیه‌ خۆی‌ ده‌داته‌وه‌ ده‌ست حكومه‌ت، له‌و ساڵه‌ به‌دواوه‌و تاناوه‌ندی‌ هه‌شتاكان دوو جار گیرا، نه‌حكومه‌تی‌ عیراقی‌ چاكه‌ی‌ عه‌ریقیه‌كه‌ی‌ دایه‌وه‌ له‌ژیانداو نه‌پارتیش تا له‌ژیاندابوو چاكه‌ی‌ ئه‌و هه‌موو ماندوو بوونه‌ی‌ دایه‌وه‌، تا مرد پارتی‌ بوو، ته‌نانه‌ت دوای‌ شه‌هیدبوونی‌ كوڕه‌كه‌یشی‌ هه‌ر پارتی‌ مایه‌وه‌، دوای‌ ئه‌و هه‌موو ساڵه‌و ئه‌و ته‌مه‌نه‌ به‌یه‌كه‌وه‌ به‌دووی‌ گوڵه‌گه‌نمه‌وه‌ بووین، له‌به‌رچاوم باوكم جه‌نه‌ڕاڵێكی‌ نائومێدو دڵشكاو بوو، ئه‌و خیانه‌تی‌ له‌ بیرو بڕواكه‌ی‌ نه‌كردبوو، لێ‌ بیروبڕواكه‌ی‌ پشتیان له‌خۆی‌ و خانه‌واده‌كه‌ی‌ كردبوو، ئه‌وكاته‌ی‌ ئه‌و گوڵه‌چنه‌ی‌ ده‌كرد هه‌ندێك سه‌رۆك جاش موچه‌ی‌ خه‌یاڵیان له‌حزبه‌كه‌ی‌ وه‌رده‌گرت و وه‌ك پاشا ده‌ژیان، زۆرجار بیرم ده‌كرده‌وه‌ هه‌ر له‌به‌ر باوكم ناكرێ‌ به‌وجۆره‌بین، به‌ڵام ئاكارم رێگه‌ی‌ نادام مل بۆ هه‌ندێ‌ كاربده‌م، باجه‌ت توركه‌ هاوڕێی‌ باوكم بوو، ئه‌و چه‌ندینجار به‌گریانه‌وه‌ باسی‌ باوكمی‌ ده‌كرد و ده‌شیگوت «كاكه‌ هه‌ر له‌به‌ر باوكت با یه‌كێكتان پارتی‌ بوایه‌ن» من لام سه‌یربوو ده‌بێت به‌و جۆره‌ بێت.
باوكم له‌ گوڵه‌ چنه‌دا زۆر ماندوو ده‌بوو ، ئێمه‌ خوشك و برا دامانده‌نیشاند ، به‌ڵام دایكم ده‌یگووت با ئه‌و ده‌رده‌ بكێشێت، ئه‌و داخی‌ ئه‌و هه‌موو ساڵه‌ی‌ له‌ دڵدا بوو كه‌ به‌ دوای‌ عه‌ریف فاتیحی‌ ئامۆزاو هاوسه‌ریه‌وه‌ ئه‌م گوندو ئه‌و گوندی‌ كردبوو ، ژیانی‌ ئێمه‌ چیرۆكێكی‌ تراژیدی‌ بوو ، شه‌وێك به‌ دوای‌ ده‌ڕاسه‌وه‌ له‌و ده‌شت و ده‌ره‌ بووین ، به‌یانی‌ كه‌ هه‌ستام له‌ نزیكمانه‌وه‌ده‌ڕاسه‌كه‌ دوو قازی‌ كێوی‌ كوشتبوو ئه‌وه‌ زۆر ئازاری‌ دام ، خه‌می‌ ئه‌و قازانه‌ هێنده‌ی‌ خه‌می‌ باوكم كه‌ده‌چه‌مایه‌وه‌ بۆ هه‌ڵگرتنی‌ گوڵه‌ گه‌نمێك ئازاری‌ ده‌دام، هه‌موومان به‌ دوای‌ ده‌ڕاسه‌كه‌دا ده‌ڕۆیشتین، هه‌ندێجار خاوه‌ن زه‌وی‌ دڵی‌ گه‌وره‌و مرۆ دۆست و هه‌ندێ‌ جاریش جه‌لادو سته‌مكار، ته‌نانه‌ت نه‌یده‌هێشت دوای‌ ده‌ڕاسه‌ش بكه‌وین .

نان و نه‌گبه‌تی‌:
ئاسان بوو گوڵه‌چنه‌ نه‌كه‌م و زۆرباش بژیم، زۆرێك له‌مه‌كته‌ب سیاسی‌ و سه‌ركردایه‌تی‌ یه‌كێتی‌ و لایه‌نه‌كانی‌ تریشم ده‌ناسی‌ و هه‌ندێكیان دۆست و براده‌ریش بوون، زۆرجاریش هه‌بوو ده‌یانگوت چت پێویسته‌ شه‌رم مه‌كه‌، من وامده‌زانی‌ ئه‌گه‌ر من داوابكه‌م و خه‌ڵكی‌ دیكه‌ نه‌یانبێت و كه‌سیش نه‌بێت هاوكاریان بكات، ئه‌وه‌ ناپاكی‌ و خیانه‌ته‌ له‌چینایه‌تی‌ ، زۆر دره‌نگ تێگه‌یشتم به‌رژه‌وه‌ندی‌ له‌م وڵاته‌ له‌پێش هه‌موو شتێكه‌وه‌یه‌، له‌هه‌موو ئه‌وانه‌ی‌ به‌دووی‌ هه‌ڵگرتنه‌وه‌ی‌ گوڵه‌گه‌نمه‌وه‌ بوون، زیاتر ئه‌وانه‌ ئازاریان ده‌دام كه‌كچانی‌ گه‌نج یان به‌ساڵاچووان بوون، كچه‌ گه‌نجه‌كان بۆ ئه‌وه‌ی‌ ده‌م و چاوی‌ خۆیان له‌خۆرو له‌راوچی‌ چڵێس بشارنه‌وه‌، هه‌میشه‌ هه‌رچاویان به‌ده‌ره‌وه‌ بوو، له‌گه‌ڵ ئه‌وه‌شدا زۆرجار هه‌ر هه‌وڵی‌ له‌خشته‌بردنیان ده‌درا، هیچ شتێك له‌سه‌ر ئه‌مگۆی‌ زه‌ویه‌ هێنده‌ی‌ نان پیرۆز نیه‌، هیچ شتێكیش هێنده‌ی‌ نان مرۆڤی‌ ناچاری‌ ملدان و لاره‌خواری‌ نه‌كردووه‌، نه‌بوونی‌ نان نه‌گبه‌تیه‌كی‌ گه‌وره‌یه‌، مێژوو لیپه‌ له‌چیرۆكی‌ ئازاربه‌خش به‌هۆی‌ نه‌بوونی‌ نانه‌وه‌، ئێستا كه‌ده‌بینم مناڵه‌كان لێواری‌ نانه‌كان ناخۆن، یان ناوسه‌مونه‌كه‌ به‌بیانوی‌ ئه‌وه‌ی‌ هه‌ویره‌ ده‌رده‌كه‌ن، ئه‌و رۆژانه‌م بیرده‌كه‌وێته‌وه‌ كه‌كه‌س نایزانی‌ ئه‌و نانه‌ی‌ ده‌یخۆین پێكهاته‌كه‌ی‌ جگه‌ له‌گه‌نم و جۆ چی‌ تره‌، چیرۆكێكم خوێندوه‌ته‌وه‌ كاتی‌ خۆی‌ له‌هه‌واری‌ خاڵی‌ مامۆستا هێمندا بڵاوكرابوه‌وه‌، نوسینه‌ یان وه‌رگێڕان نایه‌ته‌ بیرم لێ‌ زۆر كاریگه‌ربوو «رێزی‌ نان بگرن» ئه‌وه‌ ناوی‌ چیرۆكه‌كه‌ بوو، كچه‌كان نه‌یانده‌وێرا له‌یه‌كتر دووربكه‌ونه‌وه‌ و به‌یه‌كه‌وه‌ گوڵه‌چنه‌یان ده‌كرد، له‌به‌ر ئه‌وه‌ی‌ هه‌ر دابڕانێك و دووركه‌وتنه‌وه‌یه‌ك له‌خشته‌بردنێكی‌ تیابوو، به‌راستی‌ مرۆڤ بونه‌وه‌رێكی‌ سه‌یره‌ له‌و بارودۆخه‌شدا له‌خشته‌بردن و فێڵكردن له‌یه‌كتر هه‌بوو، له‌نێو روداوه‌كانی‌ گوڵه‌چنه‌دا له‌خشته‌بردن و فریودان و ده‌سته‌مۆكردن و كه‌وی‌ كردن له‌پێناوی‌ ناندا زۆره‌ ئێمه‌ ناچینه‌ ورده‌كاریه‌وه‌و وێنه‌ گشتیه‌كه‌ نیشانده‌ده‌ین، وێنه‌گشتیه‌كه‌ هه‌ر ئه‌وه‌بوو ئه‌وانه‌ی‌ نانیان نه‌بوو ناچاربوون دوای‌ ده‌ڕاسه‌بكه‌ون و ئه‌وانه‌ی‌ هه‌شیانبوو ده‌یانزانی‌ چۆن ئازاری‌ ئه‌وانه‌ بده‌ن كه‌نیانه‌ .

دیسان كچه‌كان:
كچه‌كان له‌به‌ر شه‌رم و شكۆی‌ خۆیان هه‌مو ڕووی‌ خۆیان داده‌پۆشی‌ جگه‌ له‌هه‌ردوو چاویان له‌گه‌ڵ ئه‌وه‌شدا هێشتا ده‌كه‌وتنه‌ به‌ر هه‌ڕه‌شه‌و قه‌پی‌ ئه‌و چڵێسانه‌ی‌ دۆخه‌كه‌و ناچاریه‌كه‌ی‌ ئه‌وانیان ده‌قۆسته‌وه‌، ئه‌وان جگه‌ له‌وه‌ی‌ به‌رده‌وام دوو دوو سێ‌ سێ‌ به‌یه‌كه‌وه‌ ده‌گه‌ڕان، بۆ ئه‌وه‌ی‌ پارێزراویش بن ده‌هاتنه‌ نزیك ئه‌و خێزانانه‌ی‌ كه‌خه‌ڵكی‌ به‌ته‌مه‌نیان له‌گه‌ڵ بوو، له‌وێنه‌و روخساری‌ كچه‌كاندا ئه‌و كچه‌ کوردانه‌م بیر ده‌كه‌وته‌وه‌ كه‌ له‌قوشته‌په‌ و پردێ‌ له‌پێناوی‌ ژیانی‌ خۆیان و خانه‌واده‌كانیاندا ره‌نجیان ده‌كێشا، ئه‌وانه‌ی‌ به‌عس براو باوك و كه‌س و كاره‌كانیانی‌ به‌ره‌و چاڵه‌كانی‌ مردن بردبوو، ئه‌وان هه‌میشه‌ له‌نێو جلێكی‌ قه‌ترانی‌ و به‌ره‌نگێكی‌ زه‌رده‌وه‌ نانی‌ پیره‌ ژن و مناڵه‌كانیاندابین ده‌كردو رووبه‌ڕووی‌ مه‌رگ و هه‌ڕه‌شه‌و سوكایه‌تی‌ ده‌بوونه‌وه‌، وه‌ك كچه‌كانی‌ ئۆردوگا، ئه‌وانه‌ی‌ دوای‌ ئه‌نفال، ئه‌وانه‌ی‌ بۆ په‌یداكردنی‌ بژێوی‌ ئه‌و ده‌شت وده‌ره‌یان ده‌پێواو هه‌ندێجاریش به‌ناچاری‌ و به‌نرخێكی‌ كه‌م ده‌بوو بڕۆن له‌حه‌ویجه‌ ئیش بۆ ئه‌و عه‌ره‌بانه‌ بكه‌ن، كه‌ كه‌سوكاریان ئه‌نفالكردن و ژیانیان لێشێواندن، سه‌رده‌می‌ ئه‌نفال ئیتر ئێمه‌ گه‌وره‌تربووین و زیاتر دركمان به‌چه‌وسانه‌وه‌و سته‌مكاریه‌كه‌ ده‌كرد، خوێندنه‌وه‌مان بۆ سته‌مه‌كه‌ وه‌ك خوێندنه‌وه‌ی‌ سه‌رده‌می‌ بارزانیه‌كان نه‌بوو، كه‌ پێشتربوو ئێستاش وێنه‌ی‌ ئه‌و كچه‌ له‌نیگاو هۆشمدایه‌ كه‌ به‌عس باوك و براكانی‌ ئه‌نفال كردو چڵێسی‌ حه‌زی‌ بێئابڕوانه‌ی‌ خۆمانه‌و هاوزمانیش تێكیان شكاندو لێره‌و له‌وێ‌ نوكته‌و چیرۆكیان له‌سه‌ر ده‌كردو كردبوویانه‌ مایه‌ی‌ گاڵته‌و رابواردن، من جارێك چوومه‌ لای‌ دایكی‌ ئه‌و كچه‌و پێم ووت هه‌رچیتان پێویست بوو ناچارمه‌بن په‌نا بۆ هه‌موو كه‌س به‌رن، ژنێكی‌ داخدارو رووسووری‌ گه‌رمه‌سێر كه‌له‌گونده‌كه‌ی‌ خۆیان شێره‌ژنێك بوو بۆ خۆی‌، ئه‌و به‌ته‌واوه‌تی‌ تێكشكاوونائومێد بوو، ئه‌و ئیتر به‌عس و سه‌گ و سواڵی‌ ناوخۆ هه‌موو ژیان و هیواكانیان هاڕی‌ بوو .
كچه‌كان به‌شه‌رمه‌وه‌ بۆ گوڵه‌گه‌نمه‌كان ده‌چه‌مانه‌وه‌، هه‌ندێك له‌وانه‌ش كه‌به‌دووی‌ چێژه‌وه‌بوون ده‌چوونه‌ بن ده‌ستیانه‌وه‌و به‌پێدانی‌ گه‌نم ده‌یانوویست فریویان بده‌ن، من هه‌موو ئه‌مانه‌م به‌چاوی‌ خۆم بینیووه‌، من له‌نێو دۆزه‌خی‌ راسته‌قینه‌ی‌ خودادا بووم، رێك له‌و رۆژگاره‌دا ماڵه‌ به‌رپرسی‌ كورد هه‌بوو هه‌موو سبه‌ینانێك شیرو قه‌یماغ و هه‌نگوین و گوێزی‌ ده‌خواردو خۆیشی‌ وه‌ك شۆڕشگێڕ نیشانده‌دا، ئه‌و شایانه‌ رایده‌بواردوو ئه‌و كچانه‌ش كه‌ نان له‌ماڵیاندا نه‌بوو گوڵه‌گه‌نمیان كۆده‌كرده‌وه‌ بۆ ژیان و مانه‌وه‌ .
بۆ خۆم هه‌رگیز چیرۆكی‌ ئه‌و كچه‌ پارچه‌ پارچه‌ بوه‌م بیر ناچێته‌وه‌، كه‌دایكی‌ جگه‌ له‌فرمێسك هیچی‌ تری‌ نه‌بوو بۆی‌ بكات، ئه‌و كچه‌ی‌ قوربانی‌ نێو ئه‌و دۆزه‌خه‌یه‌، ئه‌و دۆزه‌خه‌ی‌ بازرگانه‌كانی‌ جه‌نگ و كوردایه‌تی‌ رۆڵیان هه‌بوو له‌دروستكردنیدا، دۆزه‌خێك كه‌تێیدا هه‌ژاره‌كان هه‌ڵده‌قرچێن و خاوه‌ن كوره‌كانیش ئاگره‌كه‌ خۆشتر و گه‌رمتر ده‌كه‌ن .

خاوه‌ن گه‌نمه‌كه‌ چی‌ ووت:
له‌یه‌كێ‌ له‌رۆژه‌كاندا خاوه‌ن پارچه‌یه‌كی‌ گه‌وره‌ی‌ ده‌غڵ و دان هات و زۆر به‌گه‌رمی‌ چاك و چۆنی‌ له‌گه‌ڵ كردم، وتی‌ كاك له‌تیف تكایه‌ ئه‌مه‌ مه‌كه‌و چه‌ند گه‌نمت ده‌وێت بیبه‌، وتم به‌ڵام خۆمن هه‌ر خۆم نیم، وتی‌ چه‌ند كه‌سن، نزیكه‌ی‌ سی‌ كه‌سێك ده‌بووین ئه‌و خه‌ڵكه‌ی‌ به‌دوای‌ ده‌ڕاسه‌كه‌وه‌ بووین، وتم ئه‌وه‌نده‌ین كه‌ دیاره‌، كابرا سه‌یرێكی‌ خه‌ڵكه‌كه‌ی‌ كردو وتی‌ ئه‌وه‌ زه‌حمه‌ته‌ و ناتوانم، به‌ڵام وه‌ك خۆت حه‌زده‌كه‌م چه‌ند گه‌نم ده‌به‌ی‌ بیبه‌ به‌س ئه‌مه‌ مه‌كه‌، پێم وت راستیه‌كه‌ی‌ ئه‌توانم ئه‌و داوایه‌ی‌ تۆ قه‌بوڵ بكه‌م، ئه‌توانم هه‌ر له‌بنه‌ڕه‌تا به‌رێگه‌ی‌ تر ده‌وڵه‌مه‌ندبم و ئه‌مه‌ نه‌كه‌م، به‌ڵام ئه‌وه‌م پێناكرێ‌، هه‌رچۆنێك بوو كابرا به‌زۆر فه‌رده‌یه‌كی‌ گه‌وره‌ گه‌نمی‌ بۆ دانام، من بیرم له‌و رۆژگاره‌ ده‌كرده‌وه‌ كه‌هێشتا خوێنكاری‌ شه‌شی‌ وێژه‌یی‌ بووم ئه‌وكاته‌ به‌شه‌و ده‌مخوێندو به‌ڕۆژ له‌كه‌ركوك كرێكاریم ده‌كرد، شیعرو چیرۆكیشم ده‌نووسی‌، جارێكیان به‌یاسین محێدینی‌ هاوڕێم وت بڕوانه‌ كرێكاری‌ و نوسین و خوێندنیش هه‌رسێك كارن، به‌ڵام دادی‌ ئه‌وه‌ ناده‌ن كه‌مرۆڤ شایسته‌و شایان بژی‌، باشه‌ ئاخۆ بیرنه‌كردنه‌وه‌ له‌وه‌ی‌ رێگای‌ تر بۆ باشكردنی‌ ژیانی‌ خۆت و خانه‌واده‌كه‌ت بگریته‌ به‌ر به‌بیانوی‌ ئه‌وه‌ی‌ هه‌موو شتێكی‌ ئه‌وانی‌ تر ناڕه‌وایه‌ هه‌ڵه‌یه‌ یان نا، یاخود ده‌كرێت بڵێین ئایه‌ هه‌ر بیركردنه‌وه‌ له‌خۆت و له‌بیركردنی‌ ژیانی‌ ئه‌وانی‌ تر كارێكی‌ راسته‌، ئێمه‌ ئه‌و رۆژگاره‌شمان تێپه‌ڕاند، گوڵه‌چنه‌ قۆناغێكه‌ له‌قۆناغه‌كانی‌ دیرۆكی‌ كوردی‌ باشور، وه‌ك چۆن شه‌ڕی‌ ناوخۆ، كۆڕه‌و، راپه‌ڕین، ئه‌مانه‌ هه‌موو پێویستیان به‌ هه‌ڵوه‌سته‌و قسه‌ له‌سه‌ر كردنه‌ به‌ هه‌مان جۆر گوڵه‌ چنه‌ش پێویستی‌ به‌هه‌ڵوه‌سته‌و قسه‌ له‌سه‌ر كردنه‌.

 380 جار بینراوە