سەرەکی » وتار » عه‌بدوڵڵا عه‌باس » زەمەنی كۆرۆناو دوو بۆچوون

زەمەنی كۆرۆناو دوو بۆچوون

*ئەم زەرەر و ئەو قازانج

هەموو شتێك، تەنانەت كەرەستە بێ گیانەكانیش رەنگی پەتایان گرتووە، مرۆڤیش، بەتایبەتی هەستیارە ورە نزمەكان پرسیاری هەتا كەی لەسەر زمانیان نابڕێ و بەستەزمانیان تێدایە تا رادەی لەگرێژنە دەرچوون لە ئاڵۆزیی دەروونی نزیك بۆتەوە، بەتایبەتی لەناو ئەو كۆمەڵانەدا (ویتە ویتی زۆر بڵێی) خوویەكە مێژوویەكی دێرینی هەیە.

لەدوای پەتاكە، چاوەڕێی ئەوە بكە عیادەی پزیشكە دەروونییەكان دەرگاكانیان لە شارەزا و پزیشكانی نەخۆشییەكانی دیكە زیاتر كراوە بێت و ئەوە سوننەتی ژیانە و لەوانەیە پەندی (موسیبەتی لایەك بە قازانجی لایەكی دی دەشكێتەوە) لەم رووداوانەوە هاتبێ.

تیایاندا هەیە لە سەرهەڵدانی ئەمجۆرە پەتایەدا وەك پرۆفیسۆری شارەزا بە نەفەسێكی ماندوونەناسانەوە هەموو لایەنەكانی پەتاكە شیدەكاتەوە، دەی باشە خەڵكی بەستەزمان لە كۆمەڵێكدا شنەیەك دەبات و هەڵكردنی نەرمەبایەك دەیهێنێتەوە چی بكات؟

*گرەوی شەڕانیەكان

لەم گێژاوەدا، وەك پەندەكە دەڵێت ورەی بەرز و نزم لە تەنگانەدا دەردەكەوێت و دەستەیەكیش لە ناوەڕاستیاندا ورە نزم و ورە ئاساییەكان و لە ململانێیەكی سیاسیدا بە راستڕەو و خەڵك وروژێنەر نیشانەكراون (لە نموونەی سەرۆكی ئیدارەی ئەمریكا و سەرۆك وەزیرانی بەریتانیا) كە بەناو خەڵكدا دەگەڕێیت و بەدیقەت لە جووڵانەوە و سەودا و مامەڵە نزیك دەبێتەوە، ئەو لە ناوەند (ناوەڕاست) وەستاوانە، چالاكانە دەبینی، بە وردی حسابی سبەینێی دوای پەتاكە دەكەن و لەهەموو وردبوونەوەیەكیان بۆ كاریگەریی ئێستا، لە دەفتەری حسابیاندا سەرنج و بۆچوونیان بۆ سبەینێ و دوایی هاتنی گەردەلوولەكە دەنووسنەوە.

ئەوەی لە سوودی ئەو بەرەیەیە، سەرهەڵدانی ئەم پەتایە لەكاتێكدا بوو كە جیهان لە لایەنی دارایی و ئابوورییەوە و رەنگدانەوەی هەڵپە سیاسییەكان كە دەوریان هەبوو لە هەڵگیرساندنی ئاگری بەشەڕدانی چەند لایەنێكی ناكۆك، وەك دەروازەی خۆسەپاندن، ئەنجامەكەی گەیاندنی بە دەروازەیەكی نیوە داخراو بوو، بە هەڵكردنی گەردەلوولی كۆرۆنا، چوونە ناوەندی كێشەكە، تا سبەینێ ببێتە بیانووی سازشی دەستگرتن بەسەر بازاڕدا، بۆیە هەندێك شرۆڤەكاری سیاسی لە خوێندنەوەی چاوەڕێكراوی دوای كۆرۆنا، كاریگەریی ئەوانە و كۆرۆنا بەرامبەر یەك و وەك دوو رووی یەك دراو دادەنێن.

ئەو لایەنانە، دیاردەی سنوورداخستن و بەجیایی سەیركردنی دوور و نزیكی كاریگەریی هەر رووداوێكی سەرتاپاگیریی، وەك ئەوەی پەتای كۆرۆنا خوڵقاندی، دەبێتە بیانوو بۆیان بۆ مامەڵەپێكردنی بەرەو چڕكردنەوەی كێشەی ئابووریی و دارایی و رەنگدانەوەی كێشەی سیاسی و قووڵكردنەوەی ناكۆكی و ململانێ و سەرئەنجام بردنی بەو لایەنەدا، سەپاندنی ئیرادەی ورووژاندن بەقازانجی ئەوان بشكێتەوە لەسەر بنەمای ئاگر لەخۆیان دوور و گەرم راهێنانی قازانج لەوان نزیك.

 477 جار بینراوە