سەرەکی » وتار » جەمال ئارێز » پاراستنی هەرسێکیان گرنگە

پاراستنی هەرسێکیان گرنگە

بەگوێرەی دوایین هەواڵ سەبارەت بە پاراستن و پارێزگاریی لە ناوچە دابڕێنراوەکان و لەسەروو هەمووشیانەوە کەرکوک و بەتایبەتی ئەو ناوچەیەی پێی دەوترێت (بۆشایی ئەمنیی) لەنێوان سەنگەرەکانی پێشمەرگە و سوپا و هێزە ئیتیحادییەکان، دەوترێت کە رێکەوتنێکی سەرەتایی لەنێوان وەزارەتەکانی بەرگریی عیراق و پێشمەرگەدا چێ بووەو گوایە بڕیارە بەم نزیکانە هەردوو وەزارەت خاڵ لەسەر پیتەکان دابنێن و رێکەوتنەکە بخەنە بواری جێبەجێکردنەوە و بە گوێرەی لێکتێگەیشتنە سەرەتاییەکەش چەند بنکەیەکی هاوئاهەنگیی سەرەکی و فەرعی لە کەرکوک و موسڵ و مەخمور و خانەقین دادەمەزرێن و چەند ئەفسەرێکی سوپای عیراق و پێشمەرگە ئەندام دەبن لەو بنکانەدا کە دەکرێنە سەنتەری هاوئاهەنگی و سەنگەرەکانی پێشمەرگە و سوپا لەیەکتریی نزیک دەکرێنەوە تا ئەو بۆشاییە ئەمنییەی هەیە لەنێوانیاندا و بۆتە پێگەیەکی ئارام بۆ جموجۆڵ و خۆڕێکخستنەوەی تیرۆریستانی داعش و ئەو گروپە چەتە و مافیاییانەی سوود لەو دۆخە دەبینن، پڕبکرێتەوە.

تائێرەی هەواڵەکە مایەی دڵخۆشی و دڵنیایی دانەوەیە بە کورد و هەموو پێکهاتە رەسەنەکانی ئەو ناوچانە کە بوونەتە قوربانیی دەستی تیرۆر و تیرۆریستان و مێژوویەکی هاوبەشی پێکەوە ژیانیان هەیەو پەیوەندیی کۆمەڵایەتی و کاری هاوبەشی بازاڕو کشتوکاڵ و… هتد پێکەوەیان دەبەستێتەوە، بەڵام ئەوەی پێویستە لەسەر لایەنی کوردستانی بیزانێت، ئەوەیە کە چۆن کورد و خاکی دابڕێنراوی ناوچە (کێشەلەسەرەکان) پێویستیان بە پاراستنە، ئابڕوو و ناوبانگ و بژێویی پێشمەرگەش پێویستی بە پاراستنە، بۆیە پێویستە:

1-هەرێم هەر رێکەوتنێک لەگەڵ حکومەتی ئیتیحادی بکات (جگە لە نهێنییە سەربازییەکانی کە ناکرێت بۆ رای گشتی ئاشکرا بکرێت) دەبێت زۆر روون و راشکاوبێت، چونکە ئەگەر رێکەوتنەکەی ساڵی 2015 ئاشکرابووایە کە عیراق داوای کردبوو لەدوای کۆتایی هاتنی شەڕی داعش پێشمەرگە دەگەڕێتەوە سنوورەکانی بەرلە حوزەیرانی 2014 و هەرێمیش رازیی ببوو، ئەوا هەرگیز رووداوەکانی 16ی ئۆکتۆبەر و دواتر روویان نەدەدا و هەر لەسەرەتاوە ئاشکرا دەبوو کە دەبێت پێشمەرگە بگەڕێتەوە چیمەن و لەیلان و شۆراو، نەک لایەنە سیاسییەکان نان و پیازی سیاسی بەو بابەتەوە بخۆن.

2-ئەو پێشمەرگانەی دەبرێنە ئەو شوێنە واباشترە خۆیان خەڵکی ئەو ناوچانە بن، تالەڕووی شارەزایی لە جوگرافیاو کەلتوور و زمانی باوی ناوچەکان شارەزاییان هەبێت.

3-هەر لەسەرەتاوە کارێک بکرێت کە بەهیچ شێوەیەک مووچەی ئەو دوو لیوای پێشمەرگەیەی کە رەوانەی ئەو ناوچانە دەکرێت دوانەخرێت، چونکە ناکرێت بەبەرچاوی ئەوانەوە سەرباز و هێزە ئەمنییە ئیتیحادییەکان مانگانە لەکاتی خۆیدا مووچەیان بدرێتێ و پۆشتەو پەرداخ بن لەڕووی چەک و چۆڵەوە، بەڵام ئەوان بنێردرێنە ئەو ناوچانە، بەڵام ئیتر لەڕووی دابینکردنی بژێویی و خۆراک و پێداویستیی سەربازییەوە فەرامۆش بکرێن تا کارەساتێک دەقەومێت ئەوسا بکەونە پەلەپڕوزێ.

4-دەبێت کارێک بکرێت ئەو پێشمەرگانەی کە دەنێردرێن خەڵکانێک بن بەتایبەت بۆ ئەو ئەرکە ئامادەبکرێن، واتە رەگەزپەرست نەبن و خولێکی ئامادەکارییان لە شێوازی مامەڵە لەگەڵ پێکهاتە جیاجیاکاندا بۆ بکرێتەوە، تا لەجیاتی ئەوەی پێکهاتەکانی دیکە سڵیان لێ بکەنەوە، هاوکار و پشتیوانیان بن.

ئەم هەنگاوانەش دەبنە زامنی مانەوەی پێشمەرگە بەبێ بەریەککەوتن لەگەڵ پێکهاتەکانی دیکە و هێزەکانی عیراق و ئەگەری هەیە دەستپێکێکی باشیش بێت بۆ رەوینەوەی ئەو وەهمەی حکومەتی ئیتیحادیی عیراق لە جێبەجێکردنی مادەی 140دا بۆخۆیی دروستکردووە کە گوایە کێشەی ئەو ناوچانە بەرمیلە باروتە، بەڵکو ئاسایی بوونەوەی پەیوەندیی پێکهاتەکان و پەیوەندیی پێکهاتەکان و پێشمەرگە، پێشمەرگەو سوپاو پۆلیسی ئیتیحادی لەناوچەکە کارئاسانیی زۆر بۆ نزیکبوونەی لایەنە سیاسییە لۆکاڵییەکانی ئەو ناوچانە دەکات.

بۆیە پاراستی هەرسێکیان (خاک، خەڵک، پێشمەرگە)ش گرنگە.

 875 جار بینراوە