سەرەکی » وەرزش » تیروپشكی 2 پاڵەوانێتییە گەورەكەی ئەوروپا راكێشرا

تیروپشكی 2 پاڵەوانێتییە گەورەكەی ئەوروپا راكێشرا

تیروپشكی دوو پاڵەوانێتییەكەی ئەوروپا كە پێكهاتون لە چامپیۆنس لیگ و یۆرۆپالیگ لە شاری نیۆنی سویسرا راكێشرا، بەڵام ئەمجارە جیاواز لە ساڵانی پێشوو نوێنەری یانەكان تەنها لە رێگەی ڤیدیۆ كۆڵەوە بەشدار بوون.

بەهۆی كاریگەری كۆرۆناش ئەمجارە بەیەكجار تیروپشكی قۆناغی چارەكی كۆتایی تا یاری كۆتایی راكێشرا و چەندین یاری بەهێز و ئاگرین بەخۆیەوە دەبینێت.

لە چامپیۆنس لیگدا براوەی یاری بەرامبەر بارسێلۆنا و ناپۆلی لە قۆناغی چارەكی كۆتایی رووبەڕووی بایرن مونشن دەبێتەوە.

لە یارییەكی تری بەهێزی ئەم قۆناغە براوەی مان سیتی و ریاڵ مەدرید رووبەڕووی یانەی یۆڤانتۆس دەبێتەوەو لە نێوان ئەم 8 یانەیەش یەكێكیان دەگاتە یاری كۆتایی بەو پێیەی براوەی هەردوو یارییەكەی چارەكی كۆتایی لە قۆناغی پێش كۆتایی رووبەڕووی یەكتر دەبنەوە، واتە لەنێوان بارسێلۆنا و ریاڵ مەدرید و مانچستەر سیتی و یۆڤانتۆس و بایرن مونشن یەكێكیان دەگەنە یاری كۆتایی.

یانەی پاریس سان جێرمانی فەرەنسیش كە سەدان ملیۆن یۆرۆی خەرج كردوە بۆ ئەوەی بە خەونی بردنەوەی چامپیۆنس لیگ بگات ئەم وەرزە لەبەردەم هەلێكی مێژوویی دەبێت بۆ ئەوەی نازناوەكە بباتەوە، ئەمەش كاتێك لە تیروپشكەكە خۆی بەدوور گرت لە رووبەڕووبوونەوەی گەورەكان.

پاریسیەكان لە قۆناغی چارەكی كۆتایی رووبەڕووی ئەتەلانتا دەبنەوەو ئەگەر لەو یارییەش براوەبن ئەوا لە قۆناغی پێش كۆتایی بەرامبەر براوەی ئەتلەتیكۆ مەدرید و لایپزیگ دەبێتەوە.

ئەو یانەیەی لەنێوان ئەتلەتیكۆ مەدرید و پاریس سان جێرمان دەگەنە یاری كۆتایی كە ئەگەری ئەم 2 یانەیە زیاترە هیوایەكی گەورەیان دەبێت بۆ بردنەوەی نازناوەكە بەتایبەت كە لایەنەكەی تری یاری كۆتایی بەهۆی ئەنجامدانی یاری بەهێز لە ماوەیەكی كورت بە ماندووبونێكی زۆر دەگاتە یاری كۆتایی.

هێشتاش 4 یاری ماوە لە قۆناغی 16 بەڕێوەبچێت كە ئەو یارییانە لە یاریگای تیپەكان دەكرێت و دوای یەكلایی بوونەوە تیپی سەركەوتوو لایەنی براوە گەشت دەكات بۆ پرتوگال كە یارییەكانی قۆناغی كۆتایی لەو شارە بەڕێوەدەچێت.

دوای كۆتایی هاتنی تیروپشكی چامپیۆنس لیگ تیروپشكی یۆرۆپالیگ بەڕێوەچوو كە وابڕیارە یارییەكانی لە ئەڵمانیا بەڕێوەبچێت.

قۆناغی چارەكی كۆتایی
1-براوەی نێوان ڤۆڵفسبۆرگ و شاختار رووبەڕووی براوەی ئینتراخت فرانكفۆرت و بازل دەبێتەوە.

2-براوەی نێوان لاسك و مان یونایتد رووبەڕووی براوەی باشاكشیهر و كۆبنهاگن دەبێتەوە.

3-براوەی ئینتەر و خیتافی رووبەڕووی براوەی بایەر لیڤەركوزن و رینجەرز دەبێتەوە.

4-براوەی ئۆڵۆمپیاكۆس و ولڤەرهامبتۆن رووبەڕووی براوەی سیڤیا و رۆما دەبێتەوە.

قۆناغی پێش كۆتایی
براوەی یاری چوارەم و براوەی یاری دووەم رووبەڕووی براوەی یاری سێیەم و براوەی یاری یەكەم دەبێتەوە.

یارییەكانی قۆناغی كۆتایی یۆرۆپالیگ لە شارەكانی كۆلن و دۆیسبۆرگ و گیلسنكیرشن و دۆسلدۆرف بەڕێوەدەچن لەنێوان رۆژانی 1- بۆ 21ی ئاب.

لە یۆرۆپالیگ هیچ یارییەكی گەڕانەوەی قۆناغی 16 بەڕێوەنەچووە، بۆیە یارییەكانی گەڕانەوەی 6 یاری لە یاریگای یانەكان دەكرێت، هەردوو یاری ئینتەر بەرامبەر بە خیتافی و سیڤیا بەرامبەر بە رۆما یاری چونیش بەڕێوەنەچووە، بۆیە لە ئەڵمانیا رووبەڕووی یەكتر دەبنەوەو براوەیان دەگاتە قۆناغی چارەكی كۆتایی.

print

 149 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*