سەرەکی » راپۆرت » لاهور شێخ جه‌نگی هاوسه‌رۆكی یه‌كێتی: نابێت ته‌نها قسه ‌بكه‌ین، خه‌ڵك كردار ‌و چاكردنی ژیانی ده‌وێت

لاهور شێخ جه‌نگی هاوسه‌رۆكی یه‌كێتی: نابێت ته‌نها قسه ‌بكه‌ین، خه‌ڵك كردار ‌و چاكردنی ژیانی ده‌وێت

راپۆرتی: کوردستانی نوێ

لاهور شێخ جه‌نگی هاوسه‌رۆكی یه‌كێتیی نیشتمانیی كوردستان، له‌میانی سه‌ردانیدا بۆ شاری هه‌ولێر و زنجیره‌یه‌ك دیدارو كۆبوونه‌وه‌ی له‌گه‌ڵ كادران و جه‌ماوه‌رو كه‌سوكاری سه‌ربه‌رزی شه‌هیدان ‌و پێشمه‌رگه‌ دێرینه‌كان ‌و ئۆرگانه‌ جیاوازه‌كانی یه‌كێتیدا، رایگه‌یاند: سه‌ركردایه‌تیی نوێی یه‌كێتی، ده‌بێت بۆ له‌مه‌ودوا خزمه‌تكار بێت، سه‌ركردایه‌تیی ناو خه‌ڵك و كوچه‌ و كۆڵانه‌كان بێت.

ئیشوكاره‌كانمان به‌ كردار له‌ ته‌واوی ئۆرگانه‌كانماندا ده‌ستپێده‌كه‌ین
ئاماژه‌ی به‌وه‌شكرد كه‌ یه‌كێتیی نوێ، بڕیاریداوه‌ شێوازی سیاسه‌تكردنی خۆی له‌ هه‌رێمی كوردستان بگۆڕێ، ئه‌و شێوازه‌ ته‌قلیدییه‌ نه‌بێت كه‌ له‌ چه‌ند ساڵی رابردوودا كردوومانه‌، به‌ جۆرێك چه‌قی ململانێی سیاسیمان بهێنینه‌وه‌ هه‌ولێر، كه‌ حكومه‌ت و په‌رله‌مان و نوێنه‌رانی وڵاتان له‌ هه‌ولێرن، ده‌بێ چه‌قی ململانێی سیاسی له‌ هه‌ولێر‌و دهۆك و زاخۆ بێت، ناكرێ چیتر ئێمه‌ له‌ سلێمانی دانیشین چاوه‌ڕوانی ئه‌وه‌ بكه‌ین كادره‌كانمان و كه‌سوكاری شه‌هیده‌كانمان شه‌ڕه‌ سیاسییه‌كانمان بۆ بكه‌ن، نه‌خێر من لێره‌وه‌ به‌ڵێنتان پێده‌ده‌م كه‌ ئێمه‌ بڕیارمانداوه‌ به‌هێزه‌وه‌ بگه‌ڕێینه‌وه‌، به‌ پشتیوانیی ئێوه‌ و خه‌ڵكی هه‌ولێر بگه‌ڕێینه‌وه‌ هه‌ولێر، ململانێی سیاسی و مه‌ده‌نی خۆمان لێره‌ له‌ هه‌ولێر بكه‌ین، ئاماده‌ش نین نه‌ زاخۆ، نه‌ دهۆك، نه‌ هه‌ولێر چۆڵ بكه‌ین بۆ هیچ كه‌سێك، ئه‌وه‌ش به‌پشتیوانیی هه‌ڤاڵان و كادیران و جه‌ماوه‌رو كه‌سوكاری شه‌هیدان، زیندانیانی سیاسی و پێشمه‌رگه‌ دێرینه‌كان، كه‌مئه‌ندامانی سه‌نگه‌ر‌و ئه‌و دڵسۆزانه‌ی رۆژانێك به‌شداربوون له‌كاروانی خه‌باتی دوورو درێژو پڕ قوربانیی یه‌كێتیدا، وتیشی: بۆ له‌مه‌ودوا له‌هه‌موو شارو شارۆچكه‌كان كۆڕ و كۆبوونه‌وه‌كانمان ده‌كه‌ین، سیاسه‌ت و روئیای یه‌كێتی له‌ دوای كۆنگره‌ی چوار بۆ كادیره‌كان و دڵسۆزه‌كانی یه‌كێتی روونده‌كه‌ینه‌وه‌، له‌ ته‌واوی ئۆرگانه‌كانماندا ئیشوكاره‌كانمان به‌كردار ده‌ستپێده‌كه‌ین‌و ئامانجی سه‌ره‌كیشیمان خزمه‌تكردنی خه‌ڵكی كوردستانه‌، كه‌ به‌ پاڵپشتی ئێوه‌ش هاتووینه‌ته‌ سه‌ره‌وه‌‌و به‌رپرسیارێتیی ئه‌م قۆناغه‌ هه‌ستیاره‌ی یه‌كێتی-مان وه‌رگرتووه‌، واجبـی سه‌رشانمانه‌، یه‌كێتی هه‌نگاو به‌هه‌نگاو بكه‌ینه‌وه‌ به‌و یه‌كێتییه‌ی كه‌ ئێوه‌ و خه‌ڵكی كوردستان ئاواتی بۆ ده‌خوازن و هه‌موو ته‌مه‌نتان بۆ خزمه‌تكردنی ته‌رخانكرد.

ده‌بێت بگه‌ڕێینه‌وه‌ بۆ خانووه‌ قوڕه‌كان
هاوسه‌رۆكی یه‌كێتی، راشیگه‌یاند: هه‌قوایه‌ ئێمه‌ له‌ژێر چاودێریی وردی ئێوه‌دا بین، ئێوه‌ دڵسۆزترین كه‌سه‌كانی ناو یه‌كێتین ‌و رۆژێك لاتان نه‌دا له‌ڕێبازی پیرۆزی یه‌كێتییه‌كه‌تان ‌و كه‌مترین ئیمتیازتان وه‌رگرتووه‌ له‌ناو حزبه‌كه‌تاندا، بۆیه‌ من ئێوه‌ به‌دڵسۆزی یه‌كێتی ده‌زانم و داواده‌كه‌م چاودێرمان بن، هه‌ڵه‌كانمان دیاری بكه‌ن، وامانلێبكه‌ن خزمه‌تكاری میلله‌ته‌كه‌مان بین، وه‌ك ئه‌وه‌ی یه‌كێتی فێری كردووین، وته‌كانی مام جه‌لال كه‌ «ده‌یوت بگه‌ڕێینه‌وه‌ بۆ خانووه‌ قوڕه‌كان»، به‌ كردار ئێمه‌ ده‌بێت بگه‌ڕێینه‌وه‌ بۆ خانووه‌ قوڕه‌كان، پێویسته‌ له‌ كوچه‌ ‌و كۆڵانه‌كان بین، سه‌ردانی ماڵه‌ شه‌هید‌و پێشمه‌رگه‌ی دێرین بكه‌ین، سه‌ردانی لادێكان بكه‌ین، ئه‌وانه‌ی كه‌ رۆژێك له‌ رۆژان نانمان نه‌بوو بیخۆین، ئه‌وان نان ‌و ئاویان ده‌داینێ، ده‌بێت ئه‌وانه‌مان له‌بیرنه‌چێت، ئه‌گه‌ر ئینسان رابردووی خۆی له‌بیركرد، قه‌ت بۆ داهاتوو ناتوانێت سه‌ركه‌وتووبێت.

هه‌مووان به‌جددی كاربكه‌ن بۆ چاره‌سه‌ركردنی ناكۆكی‌و كێشه‌كان
له‌باره‌ی دۆخی ئێستای كوردستانیشه‌وه‌، وتی: ئه‌وه‌ی ئێستا له‌هه‌رێمی كوردستان ده‌گوزه‌رێت، به‌گشتی هاووڵاتیانی بێزاركردووه‌، به‌شێكی بێزارییه‌كه‌ش ناكۆكی و ململانێی نێوان حزبه‌كانه‌، بۆیه‌ ده‌بێت هه‌موو حزبه‌كان به‌جددی كاربكه‌ن بۆ چاره‌سه‌ركردنی ناكۆكی‌و كێشه‌كان، نابێت ته‌نها قسه‌ بكه‌ین، خه‌ڵك كردار‌و چاككردنی ژیانی ده‌وێت، ده‌یه‌وێت باری گرانی ژیان و سه‌رشانی نه‌مێنێت، ئاشكراشه‌ هه‌ر كه‌موكورتییه‌ك هه‌بێ له‌حكومه‌تدا، خه‌ڵك یه‌خه‌ی یه‌كێتیش ده‌گرێ، به‌ڵام ئایا یه‌كێتی به‌ كردار به‌شدارین له‌م حكومه‌ته‌دا، من پێموانییه‌ به‌ راستی‌و به‌كردار به‌شداربین، ئه‌وه‌ی ده‌یبینین‌و ده‌بینرێت، حوكمدارییه‌كی عادل نییه‌، ده‌سه‌ڵاته‌كان قۆرخكراون، بڕیاری تاكلایه‌نه‌ ده‌درێت، بۆیه‌ نابێت چیتر یه‌كێتی قبوڵی بكات، ئه‌مه‌ مانای ئه‌وه‌ نییه‌ ئێمه‌ شه‌ڕی براكوژیمان ده‌وێت، نه‌فره‌ت له‌ شه‌ڕی براكوژی، به‌ڵام خۆ ده‌بێت هه‌ڵوێستی سیاسیمان دیاربێت، ده‌بێت به‌شته‌ خراپه‌كان بڵێین نه‌خێر، ئه‌گه‌ر ئێمه‌ به‌ئابووریی سه‌ربه‌خۆمان بوتایه‌ نه‌خێر مه‌یكه‌ن، ئه‌و نه‌وته‌ ده‌رمه‌هێنن، له‌ به‌غداوه‌ 17 %مان بۆ دێت، ئه‌گه‌ر ئه‌و كاته‌ بمانوتایه‌ نا، ئه‌وا ئێستا تووشی ئه‌و هه‌موو كێشه‌‌و بێ مووچه‌ییه‌ نه‌ده‌بووین. ئه‌گه‌ر به‌ ریفراندۆممان بوتایه‌ كاتی نییه‌ ئێستا، ئه‌وا 50 %ی خاكی كوردستانمان له‌ده‌ستنه‌ده‌دا، ئێستا باجه‌كه‌ی كه‌ركوك ‌و خانه‌قین ‌و شه‌نگالییه‌كان ده‌یده‌ن، وه‌ك یه‌كێتی له‌گه‌ڵ ریفراندۆمداین، ئه‌وه‌ دروشمی یه‌كێتیی نیشتمانیی كوردستانه‌، هیچ كه‌سێك پێش یه‌كێتی ئه‌م دروشمه‌ی به‌رزنه‌كردۆته‌وه‌ كه‌ ئێمه‌ سه‌ربه‌خۆبین، به‌ڵام ئه‌و كاته‌ گونجاو نه‌بوو. بۆیه‌ له‌مه‌ودوا چیتر ئێمه‌ سه‌رناله‌قێنین بۆ هه‌موو بڕیاره‌كان، بڕیارێك خراپ بوو ده‌ڵێین خراپه‌و له‌گه‌ڵیدا نابین‌و ده‌نگی له‌سه‌ر هه‌ڵده‌بڕین، شتێك باش بوو ئه‌گه‌ر پارتیش كردبێتی ده‌ستخۆشی لێده‌كه‌ین‌و هانیان ده‌ده‌ین به‌رده‌وامبن. وتیشی: ئێمه‌ به‌ ته‌ما نین پارتی له‌ناوبه‌رین، پارتی به‌ ئێمه‌ له‌ناوناچێت و نیازیشمان نییه‌، پارتیش ناتوانێت یه‌كێتی له‌ناوبه‌رێت، ئێمه‌ ده‌توانین ئه‌م وڵاته‌ پێكه‌وه‌ به‌ڕێوه‌به‌رین، به‌ڵام هیچ كاتێك شاگردیمان قبوڵ نییه‌، ئه‌گه‌ر به‌ كردار له‌كاتی كێشه‌كاندا به‌رپرسیارێتیی گه‌وره‌ ده‌كه‌وێته‌ سه‌رشانی یه‌كێتی، وه‌ك یه‌كێتی ده‌مانه‌وێت رۆڵمان هه‌بێت له‌حوكمڕانی هه‌رێمه‌كه‌ماندا، ناكرێ به‌س سه‌ربله‌قێنین بۆ ئیشوكاره‌كان، به‌پێچه‌وانه‌وه‌ ده‌بێ رۆڵمان هه‌بێت، یه‌كێتی سه‌نگی هه‌یه‌، یه‌كێتی خاوه‌نی ئه‌م ئه‌زموونه‌یه‌، ئاشكرایه‌‌و دڵنیاشم حوكمڕانی له‌م وڵاته‌دا به‌بێ یه‌كێتیی نیشتمانیی كوردستان ناكرێت. وه‌ك یه‌كێتی له‌گه‌ڵ چاكسازیداین، به‌ڵام ده‌بێت چاكسازیی له‌ كایه‌ گه‌وره‌كاندا بكرێت، له‌ بۆرییه‌ نه‌وته‌كانه‌وه‌، له‌ نه‌وتی عه‌ینزاله‌و له‌سنووره‌كانه‌وه‌ ده‌ستپێبكرێت، چاكسازی له‌ڕێكه‌وتنی هه‌رێم‌و توركیا بكرێت، كه‌ رێكه‌وتنی 50 ساڵه‌یە.

فرسه‌تی زێڕین له‌به‌رده‌مدایه‌
له‌درێژه‌ی قسه‌كانیدا، لاهور شێخ جه‌نگی، ئاماژه‌ی به‌ نوێبوونه‌وه‌و قۆناغه‌كانی جێبه‌جێكردنی كردو باسی له‌وه‌كرد كه‌ یه‌كێتی نوێ، بۆ ئه‌م قۆناغی نوێبوونه‌وه‌یه‌ش ته‌نها پشت به‌كادیره‌ دڵسۆزه‌كانی به‌ستووه‌، دیاره‌ به‌رپرسیارێتییه‌كه‌ زۆر قورسه‌، یه‌كێتی وا به‌ئاسانی نوێ نابێته‌وه‌، به‌ مانگێك ‌و دوو مانگ یه‌كێتی ناخرێته‌وه‌ سه‌ر شاڕێی راسته‌قینه‌ی خۆی، به‌ڵام دڵنیابن به‌ئیراده‌ی به‌هێزه‌وه‌، كه‌ من ئه‌و ئیراده‌ به‌رزه‌ ده‌بینم، فرسه‌تێكی زێڕین هه‌یه‌ بۆ یه‌كێتی، ئه‌گه‌ر ئیراده‌مان هه‌بێت‌و یه‌كگرتووبین، واز له‌ ته‌كه‌تولات ‌و خۆخۆری بێنین، ده‌ست له‌ناوده‌ست بین، ده‌توانین سه‌ركه‌وتووبین و له‌كۆنگره‌ی داهاتوودا رووسپیی به‌رده‌می كه‌سوكاری شه‌هیده‌كانمان ده‌بین.

خزمه‌تكردنی خه‌ڵك
سه‌باره‌ت به‌ سیستمی لامه‌ركه‌زیی ئیداریی‌و دارایی، هاوسه‌رۆكی یه‌كێتی، ئه‌و راستییه‌ی خسته‌ڕوو كه‌ داوای لامه‌كه‌زیی ئیداریی ‌و دارایی كراوه‌ بۆ هه‌رێمی كوردستان، بۆ ئه‌وه‌یه‌ ده‌سه‌ڵاته‌كان شۆڕببێته‌وه‌، بۆ ئه‌وه‌یه‌ ئیشوكاره‌كان باشتر به‌ڕێوه‌ببرێن و به‌شێكی كێشه‌كان چاره‌سه‌ربكرێن، ئه‌وه‌ بۆ سلێمانی، بۆ دهۆك ‌و زاخۆو بۆ هه‌موو شوێنه‌كانه‌، كه‌ ئه‌م باسه‌ لێكدانه‌وه‌ی خراپی بۆ كراوه‌، ئێمه‌ نه‌مانوتووه‌ دووئیداره‌یی دروستده‌كه‌ین، وه‌ك ده‌بینن ئێمه‌ ئێستا له‌هه‌ولێرین هاتووین په‌یامی ئه‌وه‌تان پێبده‌ین كه‌ ئێمه‌ دێینه‌وه‌ هه‌ولێر، كۆشكه‌ سپییه‌كه‌مان كه‌ به‌ بڕیاری سه‌رۆك مام جه‌لال دروستكرا، ده‌یكه‌ینه‌ سه‌نته‌ری بڕیاردانی یه‌كێتی، لێره‌وه‌ سیاسه‌ت ده‌كه‌ین، ده‌چینه‌وه‌ دهۆك ‌و زاخۆ له‌وێوه‌ سیاسه‌ت ده‌كه‌ین، چیتر ئێمه‌ ئه‌ندام كه‌رت و كادیره‌كانمان روبه‌ڕوی ئه‌و دژایه‌تیانه‌ ناكه‌ینه‌وه‌ كه‌ به‌رامبه‌ر یه‌كێتی ده‌كرێت، به‌پێچه‌وانه‌وه‌ خۆمان له‌ گۆڕه‌پانه‌كه‌دا ده‌بین ‌و ئه‌ركه‌كان ده‌خه‌ینه‌ سه‌رشانی خۆمان، ئێمه‌ له‌پێناوی خزمه‌تكردنی خه‌ڵكدا دروستبووین، زیاتر له‌ 20 هه‌زار له‌ پێشمه‌رگه‌و هه‌ڤاڵه‌كانمان شه‌هیدبوون، بۆیه‌ ئێمه‌ش درێژه‌پێده‌ری رێگاو رێبازه‌كه‌یان ده‌بین‌و سیاسه‌تی رابردوومان ده‌گۆڕین به‌و سیاسه‌ته‌ی میلله‌ته‌كه‌مان‌و هه‌ڤاڵ‌و كادیره‌كانمان ده‌یانه‌وێت‌و ئومێدیان له‌سه‌ر هه‌ڵچنیوه‌.

print

 267 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*