سەرەکی » دۆسێ » عه‌بدولكه‌ریم عومه‌ر:ئه‌مریكا نوێنه‌رایه‌تی له‌ رۆژئاوا هه‌یه ‌و كۆبوونه‌وه‌ی‌ مانگانه‌مان هه‌یه‌

خاكی ره‌ش

عه‌بدولكه‌ریم عومه‌ر:ئه‌مریكا نوێنه‌رایه‌تی له‌ رۆژئاوا هه‌یه ‌و كۆبوونه‌وه‌ی‌ مانگانه‌مان هه‌یه‌

سه‌رتیپ جه‌وهه‌ر

خاكی ره‌ش – به‌شی 15

به‌یانی رۆژی شه‌شه‌م زوو له‌خه‌و رابووم، چه‌ند مه‌وعیدێكی به‌یانیم دانابوو تاوه‌كو بتوانم به‌خێرایی ته‌واویان بكه‌م، ئه‌وان پێیان گوتبووم دوای 12ی نیوه‌ڕۆ په‌یوه‌ندیت پێوه‌ده‌كه‌ین له‌هه‌ر كوێیه‌ك بیت دێین به‌دوات و ده‌تگه‌یه‌نینه‌ لای مه‌زلوم عه‌بدێ‌ فه‌رمانده‌ی‌ هێزه‌كانی سوریای‌ دیموكرات.

به‌یانیی زوو نانێكی كه‌مێك خێرام خوارد، مه‌وعیدم له‌گه‌ڵ ته‌لعه‌ت یونس هاوسه‌رۆكی رێڤه‌به‌ری‌ خۆسه‌ری‌ جه‌زیره‌ له‌عامودا هه‌بوو، دواتر مه‌وعیدم له‌گه‌ڵ عه‌بدولكه‌ریم عومه‌ر هاوسه‌رۆكی فه‌رمانگه‌ی‌ په‌یوه‌ندییه‌كانی رێڤه‌به‌ری‌ خۆسه‌ر هه‌بوو.

شۆفێره‌كه‌ هات به‌دوام و پێمگوت به‌خێرایی بمگه‌ینه‌ عامودا. چونكه‌ ده‌مزانی دوو مه‌وعید تا نیوه‌ڕۆ پێویستی به‌ده‌ستوبردكردن هه‌یه‌، ئه‌گینا كێشه‌م بۆ دروستده‌بێت. نه‌خاسمه‌ مه‌وعیدی دوای نیوه‌ڕۆم زۆر گرنگ بوو هه‌ركات په‌یوه‌ندیان كردبا ده‌بوو ده‌ستبه‌رداری هه‌موو ئیشوكارێك بم.

به‌ره‌و عامودا به‌ڕێكه‌وتین، ده‌بوو سه‌عات 10 به‌یانی له‌وێ‌ بم. رێگا زۆر قه‌ره‌بالغ و ئێمه‌ش زۆر په‌له‌مان بوو. باره‌گای سه‌ره‌كی حكومه‌تی جه‌زیره‌ یان كانتۆنی جزیرێ‌ (جه‌زیره‌) له‌وێیه‌. واته‌ رێڤه‌به‌ری‌ قامیشلۆرو ده‌وربه‌ر، كه‌ به‌دڵی رێڤه‌به‌ری‌ رۆژئاوای كوردستان داده‌نرێت.

كه‌چوومه‌ رێڤه‌به‌ری‌ خۆسه‌ر، ته‌لعه‌ت یونس و نه‌زیره‌ گه‌ورییه‌، هاوسه‌رۆكانی ئه‌نجومه‌نی جێبه‌جێكردنی رێڤه‌به‌ری‌ خۆسه‌ر چاوه‌ڕێیان ده‌كردم. به‌خێرهاتنی گه‌رمیان كردم و به‌یه‌كه‌وه‌ نزیكه‌ی‌ كاتژمێرێك دانیشتین و گفتوگۆی كراوه‌مان له‌باره‌ی‌ ره‌وشی رۆژئاوای كوردستان و بارودۆخی ئابوریی و چاره‌نوسی ناوچه‌كه‌و كێشه‌و گرفته‌كانی به‌رده‌میان كرد. گه‌ورییه‌ كه‌ هاوسه‌رۆكی ته‌ڵعه‌ت یونس-ه‌، ئاسورییه‌و نزیكه‌ له‌په‌یه‌ده‌ و ئه‌وه‌ دوو خولی رێڤه‌به‌رییه‌ هاوسه‌رۆكه‌.

كاتێك له‌سه‌ره‌تای 2016 سه‌ردانی رۆژئاوای كوردستانم كرد، رێڤه‌به‌ری‌ خۆسه‌ر به‌ناوی رێڤه‌به‌ری‌ خۆسه‌ر/ رۆژئاوا بوو، له‌ 3 كانتۆنی جیاواز (جزیره‌، كۆبانی، عه‌فرین) پێكده‌هات. ئه‌مجاره‌ كه‌ چووم بارودۆخ زۆر گۆڕابوو، به‌تایبه‌ت دوای رزگاركردنی ته‌واوی ناوچه‌كانی به‌ری خۆرهه‌ڵاتی فورات و شاره‌كانی باشوری سوریا. ئێستا رێڤه‌به‌ری‌ خۆسه‌ر ناوه‌كه‌ی‌ كراوه‌ به‌ رێڤه‌به‌ری‌ باكوری رۆژهه‌ڵاتی فورات و له‌ 7 رێڤه‌به‌ری‌ جیاواز پێكدێت كه‌ ئه‌مانه‌ن:
(1- جزیره‌ كه‌ كۆنترین رێڤه‌به‌ری‌ خۆبه‌ڕێوبه‌ره‌. 2- عه‌فرین 3-فورات 4- دێره‌زۆر 5- مه‌نبه‌ج 6-ته‌بقه‌ 7- ره‌ققه‌)
دۆخی ئابووریی ناوچه‌كانی باكوری رۆژهه‌ڵاتی فورات په‌رێشانه‌، به‌شێوه‌یه‌كی گشتیی پشت به‌ گومرگ و نه‌وت و باج و داهاتی ناوخۆ ده‌به‌ستن. به‌قسه‌ی‌ ته‌ڵعه‌ت یونس بۆ ساڵی 2019 خه‌رجی رێڤه‌به‌ری‌ جزیره‌ گه‌یشتۆته‌ 90 ملیار لیره‌ی سوریا كه‌ ئه‌وكاته‌ ده‌یكرد 90 ملیۆن دۆلار. دانیشتوانی جزیره‌ ده‌گاته‌ نزیكه‌ی‌ 500 هه‌زار كه‌س و 200 بۆ 300 هه‌زار ئاواره‌شی لێ‌ ده‌ژیت به‌پێی‌ بارودۆخ ده‌گۆڕێت.

ئه‌و وتی ئێمه‌ له‌رووی داراییه‌وه‌ بارودۆخمان باش نییه‌، به‌ڵام هه‌وڵده‌ده‌ین خزمه‌تگوزاریی پێشكه‌ش بكه‌ین، وتیشی نزكه‌ی‌ 45 هه‌زار كارمه‌ند و كرێكاری‌ جیاوازمان هه‌یه‌، هه‌یه‌ جێگیركراوه‌و هه‌شه‌ گرێبه‌ستی بۆكراوه‌و كاتییه‌.

له‌باره‌ی‌ خزمه‌تگوزارییه‌كان رونیكرده‌وه‌ كه‌ هه‌وڵیانداوه‌ پرۆژه‌ جێبه‌جێبكه‌ن، به‌ڵام بارودۆخی ئابووریی زۆر هاوكاریان نییه‌، باسی له‌وه‌كرد كه‌ یه‌كێك له‌گرفته‌كانیان هێنانی ئامێر و كه‌لوپه‌ل و پێداویستییه‌ له‌ده‌ره‌وه‌ی‌ رۆژئاوای كوردستان به‌تایبه‌ت له‌ڕێی‌ هه‌رێمی كوردستانه‌وه‌، نمونه‌ی‌ هێنانی ئامێری ئاگركوژێنه‌وه‌ی‌ هێنایه‌وه‌ كه‌ پێشتر كڕیویانه‌، به‌ڵام له‌سنوری‌ هه‌رێمی كوردستان رێگریان لێكردووه‌.

سه‌رباری‌ نه‌بوونی په‌یوه‌ندی ره‌سمیی نێوان رێڤه‌به‌ری‌ خۆسه‌رو حكومه‌تی دیمه‌شق، به‌ڵام هه‌ندێك هه‌ماهه‌نگی په‌یوه‌ندیدار به‌كاروباری‌ هاتوچۆی بازرگانیی و كاره‌باو ئاو هه‌یه‌. لێپرسراوانی رێڤه‌به‌ری‌ ده‌ڵێن ئێمه‌ ده‌مانه‌وێ‌ په‌یوه‌ندیمان هه‌بێت به‌تایبه‌ت ئه‌وه‌ی‌ په‌یوه‌ندی به‌كاروباری‌ هاوڵاتیانه‌وه‌ هه‌یه‌، به‌ڵام دیمه‌شق ئه‌و په‌یوه‌ندییه‌ ره‌تده‌كاته‌وه‌ دان به‌رێڤه‌به‌ری‌ خۆسه‌ردا نانێت.

پێشتر ژماره‌یه‌كی زۆری رێكخراوی مرۆیی روویان له‌رۆژئاوای كوردستان ده‌كرد، به‌ڵام دوای‌ رووداوه‌كانی ئۆكتۆبه‌ری‌ 2019 ژماره‌یه‌كی زۆر له‌و رێكخراوانه‌ به‌هۆی تێكچوونی دۆخی ئه‌منیه‌وه‌ رۆژئاوای كوردستانیان جێهێشت. ته‌ڵعه‌ت یونس رونیكرده‌وه‌ كه‌ ئه‌وان پێویستیان به‌هاوكاریی رێكخراوه‌ مرۆییه‌كان هه‌یه‌ به‌تایبه‌ت بۆ هاوكاریكردنی ئاواره‌كانی ناوخۆ و هه‌روه‌ها پرسی كه‌مپی هۆل كه‌ ده‌یان هه‌زار له‌ كه‌سوكارو خێزانی داعشی لێ گلدراوه‌ته‌وه‌. له‌باره‌ی‌ چاره‌سه‌ری‌ ئه‌و كامپه‌ ئه‌ویش هه‌مان بۆچوونی هه‌بوو كه‌ ئه‌و كامپه‌ به‌ڵایه‌كی زۆر گه‌وره‌یه‌ بۆ رۆژئاوای كوردستان و ناوچه‌كه‌و رونیكرده‌وه‌ كه‌ تائێستا ئاسۆی چاره‌سه‌ركردنی دیار نییه‌ ته‌نها وتی ئه‌و ژن و منداڵانه‌ی‌ كه‌ خه‌ڵكی سوریان تائێستا ژماره‌یه‌كیان راده‌ستی كه‌سوكار و عه‌شیره‌ته‌كانیان كراوه‌ته‌وه‌ دوای وه‌رگرتنی گره‌نتی و دڵنیایی لێیان.

وتی؛ ئه‌وانه‌ی‌ ئازاد ده‌كرێن و راده‌ستی كه‌سوكاره‌كانیان ده‌كرێن، ده‌بێ‌ سه‌رۆك هۆز یان كه‌سایه‌تی دیاری‌ ناوچه‌كان گره‌نتیان بكه‌ن و رونیكرده‌وه‌ كه‌ تائێستا 7 ده‌سته‌ یان كۆمه‌ڵه‌ ئازاد كراون هه‌ر كۆمه‌ڵه‌یه‌ك له‌نێوان 100 بۆ 170 كه‌س بوون.

ته‌ڵعه‌ت یونس نیگه‌ران بوو له‌په‌یوه‌ندی رێڤه‌به‌ری‌ خۆسه‌ر له‌گه‌ڵ هه‌رێمی كوردستان و به‌روونی وتی له‌ ئاستی پێویست نییه‌ و باش بوون و خراپبونی په‌یوه‌ندی به‌ دۆخی سیاسی و هه‌رێمایه‌تییه‌وه‌ هه‌یه‌و له‌گه‌ڵ خراپبوونی راسته‌وخۆ كاریگه‌ری‌ له‌سه‌ر هاتن و چوونی بازرگانی سنور دروستده‌كات.

من هه‌وڵمده‌دا زوو كاروباره‌كان ته‌واوبكه‌م و بگه‌ڕیمه‌وه‌ عامودا، چونكه‌ مه‌وعیدێكم هه‌بوو له‌گه‌ڵ عه‌بدولكه‌ریم عومه‌ر لێپرسراوی په‌یوه‌ندییه‌كانی رێڤه‌به‌ریی، به‌په‌له‌ به‌ره‌و عامودا گه‌ڕاینه‌وه‌. چانسمان هه‌بوو رێگا چۆڵ بوو ئۆتۆمبێل و هاتن و چوونی زۆری له‌سه‌ر نه‌بوو.

بۆ سه‌عات 11 گه‌یشتینه‌وه‌ قامیشلۆ و به‌ره‌و په‌یوه‌ندییه‌كانی رێڤه‌به‌ری‌ به‌ڕێككه‌وتین و به‌پێی‌ خشته‌ی‌ مه‌وعیده‌كه‌مان گه‌یشتینه‌ شوێنی مه‌به‌ست. عه‌بدولكه‌ریم عومه‌ر كه‌ پیاوێكی زۆرزانی سوركه‌ڵه‌ی‌ چاوشینی باڵا به‌رزه‌ چاوڕێی‌ ده‌كردین.

دانیشتین خێرا قاوه‌و چای ئاماده‌بوو، ژوره‌كه‌یشی كه‌مێك گه‌رم بوو له‌سه‌رمای‌ ئه‌و رۆژه‌ گفتوگۆكانی گه‌رمتر كردبووین، خۆشی شاره‌زای باشوری كوردستان بوو پێویست نه‌بوو هه‌ندێ جار شه‌رحی دۆخی خۆمانی بۆ بكه‌م.

عه‌بدولكه‌ریم عومه‌ر باسی له‌په‌یوه‌ندییه‌كانی رۆژئاوای كوردستان یان رێڤه‌به‌ری‌ باكوری خۆرهه‌ڵاتی فوراتی بۆ كردم و وتی ئێمه‌ مامه‌ڵه‌ له‌سه‌ر ئاستی به‌رز له‌گه‌ڵ ژماره‌یه‌ك وڵات و شوێن ده‌كه‌ین، نوسینگه‌مان هه‌یه‌ له‌هه‌ریه‌كه‌ له‌ (سلێمانی، مۆسكۆ، ستۆكهۆلم، پاریس، به‌لجیكا، هۆلندا، لۆكسۆمبۆرگ، به‌رلین) له‌ ئه‌مریكاش له‌ واشنتۆن نوسینگه‌ی‌ ئه‌نجومه‌نی سوریای دیموكرات هه‌یه‌.

رونیكرده‌وه‌ كه‌ له‌ڕێی‌ نوسینگه‌كان په‌یوه‌ندی ئاشكراو مامه‌ڵه‌كردنیان له‌گه‌ڵ وه‌زاره‌تی ده‌ره‌وه‌ی‌ ئه‌و وڵاتانه‌ هه‌یه‌، هه‌روه‌ك هه‌ندێ وڵات هه‌یه‌ كه‌ نوسینگه‌یان لێ‌ نییه‌، به‌ڵام مامه‌ڵه‌یان له‌گه‌ڵ ده‌كه‌ن وه‌ك عیراق.

ئه‌و رونیكرده‌وه‌ كه‌ ئه‌و نوسینگانه‌ كونسڵخانه‌ی‌ رۆژئاوا نین به‌ڵكو له‌ژێر ناونیشانی رێكخراوی مه‌ده‌نی و پرۆژه‌ی‌ رێكخراو له‌و وڵاتانه‌ ده‌كرێنه‌وه‌، به‌ڵام رۆڵی په‌یوه‌ندی سیاسی ده‌گێڕن و ئیشوكاره‌ سیاسیه‌كان ده‌كه‌ن. وتی به‌پێی‌ قانوونی نێوده‌وڵه‌تی نوسینگه‌ن نه‌ك كونسڵخانه‌. بۆ كردنه‌وه‌ی‌ نوسینگه‌كانیش ره‌زامه‌ندی وه‌زاره‌تی ده‌ره‌وه‌ی‌ ئه‌و وڵاتانه‌ وه‌رده‌گرن و ئه‌و وڵاتانه‌ش له‌ڕێی‌ ئه‌و نوسینگانه‌ په‌یوه‌ندی به‌ رۆژئاوای كوردستان ده‌كه‌ن.

من پرسیارمكرد بۆچی نوسینگه‌یان له‌سلێمانی هه‌یه‌، به‌ڵام له‌ هه‌ولێر نیانه‌ له‌كاتێكدا هه‌ولێر پایته‌ختی هه‌رێمی كوردستانه‌؟ به‌ پێكه‌نینه‌وه‌ وتی خۆت ده‌زانی، پێموانیه‌ پێویست بكات وڵام بده‌مه‌وه‌، وتی نامه‌وێ‌ قسه‌یه‌ك بكه‌م كاریگه‌ری‌ له‌سه‌ر په‌یوه‌ندیمان له‌گه‌ڵ هه‌ولێر دروستبكات. وتیشی په‌یوه‌ندیمان گه‌رم نییه‌، به‌ڵام ئاساییه‌ له‌گه‌ڵ هه‌ولێر. به‌پێكه‌نینه‌وه‌ وتی ماوه‌ی‌ چوارساڵه‌ به‌رێگای نارێك و قاچاخ نه‌چوینه‌ته‌ سلێمانی مه‌به‌ستی ئه‌وه‌بوو كه‌ رێگای هاتن و چونیان به‌هه‌ولێردا به‌ره‌و سلێمانی هه‌بووه‌، هه‌روه‌ك رونیكرده‌وه‌ كه‌ پێشتر به‌ده‌ردو ناخۆشیه‌كی زۆره‌وه‌ ده‌چونه‌ سلێمانی بۆ ئه‌وه‌ی‌ بگه‌نه‌ جیهان بۆ په‌ره‌پێدانی په‌یوه‌ندی دیبلۆماتی. ئه‌و رونیكرده‌وه‌ كه‌ ماوه‌یه‌ك له‌ڕێی‌ ئه‌مریكییه‌كانه‌وه‌ هاتوچۆیان كردووه‌، به‌ڵام ئه‌ویش گرفتی خۆی هه‌بووه‌! وتی؛ بۆ نمونه‌ جار هه‌بووه‌ 20 رۆژ چاوه‌ڕێمان كردووه‌ تاوه‌كو فرۆكه‌یه‌ك له‌سلێمانیه‌وه‌ دێته‌ رۆژئاوا بۆ گه‌ڕانه‌وه‌، به‌ڵام ئێستا په‌یوه‌ندیمان له‌گه‌ڵ هه‌ولێر باشتره‌و هاتن و چوونمان به‌وێدا هه‌یه‌.

باسی له‌ سه‌فه‌ر و هاتن و چوون و په‌یوه‌ندییه‌كان كرد كه‌ له‌ڕێی‌ فرۆكه‌خانه‌كانی باشوری هه‌رێمی كوردستانه‌و وتی جاران ته‌نها له‌ڕێی‌ سلێمانی بوو، به‌ڵام ئێستا له‌ڕێی هه‌ردوو فرۆكه‌خانه‌ی‌ هه‌ولێر و سلێمانییه‌و هه‌ندێجاریش له‌ڕێی‌ به‌یروته‌وه‌یه‌.

ئه‌و باسی له‌وه‌كرد كه‌ ئه‌و دۆخه‌ی‌ له‌رۆژئاوا هه‌یه‌ به‌تایبه‌ت به‌یه‌كه‌وه‌ ژیانی پێكهاته‌كان و داكۆكیكردن له‌مانه‌وه‌یان و دژایه‌تی و شه‌ڕكردن له‌به‌رامبه‌ر تیرۆرستان كاریگه‌ری‌ ئه‌رێنی له‌سه‌ر تێگه‌یشتنی وڵاتان هه‌بووه‌ به‌رامبه‌ر ئه‌زموونی رۆژئاوای كوردستان.

له‌باره‌ی‌ په‌یوه‌ندییه‌كانیان له‌گه‌ڵ وڵاتان و راگرتنی هاوسه‌نگی و چۆنییه‌تی مامه‌ڵه‌كردن له‌گه‌ڵیان، عه‌بدولكه‌ریم عومه‌ر رونیكرده‌وه‌ كه‌ ئه‌وان ده‌زانن په‌یوه‌ندیی نێوان وڵاتان و هاوسه‌نگی نێوانیان چۆنه‌، بۆیه‌ به‌پێی‌ به‌رژه‌وه‌ندی رۆژئاوای كوردستان و پێویستی قۆناغه‌كه‌ مامه‌ڵه‌ له‌گه‌ڵ وڵاتان ده‌كه‌ن. ئه‌و نمونه‌ی‌ به‌په‌یوه‌ندییه‌كانیان له‌گه‌ڵ روسیا هێنایه‌وه‌و وتی سه‌رباری‌ ئه‌و گه‌له‌كۆمه‌كێ و فرۆشتنی عه‌فرین و ناوچه‌كانی دیكه‌ له‌لایه‌ن وڵاتانی زلهێز له‌نێوانیاندا روسیا، به‌ڵام په‌یوه‌ندیمان نه‌بڕی له‌گه‌ڵ ئه‌و وڵاته‌، چونكه‌ پێمانوایه‌ بارودۆخی ناوخۆی سوریا به‌بێ‌ چاره‌سه‌ری‌ سیاسی ئه‌نجامی نابێت، به‌بێ‌ به‌شداری‌ روسیاش ئه‌سته‌مه‌ گرفته‌كانی ناوخۆی سوریا یه‌كلایی ببێته‌وه‌.

هاوسه‌رۆكی فه‌رمانگه‌ی‌ په‌یوه‌ندییه‌كانی رۆژئاوای كوردستان بۆچوونی به‌رامبه‌ر ئه‌مریكیه‌كان باش نه‌بوو، وتی له‌وانه‌یه‌ سبه‌ی‌ دووسبه‌ی‌ ئه‌مریكیه‌كان لێره‌ بڕۆن چونكه‌ هیچ ستراتیژییه‌ت و به‌رنامه‌یان دیار نییه‌ نه‌ك بۆ رۆژئاوای كوردستان به‌ڵكو بۆ سوریاش نیانه‌، به‌ڵام روسه‌كان ده‌مێننه‌وه‌ بۆیه‌ پێویسته‌ په‌یوه‌ندییه‌كانمان درێژه‌ پێبده‌ین.

سه‌باره‌ت به‌په‌یوه‌ندییه‌كانیان له‌گه‌ڵ ئه‌مریكییه‌كان رونیكرده‌وه‌ كه‌ نوێنه‌رایه‌تی ئه‌مریكا له‌ رۆژئاوای كوردستان هه‌یه‌و چاوپێكه‌وتن و دیداری به‌رده‌وام و مانگانه‌یان هه‌یه‌، وتی په‌یوه‌ندی هاوشێوه‌ی ئه‌مریكامان له‌گه‌ڵ وڵاتێكی ئه‌وروپادا هه‌یه‌، له‌ئێستادا ناكرێت باسی ئه‌و وڵاته‌و په‌یوه‌ندییه‌كانمان بكه‌ین، به‌ڵام زۆر هاوكارمانن و پشتیان پێده‌به‌ستین.

دوای ته‌واوبونی دیداره‌كه‌م له‌گه‌ڵ عه‌بدولكه‌ریم عومه‌ر بووه‌ نیوه‌ڕۆ، په‌یوه‌ندیم به‌ عه‌بدوجه‌باری‌ هاوڕێمه‌وه‌ كرد كه‌ بێت به‌دوام و بچینه‌ شوێنێك بتوانین پاروه‌ نانێك بخۆین. ده‌مزانی ئه‌وم پێویست ده‌بێت بۆ دیداری‌ مه‌زلوم عه‌بدێ‌ فه‌رمانده‌ی‌ هێزه‌كانی سوریای‌ دیموكرات، نه‌وه‌كا پێویستییه‌كی له‌ناكاو بێته‌ پێشێ‌.

گه‌ڕامه‌وه‌ سه‌نته‌ری‌ قامیشلۆ و یه‌كترمان بینیه‌وه‌. له‌دوای 12 ی نیوه‌ڕۆ په‌یوه‌ندییه‌كی ته‌له‌فۆنیم بۆ هات كه‌ له‌شوێنێكی دیاریكراو ئاماده‌بم هه‌ركات ئۆتۆمبێلی تایبه‌ت گه‌یشته‌ قامیشلۆ ئه‌وا ئاماده‌بم و به‌ره‌و شوێنی مانه‌وه‌ی‌ فه‌رمانده‌ی‌ هێزه‌كانی سوریای‌ دیموكرات به‌ڕێكه‌وم به‌مه‌به‌ستی دیداری‌ تایبه‌ت و گفتوگۆ له‌باره‌ی‌ ره‌وشی رۆژئاواو سوریا به‌شێوه‌یه‌كی گشتیی.

print

 475 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*