سەرەکی » کەلتوور » دەستنووسەکانی ووردی کەوتە بەردەستی خوێنەرانی

دەستنووسەکانی ووردی کەوتە بەردەستی خوێنەرانی

لەدووتووێی 1112 لاپەڕەدا کتێبی (دەستنووسەکانی ووردی) نووسینی (رەهبەر سەید برایم) چاپ و بڵاوکرایەوەو کەوتە بەردەستی خوێنەرانی.

لە پێشەكی كتێبەكەدا دەربارەی ئەوەی ووردی کێیەو سروودی ئەی شەهیدان هی كێیە؟ هاتووە: مامۆستا محەمەد تۆفیق(وردی) شاعیر و ڕۆژنامەوان و فولكلۆرناسی كوردە، ناوی محەمەد كوڕی تۆفیقی قەسابی كوڕی رەشیدە فەندی كوڕی فەرهاد ئاغای دیاربەكرییە. رەشیدە فەندی باپیری ووردی ساڵی 1870 كارمەندێكی دەوڵەتی عوسمانی بووەو گوێزراوەتەوە بۆ شاری كۆیە و لەو شارە فەرمانبەری فەرمانگەی دارایی بووە.

ووردی ساڵی 1923 لەگەڕەكی بایزاغای شاری كۆیە لەدایكبووەو لە حەوت ساڵیدا خراوەتە بەر خوێندن. ساڵی 1941 چۆتە خانەی مامۆستایانی سەرەتایی لە ئەعزەمییە و 1944 خوێندن تەواو دەكات و دەبێتە مامۆستا لە قۆتابخانەی سەرەتایی لەشارۆچكەی تەقتەق. ووردی پیاوێكی تێكۆشەر و دڵسۆز و كوردپەروەر بووە و ئاشقی نیشتمان بووە و ئەمەش تووشی ژیانێكی پڕ لە نەگبەتی و دەردەسەر دەكات.

پایزی ساڵی 1942 لەگەڵ چەند تێكۆشەری كۆیی ڕێكخراوی «كۆمەڵەی دەنگ» دادەمەزرێنن و پەخشنامەیەكی دەستنووس بە ناوی «پێشكێش» دەردەكەن كە ئامانجیان خوێندن و ڕزگاری كورد و كوردستانە. لەسەر داوای كۆمەڵەی ژێكاف لە ساڵی 1945 كۆمەڵەی دەنگ مامۆستا محەمەد تۆفیق وردی بۆ بەشداری كردن لە كۆماری كوردستان لە مەهاباد دەستنیشان كرا و لە مەهاباد مامۆستا بووە و داوتریش لە كۆیە مامۆستای مام جەلال بووە.

مامۆستا ووردی 13وتارو شیعری لەڕۆژنامەی كوردستان لەسەردەمی كۆماری مەهاباد بڵاوكردۆتەوەو لە ڕۆژنامەی هاواری نیشتمان وتارێكی رەخنەیی و گلەیی و پڕ كەم و كورتی بە ناوی « چیمان دەوێ» بڵاوكردۆتەوە و بە فەرمانی محەمەد حسێن خان وەزیری جەنگ بەند كراوە و پێشەوا قازی محەمەد بەریداوە. بەڵام خاوەنی ڕای خۆی بووە و نەترساوە و كاریكردووە. پاش رووخانی كۆماری كوردستان دەگەڕێتەوە كۆیەو ساڵی 1947 سروودی لاوەكان و ئەی شەهیدان-ی بڵاوكردۆتەوەو سروودی ئەی شەهیدان شیعرو ئاوازی خۆیەتی.

print

 205 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*