سەرەکی » وتار » لەتیف فاتیح فەرەج‌ » ئازاد هه‌ورامی برینێك كه‌ ساڕێژ نابێتپەڕە 27

ئازاد هه‌ورامی برینێك كه‌ ساڕێژ نابێت

نامه‌یه‌كی شه‌هید ئازاد هه‌ورامیم بینی كه‌ بۆ دۆستێكی خۆی ناردبوو، له‌وێدا به‌ دوور و درێژی باسی ئه‌وه‌ ده‌كات كه‌ ئه‌و جۆره‌ مامه‌ڵه‌یه‌ی له‌گه‌ڵ مه‌لا به‌ختیار و هاوڕێكانیدا كراوه‌، مامه‌ڵه‌یه‌كی نا دیموكراسی و ناجۆره‌، له‌وێدا جیاوازیی بیركردنه‌وه‌ی ئازاد هه‌ورامیت له‌گه‌ڵ به‌شێكی زۆر له‌وانی تردا بۆ ده‌رده‌كه‌وێت سه‌باره‌ت به‌ كێشه‌ ناوخۆییه‌كانی كۆمه‌ڵه‌ و یه‌كێتیی ئه‌و رۆژگاره‌.

ره‌نگه‌ هه‌ر ئه‌و جیاوازییه‌ی سه‌ره‌وه‌ به‌س نه‌بێت بۆئه‌وه‌ی ئێمه‌ هه‌ڵوێسته‌ له‌سه‌ر ئه‌و به‌وره‌ ئازاو بوێر و رووناكبیره‌ی كورد بكه‌ین كه‌ یه‌كێكه‌ له‌ ده‌گمه‌نه‌كانی نێو هه‌راو زه‌نای ئه‌و رۆژگاره‌ی كورده‌واری، ئه‌و وه‌ك هونه‌رمه‌ند و شۆڕشگێڕ و ئازادیخواز و یه‌كسانیخواز له‌ به‌شێكی زۆر له‌وانی دیكه‌ جیاده‌كرێته‌وه‌، له‌هه‌موو ئه‌و ماوانه‌ی له‌ شۆڕشدا بووه‌ و پله‌ به‌ پله‌ هه‌ڵكشاوه‌ و به‌ ته‌مه‌نێكی كورته‌وه‌ گه‌یشتۆته‌ ئاستێكی باڵا له‌كه‌یه‌ك له‌ مێژووه‌كه‌یدا نییه‌، بۆ كێشه‌ و گرفته‌كانی كوردستان سه‌رنج و تێبینیی خۆی هه‌بووه‌ ، پیاوێكی ئارام و له‌سه‌رخۆ بووه‌، ئه‌گه‌ر چه‌كداریی و پێشمه‌رگایه‌تی نه‌بوایه‌، ئه‌وا ده‌بووه‌ نووسه‌ر و هونه‌رمه‌ند و رووناكبیرێكی دیاری كوردستان.

ته‌مه‌ن و زه‌مه‌ن و رۆژگار بواری ئه‌وه‌یان نه‌دام له‌ نزیكه‌وه‌ ئازاد هه‌ورامی بناسم، كاتێك من چووم بۆ پێشمه‌رگایه‌تی، هه‌رزوو له‌به‌ر هه‌رزه‌كاریی و نه‌توانینی پێشمه‌رگایه‌تی و دۆخی خێزانه‌كه‌مان ناردمیانه‌وه‌، له‌ هه‌وڵی دووه‌میشمدا كه‌ له‌ خه‌له‌كانه‌وه‌ تا قه‌ڵادزێ‌ چووم بۆئه‌وه‌ی له‌ رێگه‌ی چه‌ند دۆستێكی باوكمه‌وه‌ بگه‌مه‌ ئه‌و شوێنه‌ی ده‌مه‌وێت، دیسان شكستم خوارد، بۆیه‌ ئه‌و زاته‌م نه‌بینی، ئه‌گه‌رچی كه‌م و كورت زانیاریم له‌ باره‌یه‌وه‌ هه‌بوو، هه‌روه‌ها دوور به‌ دوور خۆشیشم ده‌ویست، بۆیه‌ كتێبی كورد و كه‌ركوكم پێشكه‌ش كردووه‌ به‌ گیانی دوو شه‌هید « ئازاد هه‌ورامی چریكه‌ و گیتاره‌كه‌ی، هه‌روه‌ها شه‌هید فاخیر فاتیحی برام كه‌ جگه‌ له‌ ئازایه‌تییه‌كه‌ی خاوه‌نی ده‌نگێكی زۆر خۆش بوو».

بیركردنه‌وه‌ی ئازاد هه‌ورامی له‌و رۆژگاره‌دا بۆ چاره‌سه‌ری كێشه‌كان دوور له‌ گرتن و زیندانی و ئازاردان ده‌كرێت وا لێكبدرێته‌وه‌ كه‌ ئه‌و هه‌رگیز بڕوای به‌ زه‌بروزه‌نگ نه‌بووه‌، هه‌ربۆیه‌ رێی خه‌باتیشی به‌ سه‌خت و دوور زانیووه‌، هه‌ڵسه‌نگاندنی بیرو بۆچوونه‌كانی ئازاد هه‌ورامی له‌و نامه‌یه‌دا و له‌و نووسینانه‌وه‌ كه‌ هاوڕێ‌ و نزیكه‌كانی لێی ده‌گێڕنه‌وه‌، ئێمه‌ ده‌گه‌یه‌نێته‌ ئه‌و باوه‌ڕه‌ی شۆڕش به‌ ویست و خواستی ئازاد و ئارام و به‌شێك له‌و كه‌سانه‌ نه‌گه‌ڕاوه‌ كه‌ ویستویانه‌ شۆڕشی نوێ‌ قۆناغی جیاكه‌ره‌وه‌ بێت له‌ پێشتر و بزووتنه‌وه‌ چه‌كدارییه‌كانی به‌ر له‌وان.

مه‌لا به‌ختیار له‌ پێشه‌كیی كتێبی «ئازاد هه‌ورامی كه‌ركوكییه‌كی كوردستانی» به‌وردی باسی رۆڵی كاك ئازاد ده‌كات، له‌ دروستكردنی هه‌رێمه‌كان و هه‌ستانه‌وه‌ی شۆڕشدا ، هه‌روه‌ها باسی كاریگه‌ریی ئه‌و ده‌كات له‌سه‌ر ئه‌وانی تر، ته‌نانه‌ت له‌سه‌ر ئه‌وانه‌ش كه‌ له‌ ته‌مه‌ن و ئه‌زمووندا له‌و گه‌وره‌ تربوون . ئه‌و باسی هه‌مان ئه‌و جیاوازییه‌ی ئازاد ده‌كات كه‌ منیش ده‌یبینم دوای راكردنی له‌ زیندانی «قیاده‌ موقه‌ته‌«ش. ئه‌و به‌ هیچ شێوه‌یه‌ك رقی له‌ بكه‌رانی كاره‌ساتی هه‌كاری هه‌ڵنه‌گرتووه‌، پێشی وابووه‌ كه‌ ده‌بێت شه‌ڕی ناوخۆ و ناكۆكییه‌كان به‌ رێكه‌وتن و لێكتێگه‌یشتن چاره‌سه‌ر بكرێت.

ئازاد هه‌ورامی هه‌ر له‌ بنه‌ڕه‌تدا بڕوای به‌ شه‌ڕو ناكۆكی ناوخۆیی نه‌بووه‌، ته‌نانه‌ت زۆر دژی ئه‌و دژایه‌تی و ناته‌باییه‌ی نێوان گروپ و ده‌سته‌كانی كۆمه‌ڵه‌ بووه‌ و هه‌وڵی داوه‌ له‌ كێشه‌كان دوور و بێلایه‌ن بێت، ویستی دووركه‌وتنه‌وه‌شی هه‌بووه‌ له‌و بارودۆخه‌دا، ئه‌مه‌ش بۆئه‌وه‌ی به‌شێك نه‌بێت له‌و كێشانه‌، ئه‌مه‌ گه‌واهی هه‌موو ئه‌و هاوڕێیانه‌یه‌تی كه‌ ناسیویانه‌ و له‌گه‌ڵیدا بوون.

كه‌سێكی ئه‌ده‌ب دۆست، ده‌نگخۆش، هونه‌رمه‌ند و بیرتیژ بووه‌. به‌ گوێره‌ی قسه‌ی هاوڕێكانی و ئه‌وانه‌ی له‌ ته‌كیدا بوون، به‌رده‌وام شیعری شاعیرانی له‌به‌ر بووه‌ و له‌ بۆنه‌ و دانیشتنه‌كاندا ئاماژه‌ی پێداون، شاره‌زاییه‌كی زۆری له‌ شیعری شاعیرانی كلاسیكدا هه‌بووه‌ و ئه‌مه‌شی له‌ كاك هۆشمه‌ندی برایه‌وه‌ بۆ ماوه‌ته‌وه‌ و كاریگه‌ریی ئه‌وی له‌سه‌ربووه‌.

سامی هه‌ورامی برای كه‌ به‌ سامی سه‌رپان ناسرابوو، كه‌سێكی قسه‌ خۆش و پڕو ئاوه‌دان ، ئه‌گه‌رچی هه‌میشه‌ سیمای خه‌مێكی قووڵی پێوه‌ دیاره‌.

له‌ باره‌ی منداڵیی ئازاد هه‌ورامییه‌وه‌ ده‌ڵێت: «به‌رده‌وام منداڵانی گه‌ڕه‌كی هانده‌دا بۆ فێربوونی گیتار» و خولیشی بۆ منداڵه‌كان كردۆته‌وه‌، له‌ شاخیش به‌رده‌وام هاوڕێی گیتار و تفه‌نگ بووه‌.

من وه‌ك خۆم له‌ شاخ و له‌ نێو پێشمه‌رگه‌دا به‌ دوو كه‌س زۆر سه‌رسامم، یه‌كه‌م كاك ئازاد و هونه‌ر و رۆشنبیرییه‌كه‌ی، دووه‌م شه‌هید مه‌لا عه‌لی شاعیر، بڕوام وایه‌ ئه‌گه‌ر كورد سینه‌ما و كادری به‌ توانای بواری فیلمسازیی هه‌بوایه‌ له‌ باشوور، ژیانی ئه‌وان و بوونی ئه‌وان، هه‌ڵوێست و ئاكاری ئه‌وان، ده‌كرا بكرێنه‌ فیلمی زۆر ناوازه‌.

مولازم عومه‌ر یه‌كێك له‌ هاوڕێ و نزیكه‌كانی شه‌هید ئازاد هه‌ورامی و كه‌سایه‌تیی تێكۆشه‌ری كورد له‌باره‌ی دوا قسه‌ی ئه‌وه‌وه‌ ده‌ڵێت پێی وتم: «ئاگاتان له‌ شنۆ بێت و ئازاده‌ هه‌رچی بكات»، ئه‌م قسه‌یه‌ روانگه‌ی بیرو باوه‌ڕو تێگه‌یشتنی شه‌هید ئازاد هه‌ورامییه‌ سه‌باره‌ت به‌ ئازادیی ژن و بڕوای به‌ كۆت و به‌ندكردن نه‌بووه‌ ، ئه‌مه‌ش لوتكه‌ی ئاكاری ئه‌و پیاوه‌یه‌ كه‌ شنۆی هاوسه‌ری كه‌ خۆشی سه‌ربه‌ خانه‌واده‌یه‌كی تێكۆشه‌ری رۆژهه‌ڵاتی كوردستانه‌ له‌ هه‌موو ئه‌وانی تر وردتر له‌ باره‌یه‌وه‌ ده‌دوێت.

ماوه‌ته‌وه‌ بڵێم شه‌هید ئازاد هه‌ورامی به‌ قه‌ولی هاورێبازه‌كانی ماركسییه‌كی كوردستانی بووه‌ و هه‌ر به‌و جۆره‌ش ژیا، به‌و شێوه‌یه‌ش شه‌هید بوو، ئه‌و ماركسیزمی به‌و جۆره‌ وه‌رگرتووه‌ كه‌ ئازادیی گه‌لان و ئازادیی گه‌له‌كه‌ی خۆشی بۆ بێنێته‌دی و هه‌رگیز بڕوای به‌وه‌ نه‌بووه‌ كه‌ نه‌ته‌وه‌گه‌ریی ئاكارییانه‌ شه‌رمه‌زارییه‌ بۆ مرۆڤایه‌تی، هه‌ر ئه‌وه‌ی كه‌ منیش هه‌ڵگری هه‌مان باوه‌ڕم و بڕوام وابوو تێكه‌ڵكردنی نه‌ته‌وه‌گه‌ریی ئاكاریانه‌ و نه‌ته‌وه‌په‌رستیی كوێرانه‌، ناسیۆنالیست و پاترۆید جۆرێكه‌ له‌ نه‌زانی و نه‌بینینی راستی.

درود بۆ ئازاد هه‌ورامی شه‌هید، ئه‌و مرۆڤه‌ی هونه‌ر و ئازادیی و خه‌باتی ئاوێته‌ی یه‌ك كردبوو.

 513 جار بینراوە