سەرەکی » وتار » شێرزاد شێخانی » چوكلێت و حیكمه‌تی‌ جاران

هەولێریات

چوكلێت و حیكمه‌تی‌ جاران

له‌زۆربه‌ی‌ چایخانه‌و مارانیشدا عاده‌ت وابوو ته‌قویمه‌ك له‌سه‌ر دیواره‌كانیان هه‌رواسن. ئه‌و سه‌رده‌مه‌ هه‌رچه‌نده‌ له‌ناو هه‌نده‌ك له‌سه‌عاته‌كانی‌ ده‌ست ناوو تاریخی‌ رۆژه‌كان ده‌نووسرا، به‌س هه‌موو كه‌س قودره‌تی‌ كڕینی‌ ئه‌و سه‌عاتانه‌یان نه‌بوو كه‌ سیعره‌كه‌ی‌ له‌چاو سه‌عاتی‌ ئاسایی‌ گرانتر بوو، لۆیه‌ به‌ شێست فلس ته‌قویمه‌كیان ده‌كڕێ كه‌ به‌پێی‌ رۆژه‌كانی‌ سار وه‌ره‌قه‌ له‌سه‌ر وه‌ره‌قه‌ سه‌فت كرابوون. ئه‌وجا وه‌رقه‌كان به‌قه‌ده‌ر پاكه‌ته‌كی‌ جغاره‌ی‌ بوون، له‌دیوی‌ ده‌ره‌وه‌ی‌‌ به‌ خه‌ته‌كی‌ گه‌وره‌ به‌روارو ناوی‌ رۆژه‌كه‌ ده‌نووسرا، له‌خواره‌وه‌ش به‌خه‌ته‌كی‌ گچكه‌ی‌ باریك رێكه‌وته‌كانی‌ ئه‌و رۆژه‌ ده‌نووسرا، وه‌كی‌ ئه‌وه‌ی‌ ئه‌و رۆژه‌ رێكه‌وتی‌ چله‌ی‌ زستانه یان هاوین، یان رۆژی‌ موناسه‌به‌كان وه‌كی‌ نه‌ورۆز و یادی‌ شۆڕشه‌كان و گێژنه‌كان. ئه‌وه‌ی‌ جێی‌ سه‌رنج بوو، دیوی‌ پشته‌وه‌ی‌ ئه‌و وه‌رقانه‌ بوو كه‌ هه‌ر یه‌كی‌ په‌نده‌ك یان قسه‌یه‌كی‌ نه‌سته‌قی‌ ناودارانی‌ له‌سه‌ر ده‌نووسرا. زۆر مه‌راقم خیندنه‌وه‌ی‌ ئه‌و په‌ندانه‌ بوون به‌ڕاستی‌ فێری‌ زۆر شتی‌ ده‌كردین.

له‌ولاشه‌وه‌ كاته‌كی‌ چوكلێته‌كمان ده‌كڕی‌، له‌دوای‌ كردنه‌وه‌ی‌ به‌رگه‌كه‌ی‌ كاغه‌زه‌كی‌ سپی‌ چوكلیته‌كه‌ی‌ دادپۆشی‌ ئه‌ویش كه‌ ده‌مانكرده‌وه‌ په‌نده‌كی‌ له‌سه‌ر نووسرابوو.

ته‌بعه‌ن جگه‌ له‌وانه‌ش له ‌ده‌رسی‌ عه‌ره‌بی‌ مه‌كته‌بیش كه‌ له‌پۆلی‌ پێنجه‌وه‌ ده‌ستی‌ پێده‌كرد، له‌سووچه‌كی‌ سه‌بووره‌كه‌ش رۆژانه‌ په‌نده‌كی‌ عه‌ره‌بی‌ له‌سه‌ر ده‌نووسرا بێ ئه‌وه‌ی‌ مامۆستا قسه‌ی‌ له‌سه‌ر بكا، چونكی‌ هه‌ر لۆ هوشیاركردنه‌وه‌ بوو.

له ‌زۆربه‌ی‌ دوكان و چایخه‌نه‌كانیشدا ئیهتمام به‌و حیكمه‌ت و په‌ندانه‌ ده‌درا. وه‌كی‌ ئایه‌ته‌كانی‌ قورئان هه‌نده‌ك له‌و په‌ندو حیكمه‌تانه‌ له‌چارچیوه‌ ده‌گییران و به‌سه‌ر دیواره‌كاندا هه‌رده‌واسران، ئێستاش له‌به‌ر چاومه‌ له‌زۆربه‌ی‌ دوكانه‌كاندا وته‌ی‌ (القناعه‌ كنز لا یفنی‌ ) هه‌رده‌واسراو به‌ فیعلیش كاریگه‌ری‌ هه‌بوو به‌سه‌ر خه‌ركه‌كه‌وه‌، چونكی‌ خه‌ركی‌ به‌عام له‌و زه‌مه‌نه‌دا قه‌ناعه‌تیان هه‌بوو.

له‌حه‌مووی‌ خۆشتر له‌و سه‌رده‌مه‌دا له‌پشتی‌ زۆربه‌ی‌ لۆری‌ و گه‌لابه‌كانیشدا به‌خه‌ته‌كی‌ جوان هه‌نده‌ك له‌و په‌ندانه‌ ده‌نوسران وه‌كی‌ (الحسود لایسود) له‌ته‌نیشتیشی‌ ره‌سمی‌ ده‌سته‌كیان ده‌كرد كه‌ چاوه‌كی‌ تێدایه‌ !. یان له‌سه‌ر بۆدی‌ پشته‌وه‌یان ده‌نووسرا (لا تسرع یا بابا نحن بأنتڤارك). هه‌رچه‌نده‌ پێویست بوو ئه‌و عیباره‌ته‌ له‌سه‌ر جامی‌ پێشه‌وه‌ی‌ لۆریه‌كه‌ به‌رامبه‌ر چاوی‌ شوفێره‌كه‌ دابندرابایه‌ حه‌تا سه‌ریع لێنه‌خوڕی‌، به‌س خه‌تاته‌كان ده‌چوون له‌بۆدی‌ پشته‌وه‌یان ده‌دا كه‌ هیچ ئیستفاده‌ی‌ نه‌بوو !.

ئه‌وجۆره‌ په‌روه‌رده‌ كردنه‌ به‌په‌ندو حیكمه‌تانه‌ له‌و سه‌رده‌مه‌دا كاریگه‌ری‌ زۆری‌ هه‌بوو به‌تایبه‌تیش له‌سه‌ر پێگه‌یاندنی‌ ئه‌قری‌ منداران، یه‌ك به‌خۆم زۆربه‌ی‌ ئه‌و په‌ندو حیكمه‌تانه‌م له‌به‌ر كردیه‌ ئێستاش ده‌یان و سه‌دان په‌ندی‌ ئه‌و سه‌رده‌مه‌ له‌مێشكمدا مایه‌و قه‌ت له‌بیریان ناكه‌م چونكی‌ چوونه‌ ناو جیناته‌كانمه‌وه‌. له‌كۆتاییشدا حه‌ز ده‌كه‌م‌ شته‌كی‌ خۆشتان لۆ بگێڕمه‌وه‌ ..

جاران ئامانه‌ هه‌بوو كه‌ وه‌سیله‌ی‌ گواستنه‌وه‌ی‌ خه‌ركی‌ بوو له‌ناو شاردا، پێش ئه‌وه‌ی‌ ئه‌و فه‌وزای‌ سه‌یارانه‌ روو له ‌هه‌ولێر بكا خه‌ركی‌ به‌پاس هاتووچۆی‌ان ده‌كرد، ئه‌وجا له‌ناو ئامانه‌كاندا قیتعه‌یه‌ك هه‌بوو كه‌ له‌سه‌ر سه‌ری‌ سایه‌قه‌ك جێیان لۆ كردبووه‌، له‌سه‌ری‌ نووسرابوو (ساعد الجابی بأصغر نقد كافی) . ئه‌وكاتی‌ كه‌ عه‌ره‌بیه‌كه‌م هێشتا دووكه‌ڵی‌ ده‌كرد، وامده‌زانی‌ ئه‌وه‌ به‌یته‌كی‌ شیعرییه‌، چونكی‌ ئه‌گه‌ر مو‌لاحه‌زه‌ بكه‌ن ده‌بینن وه‌زن و قافییه‌ی‌ مه‌زبووته‌، دوای‌ سارانه‌ك ئه‌وجا تێگه‌یشتم كه‌ ئه‌وه‌ نه‌ شیعره‌و نه‌ ته‌ڕه‌ماشه‌، ئه‌وه‌ به‌كوردییه‌كه‌ی‌ پێت ده‌رێ (خوورده‌مان بده‌یێ، جابیه‌كه‌مان تاقه‌تی‌ نیه‌ بچته‌ خوارێ پاره‌كه‌ت خوورد بكاته‌وه‌و له‌به‌ر خاتری‌ جه‌نابت پاسه‌كه‌ رابگرین) .

هه‌رچه‌نده‌ ئێستا خوورده‌و موورده‌ش‌ مۆدیلیان نه‌ما، چونكی‌ ئه‌مه‌ ده‌وڵه‌تی‌ وه‌حیدین له‌هه‌موو دونیا كه‌ پاره‌ی‌ ئاسنمان نیه‌، به‌ڵام ئه‌و سه‌رده‌مه‌ ژیان هه‌ر خۆش و ره‌نگیینیش بوو، باقی وه‌لسه‌لام .

 175 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*