سەرەکی » وتار »  ‌عه‌داله‌ت عه‌بدوللا‌ » چه‌كێكی دوو سه‌ره‌ !

شیكار

چه‌كێكی دوو سه‌ره‌ !

چڕكردنه‌وه‌ی ره‌خنه‌ له‌سه‌ر ئه‌زموونی هه‌رێم و به‌تایبه‌تیش له‌سه‌ر بڕیاربه‌ده‌ستان، كارێكی ناڕه‌وا نییه‌. فشاری ده‌ره‌كیش، چ له‌قۆڵی (دۆستان)ه‌وه‌ بێت، یان(نه‌یاران)، ده‌رفه‌تێكه‌ بۆ پیاچوونه‌وه‌، یان په‌ندوه‌رگرتن بۆ هه‌ر ده‌سته‌بژێرێكی حوكمڕان له‌ئاینده‌ی كوردستاندا. ئه‌مه‌ هه‌ڵوێستێكی سوودبه‌خشه‌ ئه‌گه‌ر ویستێكی راستگۆیانه‌ بۆ پاراستنی هه‌رێم هه‌بێت و مه‌سه‌له‌كه‌ ته‌نها شه‌ڕی ده‌سه‌ڵات نه‌بێت، چ له‌ناو هه‌رێم خۆیدا بێت، یان له‌نێوان به‌غداو هه‌رێم!.
ئه‌مه‌ ده‌ڵێین بۆ ئه‌وه‌ی هیچ جۆره‌ لۆمه‌یه‌ك له‌ئاست ئه‌زموونی حوكمڕانیی نوێی عێراقدا (2003ز) پاساوێك نه‌بێت بۆ بێده‌نگی له‌ئه‌زموونه‌ سه‌رنه‌كه‌وتووه‌كه‌ی هه‌رێم. به‌باره‌كه‌ی تریشدا، خراپه‌ی ئه‌زموونی ئێره‌ش، نه‌بێته‌ بیانوو بۆ چاوپۆشین له‌ئه‌زموونی به‌غدا. لێره‌دا تاقه‌ مه‌ترسی ئه‌وه‌یه‌ كه‌ له‌كۆتاییدا، چاوپۆشین له‌حوكمڕانیی ئه‌م ده‌ورانه‌ی عێراق، سه‌رنه‌كێشێت بۆ له‌باربردنی هه‌رێمه‌كه‌ كه‌ ده‌ستكه‌وتی راپه‌ڕینی كوردو شۆڕشه‌كانێتی و موڵكی دانیشتووانه‌ نه‌ك كاربه‌ده‌ستان كه‌ دێن و ده‌ڕۆن. واته‌، مه‌ترسییه‌كه‌، مه‌ترسییه‌كی نیشتمانییه‌، ترسه‌ له‌سه‌رهه‌ڵدانه‌وه‌ی بنده‌ستی به‌هۆی سڕكردنی هه‌موو ره‌خنه‌یه‌ك له‌حوكمڕانانی ئێستای عێراق به‌بۆنه‌ی خراپیی ئه‌زموونی كوردستانه‌وه‌.
ئه‌گه‌ر پێدراوی نوێ بهێنرێته‌وه‌، نموونه‌، ده‌ستووره‌. ئه‌گه‌ر ئه‌مڕۆ ئه‌م به‌ڵگه‌نامه‌یه‌ ته‌نانه‌ت چه‌كێكیش بێت به‌ده‌ستی حكومه‌تی به‌غداوه‌ بۆ له‌قاڵبدانی ئه‌زموونی هه‌رێم، ئه‌وا چه‌كێكی دووسه‌ره‌یه‌. ده‌ستوور، ته‌نها بریتی نییه‌ له‌تێكستێكی پیرۆزكراو، به‌ڵكو به‌های یاسایی و كۆمه‌ڵگه‌یی خۆی له‌جێبه‌جێكردنیدا وه‌رده‌گرێت. پێوه‌ر هه‌میشه‌ له‌پراكتیكدایه‌، نه‌ك تێكست. ده‌ستور، وه‌ك تێكست، ده‌شێت مامه‌ڵه‌ی خۆبژێرییانه‌ی‌ (إنتقائی/Selective) له‌گه‌ڵدا بكرێت، به‌ڵام له‌پراكتیكدا ده‌بێته‌ مایه‌ی خۆڕووتكردنه‌وه‌!، چونكه‌ مامه‌ڵه‌ی خۆبژێری، زۆرجار، له‌سه‌ر بنه‌مای پشتگوێخستنی ئه‌و ماده‌و بڕگانه‌یه‌ له‌ده‌ستوور كه‌ مه‌رامی ناده‌ستوورییانه‌ی خودی ئه‌م جۆره‌ مامه‌ڵه‌یه‌، ئاشكرا ده‌كه‌ن!، مه‌رامیش هه‌میشه‌ روونه‌: به‌رژه‌وه‌ندیی سیاسی.
داواكردنی خاڵه‌ سنوورییه‌كان و فڕۆكه‌خانه‌كان له‌لایه‌ن به‌غداوه‌و به‌بیانووی مافی ده‌ستوورییه‌وه‌، ته‌واو پێچه‌وانه‌ی هه‌ردوو ماده‌ی (114)و (115)ی خودی ده‌ستووره‌، چونكه‌ به‌غدا، تائێستا، باس له‌ده‌سه‌ڵاتی هاوبه‌ش ناكات، به‌ڵكو ته‌نها ده‌سه‌ڵاتی ره‌هاو یه‌كلایه‌نه‌!. دواتر باسكردن له‌دابه‌شكردنی راسته‌وخۆی موچه‌ی‌ هه‌رێم له‌لایه‌ن به‌غداوه‌، پێشێلكردنی مادده‌ی (121) كه‌ دان به‌ده‌سه‌ڵاته‌كانی هه‌رێمدا ده‌نێت، سزادانی هاووڵاتیانی هه‌رێمیش له‌گه‌شتكردن له‌و فڕۆكه‌خانه‌ نێوده‌وڵه‌تییانه‌ی هه‌رێمه‌وه‌ كه‌ له‌سه‌ره‌تای دروستكردنیانه‌وه‌ هیچ فڕۆكه‌یه‌كیان تێدا هه‌ڵنه‌فڕیوه‌ به‌بێ ره‌زامه‌ندی ده‌سه‌ڵاتی فڕۆكه‌وانیی مه‌ده‌نیی ئیتیحادی و به‌بێ فیزا كه‌ له‌حكومه‌تی فیدراڵییه‌وه‌ ده‌به‌خشرێت، پێچه‌وانه‌ی مادده‌ی (44)ی ده‌ستووره‌. هاوكات رێگه‌گرتن له‌به‌ڕێوه‌بردنی هاوبه‌شی ناوچه‌كانی جێی ناكۆكیش، ناكۆكه‌ به‌ماده‌ی (140)، ئه‌مه‌ بێ له‌وه‌ی جێبه‌جێنه‌كردنی خودی مادده‌كه‌ش، دیسان پێشێلكردنی ده‌ستووره‌.
واته‌، به‌كورتی، له‌م كێشانه‌ی نێوان هه‌رێم و به‌غدادا، ده‌ستوور چه‌كێكی دووسه‌ره‌یه‌، سه‌ره‌ نه‌بینراوه‌كه‌ی، ئه‌و سه‌ره‌یه‌ كه‌ مه‌رامه‌ سیاسییه‌كانی پشت پێداگرتنی خۆبژێرییانه‌ی ده‌ستوورمان بۆ رووتده‌كاته‌وه‌!.

*گۆشه‌یه‌كی رۆژانه‌یه

 408 جار بینراوە