سەرەکی » راپۆرت » ئامادەکردنی:بورهان ئەمین » ئەڵمانیا؛ پارتەكەی مێركل بردییەوە

ئەڵمانیا؛ پارتەكەی مێركل بردییەوە

رۆژی یەكشەممەی رابردوو، لە هەرێمی نۆردراین ڤێستڤاڵن NRWی ئەڵمانیا كە گەورەترین هەرێمە لە رووی ژمارەی دانیشتووانەوە، كە 18 ملیۆن كەسە، هەڵبژاردنی ئەنجومەنی شارەوانییەكان Kommunalwahl بەڕێوەچوو ‌و بەپێی ئەنجامە بەراییەكانیش، پارتی دیموكراتی كریستیان (پارتەكەی مێركل)، 36 %ی دەنگەكانی بەدەستهێنا و بووە یەكەم پارتی براوە، دوای ئەویش پارتی سۆسیال دیموكرات SPD بە لەدەستدانی 7 %ی دەنگەكان، ئەمجارە توانی تەنها 23,5 % بەدەستبهێنێ ‌و ببێتە دووەم، بەڵام پارتی سەوزی ئەڵمانی Die Grune، رێژەی دەنگەكانی لە هی خولی پێشوو زۆر زیاتر هێناوە و 7,5 %ی زیادكردووە و ئەمجارە 19 %ی بەدەستهێنا و بووە بە سێیەم، پارتی ئەڵتەرناتیڤ (جێگرەوە بۆ ئەڵمانیا) كە پارتێكی راستڕەوی توندڕەوە، توانی رێژەی 6 %ی دەنگی هەرێمەكە بهێنێ و سێ خاڵ لە خولی پێشوو زیاتر بێنێت. دوای ئەوانیش، پارتی دیموكراتی ئازاد 4,6 % ‌و چەپەكانیش تەنها 4 %یان هێنا.

لەم هەڵبژاردنەدا كە 14 ملیۆن كەس مافی دەنگدانیان هەبوو، رێژەی بەشداریكردن گەیشتە 51,5 % ‌و خاڵێك لەوەی رابردوو زیاتر بوو. لەپاڵ هەڵبژاردنی ئەندامانی ئەنجومەنی شارەوانی، پارێزگار و سەرۆكی ئەنجومەنەكان و ئەنجومەنی راوێژاكاری تێكەڵاوبوون. لە شاری كۆڵن و سەنتەری هەرێمەكە، هنریتە ریكل بووە پارێزگار، كە كەسێكی سەربەخۆیە و سەر بە هیچ لایەنێكی سیاسی نییە ‌و لەو شارەدا، سەوزەكان زۆرترین دەنگی خەڵكیان بەدەستهێناوە و بوونەتە لیستی یەكەم.

بۆچی CDU دیسان بردییەوە؟
بەپێی لێكدانەوەی چاودێرانی سیاسیی وڵات، هۆكاری سەرەكیی بردنەوەی پارتەكەی مێركل كە لە ساڵانی پێشوو و لە هەڵبژاردنی ژمارەیەك هەرێم شكستی بەرچاوی هێناوە، بە تایبەتی لە سەروبەندی هاتنی بەلێشاوی كۆچەران بۆ ئەڵمانیا و مەترسیی هاووڵاتیان لە تێكچوونی دۆخی ئەمنی ‌و ئاسایشی وڵات ‌و مەترسی تیرۆر و كردەوەی تیرۆریستی ‌و پەرەسەندنی ئیسلامی سیاسی، ئەمجارە لەبەر دوو هۆكاری سەرەكیی، لەم هەرێمە سەركەوتنی بەدەستهێناوەتەوە. یەكەمیان، لە دوای پێنج ساڵ لە پڕۆسەی وەرگرتنی زیاتر لە یەك ملیۆن لە كۆچەرانی نایاسایی، دەركەوت كە ئەو بڕیارەی مێركل و بەشێك لە پارتەكەی، بڕیارێكی گونجاو و راست بووە، چونكە لە ماوەی ئەو ساڵانەدا، زۆرینەی ئەو كۆچەرانە دەستی كاریان لە ئەڵمانیا تاكو رادەیەك كەمكردۆتەوە و زۆرینەیان لە بازاڕی كاردا بەگەڕخراون، بەپێچەوانەی ئەو بۆچوونەی كە پێی وابوو، ئەوانە دەبنە بارگرانی بەسەر وڵاتەوە. دووەم هۆكاریش، لەو بڕیارەی راوێژكاری ئەڵمانیا و كابینەكەیدا خۆی دەبینێتەوە، كە سەبارەت بە هەڵمەتی روبەڕوبونەوەی كۆرۆنا داویەتی، لە هاوكاری و خزمەتی هاووڵاتیان و دەستگرتنی زیانلێكەوتووان و قەرەبووكردنەوەیان.

سەبارەت بەوەش كە پارتی سەوز توانیویەتی دەنگی زۆر بەدەستبهێنێ و ببێتە سێیەم فراكسیۆن و لە هەندێ شاریشدا بۆتە یەكەم یان دووەم، چاودێران دەڵێن: لە دوای بڵاوبوونەوەی ڤایرۆسی كۆرۆنا، سیاسەتی ژینگەپارێزی و پاكڕاگرتنی ئاو ‌و هەوا بۆتە پێویستییەكی حەتمی و ئەوەی كاری بۆ بكات، ئەوا لە خەمی خەڵكدایە. پارتی سەوزیش لە مێژە دروشمی سەرەكیی پاكڕاگرتنی ژینگەی بەرزكردۆتەوە ‌و خەبات دەكات بۆ لابردنی ئاسەوارە خراپەكانی پیسكردنی ئاو و هەوا، ئەمە لەلایەك، لەلایەكی تریشەوە، وەك ئۆپۆزسیۆن لە هەندێ هەرێمدا بە رەخنەگرتن و هەڵوێستەكانی لە ئاست سیاسەتی پارتەكانی دەسەڵات، توانیویەتی سەرنجی رای گشتی بۆ لای خۆی رابكێشێ.

توندڕەوەكان لە پاشەكشەدان
هەرچەندە بیری رەگەزپەرستی و نازیزم و توندڕەوی لە ئەڵمانیا لە پەرەسەندندایە و حكومەت بە هەموو جۆرێك رووبەڕوویان دەبێتەوە، پارتی ئەلتەرناتیڤ بۆ ئەڵمانیا AFD رابەرایەتی ئەو ئاراستەیە دەكا و ئێستا لە ناو پەرلەمانی وڵاتدا 92 كورسییان هەیە، ئەمجارە لەو هەرێمە شكستیانهێناوە و نەیانتوانیوە دەنگی باش بەدەستبهێنن، ئەویش هۆكاری خۆی هەیە ‌و لە پێشەوەیاندا، تەوژمی نازییەت و گروپەكان یەكڕیز و هاوهەڵوێست نین، بەڵكو پەرتەواز و لێك دوورن. لەلایەكی تریش، كۆرۆنا دەریخست كە ئەم توندڕەوانە ئەوەندەی خەمی خۆیان و بەدیهێنانی بەرنامەكەیانە، ئەوەندە لە خەمی خەڵكدا نین، لە كاتێكدا حكومەتەكەی مێركل ئەو هەموو ملیار یۆرۆیەی لە پڕۆسەی روبەڕوبونەوەی كۆرۆنادا خەرج كرد، ئەوان خەریكی فشار بوون بۆ سەر حكومەت لەگەڵ تەگەرە خستنە بەردەم پلانەكان. لە خۆپیشاندان و ناڕەزایەتییەكاندا لە دژی رێكارە تەندروستییەكان، دەریخست كە ئەوانە گوێ نادەنە تەندروستی هاووڵاتیان، بەڵكو لەگەڵ گروپەكانی تری ئەوروپا سەرگەرمی خەیاڵپڵاوی ‌و گەڕانەوەی ئیمپراتۆریەتی نازین، كە زۆرینەی ئەڵمانییەكان بە شەقام و نێوەندی سیاسی و میدیاییشەوە، نەفرەتی لێدەكەن.

سەرچاوە: كەناڵەكانی میدیای ئەڵمانیا

print

 127 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*