سەرەکی » ئاراستە » سەرهەڵدانی داعش لە عیراق

بیره‌وه‌ریی شه‌ڕی دژی داعش

سەرهەڵدانی داعش لە عیراق

وه‌ستا ره‌سوڵ

ئه‌م زنجیره‌ نووسینه‌ كه‌ له‌ رۆژنامه‌ی كوردستانی نوێ دا بڵاوده‌بێته‌وه‌، له‌ بنه‌ڕه‌تدا پڕۆژه‌ی كتێبێكه‌ تایبه‌ت به‌ بیره‌وه‌رییه‌كانی خۆم له‌ شه‌ڕی دژی داعشدا.

به‌ پێویستی ده‌زانم داوای لێبووردن بكه‌م له‌ ئه‌گه‌ری بیرچوونی رووداوێك، یاخود هه‌رشتێكی تایبه‌ت به‌و باسه‌، بۆیه‌ داواكارم له‌ هه‌ڤاڵان و هه‌موو ئه‌و به‌ڕێزانه‌ی لەم رووه‌وه‌ هه‌ر سه‌رنج و بیرهێنانه‌وه‌و پێشنیازێكیان له‌لا گه‌ڵاڵه‌ بوو، بۆم بنێرن تاكو له‌ كتێبه‌كه‌دا جێگه‌ی بكه‌مه‌وه‌.

(6)

هاتنی‌ ئەنوەری‌ حاجی‌ عوسمان و گفتوگۆ لەگەڵ داعش
رۆژی‌ (17ی‌ تەموزی‌ 2014) لە تەنیشت کارەباکەی‌ مەلا عەبدوڵڵا ئەنوەری‌ حاجی‌ عوسمانمان بینی‌ بە هێزێکەوە هاتبوو، بەو سیفەتەی‌ تەللوەرد لەسەر میحوەری‌ پێنج بوو، دەیانویست لیوای‌ دوو لە تەللوەرد جێگیربکەن و تیمێکی‌ سەربازی‌ لە وەزارەتی‌ پێشمەرگەوە بۆ تەللوەرد هێنابوو، بەپێی‌ قسەی‌ ئەنوەری‌ حاجی‌ عوسمان: داعش ڕێی نەداوە بەردی‌ سەنگەرسازی‌ بەبارهەڵگر بگوازنەوە، ووتیشی: وەفدێکی‌ تایبەت لە مەسیفەوە دێ بە مەبەستی‌ گفتوگۆ لەگەڵ نوێنەرانی‌ داعش>
من لەو مەسەلەیە سەرسووڕمانی‌ خۆم نیشاندا!! پاش گفتوگۆکردن بۆم دەرکەوت کە ئەوان هەر لەگەڵ وەفدەکەی‌ داعش دادەنیشن، وتم: دەبێ دوو ئەفسەری‌ میحوەری‌ چواریان لەگەڵ بێت.

دیاربوو ئەو دانیشتنە لەرێگای‌ عەشایەری‌ ناوچەکەوە رێکخرابوو، کاتژمێر (14:00) عەمید بەشدار و کەسێکی‌ مەدەنی‌ هاتنە لامان بە ناوی‌ سەرۆکی‌ هەرێمەوە قسەی‌ لەگەڵ کردین، بە تەلەفۆن دانیشتنەکەی‌ ڕێکخست و وەفدەکەی‌ پێشمەرگە پێکهاتبوو لە عەمید بەشدار، عەمید هیوا ڕەش، عەقید وریا شێخ حەسەن، کەسێکی‌ مەدەنی‌ لە هەولێرەوە هاتبوو ناوەکەیم نەزانی‌. بە عەمید هیوا ڕەشم وت: تۆ و عەقید ووریا نوێنەری‌ میحوەری‌ چوارن، وا ڕێککەوتین لەوبەری‌ پردی‌ مەکتەب خالید کۆببنەوە، من لەناو ئۆتۆمبێلێکی‌ باجەری گەورە لەم بەری‌ پردەکەوە لەگەڵ فەرماندەی‌ فەوجی‌ (1)ی‌ لیوای‌ (1) عەمید فاتیح گەورەدێی بە دووربین چاودێریم دەکردن و بە تەلەفۆن لەگەڵ هیوا ڕەش لەسەر خەت بووم، وەفدی‌ داعش لە (3) کەس پێکهاتبوو، بە ئۆتۆمبیلێکی‌ مازدای‌ سوور هاتنە نزیک سەنگەرەکانی‌ ئێمە، پێشتر لە لایەن فەوجی‌ (1)ی‌ لیوای‌(1) ئەو شوێنە بە باشی کۆنترۆڵ کرابوو. ئەم داواکاریانەیان هەبوو:

1 ـ چۆڵکردنی‌ تەللوەرد، واتا ئەوبەری‌ ئاویان بەهی‌ خۆیان دەزانی‌.

2 ـ کردنەوەی‌ ڕێگای‌ حەویجە – کەرکوک.

ڕەفتاری‌ بازگەکان باش بکەن.

4 ـ پارێزگاری‌ کەرکوک سووتەمەنی‌ و ئاو و کارەبا و خزمەتگوزارییان بۆ بنێرێ.

5 ـ بەندکراوەکانیان ئازادبکرێن.

6 ـ رێگایان بدەین ڕافزییەکان بکوژن لە تازە و داقوق، واتا شیعەکانی‌ سنووری‌ ناحیەی‌ تازەو داقوق بکوژن.
عەمید هیوا ڕەش بە تەلەفۆن بەمنی‌ ڕاگەیاند کە ئەمە مەرجی‌ وەفدەکەی‌ داعشە.

منیش پێم وت: لە بەرامبەریان پێیان بڵێ:

1 ـ تەللوەرد چۆڵ ناکەین.

2 ـ رێگاتان نادەین بێنە ناو تازە و داقوق، هەموو دانیشتوانی‌ ئەو سنوورە لە ئەستۆی‌ ئێمەن بۆ کەس نیە بیانکوژن.

3 ـ هەر کەسێ لەو بەندکراوانەش لە دادگا حوکم درابن، هەردەبێت بە یاسا ئازادبکرێت، واتا ماوەی‌ بەندکردنەکەیان تەواوبکەن ئەمجا ئازاد دەبن.

4 ـ بۆ مەسەلەی‌ کردنەوەی‌ رێگاش، سەیری‌ رەفتاری‌ ئێوە دەکەین، تەقە لە پێشمەرگە بکەن ڕێگا ناکەینەوە، بزانین چەند رۆژێک رەفتارتان چۆن دەبێت، لەم خاڵەیان کات بۆ ئێمە زۆر گرنگ بوو تا بتوانین لە سنووری‌ بەرزاییەکانی‌ تەللوەرد سەنگەرسازییەکان تەواو بکەین.

5 ـ دەربارەی‌ رەفتاری‌ بازگەکان، باشە قسەیان لەگەڵ دەکەین.

6 ـ دەربارەی‌ خزمەتگوزاری‌ پەیوەندی‌ بە ژیانی‌ خەڵکەوە هەیە، لەگەڵ پارێزگار قسە دەکەین.

دانیشتنەکە کۆتایی هات و وەفدەکە گەڕانەوە، عەقید وریا بە توندی‌ قسەی‌ لەگەڵیان کردبوو، عەمید بەشدار ئەمەی‌ پێ ناخۆش بوو گازندەی‌ لە عەقید ووریا کرد.

عەمید بەشدار ووتی‌: من لە موسڵەوە بە جەبهەکاندا هاتووم، هەوڵی‌ زۆرم داوە بۆ ئاگربەست لە نێوان هێزی‌ پێشمەرگە و دووژمن، ئەگەر لێم تێک نەدەن تا جەلەولا شەڕ ڕادەگرم، من لەلایەن سەرۆکی‌ هەرێمەوە بۆ ئەو مەبەستە تەواو سەرپشک کراوم.

دانانی‌ بارەگای‌ میحوەر لە رێگای لەیلان
لەگەڵ عەمید ڕوکن مەریوان بە باشمان زانی‌ بارەگایەک لە ڕێگای لەیلان لەسەر بەرزاییەکانی‌ بەرامبەر تازە دروست بکەین ئەمەش بۆ ئامادەکاری بەرامبەر هەر ئەگەرێک کە لەو سنوورە ڕوو بدات، بۆ ئەو مەبەستە چەند کابینەیەکمان بردە سەر بەرزاییەکان، کە عەمید ڕوکن مەریوان جێگەیەکی‌ باشی‌ هەڵبژاردبوو بە شۆفڵ تەختی‌ کردبوو، کابینەکانمان لێدانا، کە پێشتر بارەگایەکی‌ کەتیبەی‌ تۆپخانەی‌ لێ بوو. کە لەکاتی‌ شەڕدا وەکو کارئاسانی‌ پێویستە بارەگا لە نزیکی‌ شەڕگەکە دروست بکەیت بۆ ئەوەی‌ لە نزیکەوە بەکارەکان ڕابگەیت.

عەمید ڕوکن خالید عەودل کە تازە لە بنکەی‌ پەیوەندییەکانی‌ عیراقەوە وەکو ئەفسەرێکی‌ شارەزا لە وەزارەتی‌ پێشمەرگەوە هاتبووە لای‌ ئێمە، دیارە هاتنەکەی‌ لە سەر داوای‌ من بوو، داوام لێکرد کە شوێنی‌ (احداپیات)ی هەموو هێڵی‌ پێشەوەی‌ هێزەکانی لەسەر نەخشە بۆ دیاری‌ بکەن، ئەویش ئەرکی‌ خۆی‌ جێبەجێ کرد و بارەگای‌ میحوەر و لیواکان و هێڵی پێشەوەی‌ سەنگەرەکانی‌ بە ژمارەی‌ پێوانەیی دیاری‌ کرد. بەم شێوەیە سەنگەرەکانی‌ خۆمان و دوژمن لە بەر چاومان ڕوون بووبوون، هەوڵیشماندا هیچ بۆشاییەک لە نێوانماندا نەمێنێت.

هاتنی‌ وەزیری‌ پێشمەرگە
مستەفای‌ سەید قادر تازە وەکو وەزیری‌ پێشمەرگە دەست بەکارببوو بە یاوەری‌ فەریق جەمال. سەرۆکی‌ ئەرکانی‌ وەزارەت لە هێڵی‌ شەمەندەفەرەکە سەردانیان کردین، پێکەوە سەنگەرەکانمان بەسەرکردەوە، سەر لە بەیانیەکەی‌ تۆپبارانی‌ زۆر لەسەر لیوای‌ (3)ی‌ تایبەت لە ڕێگای‌ بەشیر هەبوو، شەهید و برینداریان هەبوو، هێزەکانی‌ پشتیوانی‌ دوو بەتوندی‌ بەرپەرچیان دانەوە، هێزەکەی‌ دووژمن شکا.

وەزیری‌ پێشمەرگە شەڕ و پێکدانەکانی‌ بەری‌ شەڕی‌ بەشیری‌ بە چاوی‌ خۆی‌ بینی‌، داوامان لێی کرد هاوکاریمان بکات بۆ دروستکردنی‌ سەنگەری‌ زیاتر. بۆ نیوەڕۆکەی‌ کاک مستەفا هاتە بارەگای‌ میحوەرەکەمان، ئەو هاوڕێیەکی‌ دێرینم بوو، پیاوێکی‌ تێکۆشەر و دڵسۆز و ماندووبوو، گفتوگۆمان لەسەر کەم و کوڕی‌ و پێداویستییەکانی‌ هێزی‌ پێشمەرگەی‌ کوردستان کرد. هەر لەو كۆبوونەوەیەدا باسی‌ سنووری‌ میحوەرەکەمانم بۆکرد کە لە داقوقەوە تا مەلا عەبدوڵلا‌ یە. فەریق جەمال وەڵامی‌ دایەوە کە مەلا عەبدوڵاو تەللوەرد لە سنووری‌ میحوەری‌ پێنجە، هەندێ مشتومڕمان کرد کاک مستەفا ووتی‌ دوایی چارەسەری‌ دەکەین هەرنەکرا.

هاتنی‌ وەفدی‌ ئەمریکی‌
لە شەوی‌ (24 /25ی‌ تەموزی‌ 2014) هەڤاڵ جەبار یاوەر ئەمینداری‌ گشتی‌ وەزارەتی‌ پێشمەرگە بە تەلەفۆن ئاگاداری‌ کردمەوە کە وەفدێکی‌ ئەمریکی‌ سەردانمان دەکات بە مەبەستی‌ ئاگاداربوون لەکەم وکوڕی‌ هێزی‌ پێشمەرگە، ئەوانیش وەکو وەزارەت هەوڵ دەدەن پێنج داواکاری‌ چەک بخەنە بەردەستیان، واباشترە بە نووسین بێت، زۆر دڵمان خۆش بوو بە هاتنیان. چونکە یەکەمجاربوو وەفدی‌ سەربازی‌ ئەمریکی‌ بێتەلامان. شەوەکەی‌ لەگەڵ عەمید ڕوکن مەریوان ڕاپۆرتێکمان ئامادەکرد و پێداویستیەکانمان بە شێوەیەکی‌ رێک و پێک خاڵبەندی‌ کرد و زۆر شتی‌ زیاترمان نووسی.

رۆژی‌ (25/7/2014) بۆ یەکەمجاربوو وەفدێکی‌ ئەمریکی‌ بێتە سنووری‌ کەرکوک، لەبارەگای‌ میحوەری‌ چوار لە هێڵی‌ شەمەندەفەرەکە، من و عەمید ڕوکن مەریوان و عەقید خالید و عەقید ووریا لەگەڵ وەفدەکە کۆبووینەوە، بەوردی‌ باسی‌ چۆنیەتی‌ دابەشبوونی‌ هێزەکانمان بۆ کردن، عەمید ڕوکن مەریوان لە سەر نەخشەی‌ سەربازی‌ هەموو خاڵەکانی‌ هێڵی‌ ئەمنی‌ هێزی‌ پێشمەرگە و جێگەی‌ مۆڵگەکانی‌ دوژمنی‌ بۆ باسکردن، نەخشەی‌ دابەشبوونی‌ چەکە گەورەکانی‌ (الخگە الناریه‌)ی‌ بۆیان شیکردەوە، وەفدی‌ ئەمریکا پێیان سەیربوو کە ئێمە بەو شێوە سەربازییە باسی‌ شەڕگەکەمان کرد، وتیان: ئەم دابەشکردنەی‌ ئێوەمان لە هیچ کام لە میحوەرەکان نەبینیوە کێ بەمشێوەیە هێزەکانی‌ دابەش کردووە؟ من پێم ووتن: کە عەمید ڕوکن مەریوان و هاوڕێکانی‌ ئەو کارەیان کردووە .

لە کۆبوونەوەکەمان باسی‌ هەموو پێداویستییەکانی‌ هێزەکانمان بە زیادەوە بە راپۆرتێک پێشکەش کردن، وەفدەکە دەستخۆشیان لێکردین و ووتیان: ئێوە لە شەڕدا ناشکێن لەبەر ئەوەی‌ بە ئەقلی‌ زانستی‌ سەربازی‌ شەڕگەکانتان دابەش کردووە.

هێرشی‌ دوژمن لە سەر رێگای‌ بەشیر
لە (26ی‌ تەموزی‌ 2014) کاتژمێر (14:00) دووژمن پەلاماری‌ هێزەکانی‌ لیوای‌ (3)ی‌ تایبەتیان دا لە ڕێگای‌ بەشیر. لەلایەن هێزەکانی‌ لیوای‌ (3)ی‌ تایبەت و(2)ی‌ تایبەت و هێزەکانی‌ پشتیوانی‌ دوو بەرپەرچدرانەوە، شەهید و برینداریان هەبوو، دووژمن بە کوژرا و و بریندارەوە تێکشکێندرا، شەڕەکە دوو کاتژمێری‌ خایاند، پێنج گوله‌ هاوەنی‌ دووژمن کەوتنە ناو گەڕەکی‌ عەسکەری‌ لە ناحیەی‌ تازە، بریندار لە خەڵکی‌ سڤیل هەبوو . پشێویەکی‌ زۆری‌ لە ناو ناحیەی‌ بەشیر درووستکرد، خەڵکی‌ ناحیەکە ماڵەکانیان بەرەو شاری‌ کەرکوک دەگواستەوە.

جەژنی‌ رەمەزان
(28/7/2014) یەکەم رۆژی‌ جەژنی‌ ڕەمەزان بوو، ئێمە رۆژی‌ عارفە گۆشتمان بۆ هەموو هێزی‌ پێشمەرگە کڕی‌. بەیانی‌ جەژن لەگەڵ هەڤاڵانی‌ میحوەر عەمید مامۆستا کاوە و عەمید ڕوکن خالید و هەڤاڵانی‌ مەڵبەندی‌ کەرکوک، سەردانی‌ هەموو سەنگەرەکانی‌ هێزی‌ پێشمەرگەمان کرد و لە ناو سەنگەرەکان شیرینی‌ و گوڵمان پێشکەش بە پێشمەرگە کرد. من نامەیەکم بۆ هاوسەر و منداڵەکانم نووسی‌ کەمن نایەمەوە ئێوە چاوەڕوانم مەکەن و دڵتان بەوە خۆش بکەن من رۆژێک هەردێمەوە، ئێوە خۆتان بخەنە جێگەی‌ کەس و کاری‌ شەهیدان، ئەی‌ ئەوان ئیتر چاوەڕوانی‌ کێ بکەن؟ شەهیدەکانیان بۆ هەتا هەتایە ناگەڕێنەوە، سێ رۆژی‌ جەژن لە سەنگەرەکان بووم پاشان سێیەم رۆژ بۆ سەردانی‌ ماڵ و منداڵ گەڕامەوە بۆ سلێمانی‌. دیارە ئەمە بوو بە نەریت بەدرێژایی شەڕەکە نزیکەی‌ چوار ساڵی‌ خایاند هیچ کام لە جەژنەکان و سەری‌ ساڵ و نەورۆز و رۆژانی‌ هەینی‌ سەنگەرەکانم بە جێ نەدەهێشت، بەڵکو هەر لە ناو هێزی‌ پێشمەرگە دەمامەوە.

هاتنی‌ کاک مەسعود بارزانی
لە رۆژی‌ یەکەمی‌ جەژندا بەمەبەستی‌ جەژنە پیرۆزە لە هێزی‌ پێشمەرگە کاک مەسعود بارزانی‌ بە یاوەری‌ شاندێک لە وەزارەتی‌ پێشمەرگەوە سەردانی‌ گوندی‌ قەرەدەرەی‌ کرد، بە ئامادەبوونی‌ هەموو فەرماندەکان لە هەر دوو میحوەری‌ (4 ، 5)، بەو بۆنەیەوە ووتارێکی‌ بۆ داین و پاشان گەڕایەوە بۆ هەولێر، لەڕووی‌ مەعنەوی و ئاراستەکردنی‌ پێشمەرگەوە سەردانێکی‌ باش بوو. لەوەی‌ کە باسی‌ مەترسی‌ هاتنی‌ داعشی‌ کرد بۆ سنوورەکە. ووتی‌: شەڕێکی‌ قورسمان تووش بووە دەبێت شان بدەینە بەری‌ و نەهێڵین دوژمن بمان شکێنێت.

هاتنی‌ لیوای‌ سێی‌ پاسەوانی‌ سنوور
ماوەیەک بوو بە هەڤاڵ شێخ جەعفەرمان ووتبوو: کە بۆشاییەک هەیە لە نێوان هێزەکانی‌ لیوای‌ (9) و هێزەکانی‌ لیوای‌ (106) لە سنووری‌ داقوق، چونکە ماوەیەک بوو لیوای‌ (106) مۆڵەت بوون گەڕابوونەوە بۆ سەنگەرەکانی‌ پێشەوە لە نێوان تازە و داقوق جێگیرکرابوون، شوێنەکەیان زۆر فراوان بوو پێیان پڕنەدەکرایەوە و فەوجی‌ تایبەتی‌ هەڤاڵ عومەر فەتاح بە فەرماندەیی عەمید بارزان لە شوێنی‌ پێشمەرگە دێرینەکانی‌ ڕانیە لەسەرووی‌ پردی‌ ژمارە (9 س) جێگیر، پێشمەرگە دێرینەکانی‌ ڕانیەمان بردە سەر بەرزاییەکانی‌ ڕێگای لەیلان.

لیوای‌ سێی‌ پاسەوانی‌ سنوور لە بازگەی‌ نێوان تازە و داقوقەوە جێگیرکران تا سەر ڕێگای‌ گوندی‌ وەحدە، بارەگای‌ لیواکەیان لەناو گوندی‌ مەتارە دانا، عەمید فەخرەدین فەرماندەی‌ لیواکە بوو، کۆمەڵێ فەرماندەی‌ ئازاو بەتوانایان هەبوو لە هەیئەتی‌ لیواکان و فەرماندەی‌ فەوجەکان و سرییەکان، کە پێشتر زۆربەیانم دەناسی‌، ئەو جێگەیەی‌ هێزەکانیانی‌ لێ جێگیربوو شەڕ زۆر گەرم بوو، بەرانبەر گوندی‌ (وەحدە) بوو کە دوژمن لەوێ مەترسی‌ زۆری‌ بۆ سەر رێگای‌ سەرەکی‌ کەرکوک بەغدا دروستکردبوو. بەردەوام لە گەڵ عەمید فەخرەدین هەورامی‌ لەسەرخەت بووین بۆ پاراستنی‌ ڕێگای‌ بەغدا ــ کەرکوک کە تەنها (600) مەتر دووژمن لەرێگاکەوە دووربوو، دەتوانم بڵێم گەورەترین مەترسیمان لەو خاڵە بوو.

هاتنی‌ گەریلا بۆ کەرکوک
هەڤاڵ ئاسۆ مامەند ئاگاداری‌ کردم کە (100) هەڤاڵی‌ گەریلا لە قەندیل و مەخمورەوە هاتوون، لەناو فڕۆکەخانەی‌ (کەرکوک) ن، بەڵکو بیانبەن بۆ (گوندی‌ مەتارە) سەنگەرەکانی‌ بەرامبەر (گوندی‌ وەحدە) یان پێ بسپێرن. هەڤاڵ مامۆستا کاوە بە ئۆتۆمبیلەکانی‌ فەوجەکەی‌ عەلی‌ چیمەنی‌ لە فڕۆکەخانەوە ژمارەیەکیانی‌ بەرەو گوندی‌ مەتارە بردبوو لە ڕێگای‌ گەڕەکی‌ پیشەسازی‌ دوو بۆمبێکیان پیادا تەقییەوە و بریندارێکیان دا، ڕێگای‌ پیشەسازی‌ تازە زۆر مەترسی‌ داربوو، بەردەوام بۆمبیان لەو ڕێگایە دادەنا.

ئەو هێزەی‌ گەریلای‌ پەکەکە لە رووی‌ مەعنەویەوە بۆ کەرکوک زۆرباش بوو، لە هەمان کاتدا رێگای‌ گوندی‌ (وەحدە) یان پێسپێردرا، بەشێک لە هێزەکەیان لە گوندی‌ (عەبدوللا غانم) جێگیرکران. بۆ ئەو رۆژانەی‌ سنوری‌ کەرکوک هێزەکەی‌ پەکەکە گرنگی‌ خۆی‌ هەبوو، لەلایەکەوە یەکڕیزی‌ کوردی‌ نیشان دەدا، لە لایەکی ترەوە هێزێکی‌ ئازابوون لە سنوری‌ داقوق، پشتیان پێدەبەسترا.

 420 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*