سەرەکی » وتار » لە قۆناغی نووێبوونەوەدا

كەم ژیان و كەڵ ژیان

لە قۆناغی نووێبوونەوەدا

مەریوان مەسعود

یەكێتیی، لە هەموو سەردەمەكان، چ لە شاخ بووبێت، چ لە شار، چ لە دوای دروستكردنی كیانێك بۆ كورد، هەردەم وەكو حزبی شەهیدان ناسراوەو دروشمی خزمەتكردنی كەسوكاری شەهیدان و بەرزراگرتنی شەهیدانی بەرزكردۆتەوە، لەبەرئەوەی بەشانازییەوە یەكێتیی پشكی شێری بەردەكەوێ‌ لە قوربانی و شەهیدان. چونكە هەردەم حزبێك بووە، پێشمەرگەكانی دروشمی كەم ژیان و كەڵ ژیانیان هەڵگرتووە، ئەمەش وایكردووە بە حزبی شەهیدان بناسرێت و لەهەموو رۆژێك شەهیدی هەبێت.

بۆیە كاتێك ئەو حزبە رۆژێك دیاری دەكات بۆ شەهیدان. ئەمە فەخرێكە كە یەكێتییەكان جیا دەكاتەوە لە حزب و رێكخراو و بزووتنەوەكانی تر. چونكە هەردەم باسی قارەمانێتی و شەهیدو یەكێتیی بەیەكەوە دێت. بۆیە كاتێك یەكێتیی كۆنگرەی چوارەمی بە سەركەوتوویی بەست و ناوی نا كۆنگرەی نوێبوونەوە، بۆیە چ لە گوتاری هاوسەرۆكان بێت، یان بەیاننامەو پەیامەكانی مەكتەبی سیاسیی بووبێت، بایەخی زیاتر بە شەهیدان و كەسوكاریان دراوە، تەنانەت لەهەموو هەنگاوێكی نووێبوونەوە، شەهیدان و كەسوكارەكانیان لە پێشی پێشەوەن و هەردەم جێگای شانازیین.

ئەوەتا لە یەكەم بەیاننامەی یادی دامەزراندنی یەكێتیی لە 1/6/2020، كە دوای كۆنگرەی نووێبوونەوە بوو، تەئكید لەوە دەكاتەوە، كە هەر هەنگاوێك بۆ لەمەودوا دەبێت لە پێناوی ئاسوودەبوونی رۆحی شەهیدەكانمان بێت. چونكە لەپێناوی ئایندەی كوردستاندا، یەكێتی هەزاران پێشمەرگە و سەدان فەرماندە و سەركردەی قارەمانی بەختكردووە، هەربۆیەش لەلایەن كۆمەڵانی خەڵكەوە، نازناوی حزبی شەهیدانی پێ خەڵاتكراوە. بوونی شەهیدانی سەربەرزی یەكێتی لە هەموو پێكهاتە جیاوازەكانی كوردستان، سەلمێنەری باوەڕی ئەو تێكۆشەرانەیە بە داكۆكیی هەمیشەیی یەكێتی لە ماف و ئازادییەكانیان و، نیشاندەری متمانەی كەسوكاریانە، بە ئامانجی رەوا و خەباتی روونی یەكێتییەكەتان.

بۆیە سەرۆكایەتی یەكێتیی لە یەكێتی نوێ، بە هیواوە لەگەڵ كەسوكاری شەهیدانن، باوەڕیان بە توانای ژنان و مامۆستایان و پیشەوەر و فەرمانبەران و سەرمایەدار و بازرگان و كاسبكارانی بازاڕ و رەنجدەرانی كوردەواری، لاوان و گەنجان و پێگەیشتووانی ئەم گەلە هەیە، كە باری لاری سەرشانی كوردستان ڕاست بكەنەوەو بێ دوودڵی، هەنگاو بەرەو سەركەوتن بنێین. لەم رێبازی چەپكە گوڵەشدا، كە هەڤاڵی كۆچكردوومان مام جەلال بۆی جێهێشتووین، دەرگای حزبی شەهیدان كراوەیە بۆ هەر دۆست و دڵسۆزێك، كە بیەوێت لە رێی یەكێتییەوە خزمەتی نیشتمانەكەمان بكات. ئێمە دەمانەوێت شوێنی شیاو بە كەسی شیاو پڕبكەینەوە و، ژینگەیەكی كاری حزبی و حوكمڕانیی ئەوتۆ بڕەخسێنین، كە تیایدا گەنجان و خاوەن بڕوانامە و پسپۆڕییەكان، خەڵكانی ئاسایی و دڵسۆز، هەموو چین و توێژەكان بێ جیاوازی و بە یەكسانی، بتوانن دەرفەتی پێشخستنی خۆیان و بەرەوپێشبردنی كوردستانیان بۆ بڕەخسێندرێت و هیوایان بەم نیشتمانە، بۆ بگەڕێنرێتەوە.

ئەمە جگە لەوەی هەردەم پرۆژە خزمەتگوزاریی و مرۆییەكانی یەكێتیی، كەسوكارو خانەوادەی شەهیدانی لە پێشی پێشەوە داناوە ئەمەش شانازییەكی ترە، كە یەكێتیی نوێ‌ درێژەپێدەری رێبازەكەی مام جەلالە، كە بۆ هەمیشە دەست لەسەر سنگ بوو بۆ گەورەیی شەهیدان ، چونكە پێی وابوو شەهیدان، چرای رۆشنكەرەوەی خەباتی داهاتووی یەكێتین و كەسوكاریشیان ئەمانەتە بەنرخەكەی تێكۆشانی مێژووی یەكێتیین.

 35 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*