سەرەکی » هەمەڕەنگ » ئەمە كەی ساڵێكە ئاسۆگیان!؟

ئەمە كەی ساڵێكە ئاسۆگیان!؟

لەساڵیادی خەفەبوونی پشكۆی پێكەنینە جوانەكانی ئاسۆ عومەر سوارەدا، ئاسۆی كیشوەرێك لەئاوەدانیی-یەك سەدەی رەبەقە وەك كەشتییەكی تێكشكاو لەكەناری بێئارامییدا جێتهێشتووم ئاسۆ گیان، سەد ساڵە، سەد ساڵ تەنیایی و سەد ساڵ داڕووخان بەناخی خۆمدا و سەدساڵ بێئۆقرەیی، سەدەیەك هاوار و بێدەنگیی و حەپەسان و بیركردنت، كەسەكەم.

مەچەكم شل بوو هێندە دەرگای بیرەوەرییەكانم كوتا، ئاوی چاوم داهات هێندە بەسەر ڕێی هاتنەوەتەوە ئەبڵەق بوون ئاسۆ خوێناوییترین حەسرەت لەدڵما ئەوەیە پێڕانەگەیشتم بەرلەوەی دواهەمین سەرنجت وەك باڵی كۆترەشینكەیەكی پێكراو هەڵوەرێت، باوەشێكی وات پێدابكەم كە مردن لەجێی خۆی عارەقەیەكی سارد دەربدات و پاشەوپاش تا بەردەرگای تەریقبوونەوە نەوەستێتەوە. مەراقێك كە هەتا قامی قیامەت لەدڵم نەبێتەوە ئەوەیە، ئەو بەیانییە بەر لەوەی مەرگ بەددانی ژەنگاوییەوە لەحەوشەكەتاندا بەدەماخێكی بەرزەوە مژی قووڵ لەجگەرەكەی بدات، تەق تەق لەدەرگاكەتانم نەدا و بڵێم ئەوە چییە تەمەڵ هێشتا لەخەو هەڵنەستاویت؟ تۆش بەدەم فڕكردنی چایەكەوە بەزەردەخەنەیەكەوە بڵێی ئەوە دیسان بەم سبای ساڵحانە یەخەت پێگرتینەوە!؟

نازانم و ناشمەوێت بزانم. تێناگەم و تازە ناشمەوێت تێبگەم چۆن پارچە سەهۆڵی ئەم كاسەسەرەم لەبەر تیشكی خۆری یەك سەدە دووریی تۆدا نەتواوەتەوە؟ چۆن ئەوەندە خەمساردبووم و تائێستا وەك رووناكیی لەناو گلێنەی خۆمدا نەمچاندوویت؟ چۆن بەو رادەیە ساویلكەبووم و چاوم لێ غافڵ كردیت تا مەرگ بەكەیفی خۆی سوار پاشووی ئەسپەكەیت بكات و شار بەشار و وڵات بەوڵات و ساڵ بەساڵ و سەدە بەسەدە بتڕفێنێت؟

بەرزان هەستیار- ئەڵمانیا

 215 جار بینراوە