سەرەکی » هەواڵ » كەركوك، یادی شەهید مامەڕیشە و هاوڕێكانی كرایەوە

كەركوك، یادی شەهید مامەڕیشە و هاوڕێكانی كرایەوە

كەركوك، كوردستانی نوێ

ئەمڕۆ لە كەركوك، رێوڕەسمێكی شایستە بۆ ساڵیادی شەهیدبوونی شەهیدی فەرماندە مامەڕیشە و هاوڕێكانی، رێكخرا.

لەڕێوڕەسمەكەدا، كە لەلایەن كۆمیتەی رێكخستنی شۆریجەی سەر بەمەڵبەندی كەركوك، لەناوبازاڕی شۆریجە رێكخراو ژمارەیەك لەئەندامانی سەركردایەتیی یەكێتی و رێكخستنەكان و ئۆرگانەكانی یەكێتی و چینوتوێژەكانی شارەكە، ئامادەبوون، وتاری كۆمیتەی رێكخستنی شۆریجە، خوێنرایەوە، كە تێیدا هاتبوو: ساڵانە یادی شەهید مامەڕیشە لەنزیك پەیكەری شەهید مامەڕیشە لەگەڕەكی شۆریجە رێكدەخەن، كە یادكردنەوەی ئەمساڵ جیاوازتر بوو لەساڵانی رابردوو.

پاشان، وتاری یەكێتیی نیشتمانیی كوردستان، لەلایەن رەوەند مەلا مەحمود ئەندامی سەركردایەتیی یەكێتی، خوێنرایەوە، تێیدا تیشك خرایە سەر مێژوو و خەبات و رۆڵی شەهیدی فەرماندە مامەڕیشە و هاوڕێكانی.

لەوتارەكەدا، ئاماژە بەوەشكرا كە یەكێتی لە هەموو سەردەم و قۆناغەكاندا، لەگەڵ ئازار و نەهامەتییەكانی خەڵكی كەركوكدا بووە، ئێستاش بەچەندین شێوە كار بۆ ئەوە دەكات ئەو دۆخەی لە پارێزگاكەو سنووری ناوچە دابڕێنراوەكاندا هەیە، چارەسەربكات، راشیگەیاند: بەهەوڵ و پشتیوانیی خەڵكی كەركوك، شكست بەتەعریبـی نوێ دەهێنین و كاردەكەین بۆ ئەوەی رەوشی خزمەتگوزاریی لە پارێزگاكەدا، بەرەوپێش بەرین.

لەكۆتایی رێوڕەسمەكەشدا، تاجەگوڵی رێزو وەفاداریی یەكێتی و چینوتوێژەكان، لە بەردەم پەیكەری شەهیدی فەرماندە مامەڕیشە دانران.

 81 جار بینراوە