سەرەکی » چاوپێکه‌وتن » كێشەكانمان لە بەغدا چارەسەر دەبن،هەر پڕۆژەیەكیشمان هەبێت،دەبێت بە تەوافوق لەگەڵ حكومەتی فیدرالیدا بێت

بەکر فەتاح لە دیداری کوردستانی نوێ-دا

كێشەكانمان لە بەغدا چارەسەر دەبن،هەر پڕۆژەیەكیشمان هەبێت،دەبێت بە تەوافوق لەگەڵ حكومەتی فیدرالیدا بێت

* هیچ رێگرییەک نییە لە بەردەم دەرچووانی کورددا بۆ دامەزراندن لە وەزارەتی دەرەوە

بەكر فەتاح باڵیۆزی پێشووی عیراق لەسویدو باڵیۆزی پێشووتر لەبەرازیل، لەدیدارێكدا لەگەڵ كوردستانی نوێ، كارو ئاستی نوێنەرایەتییەكانی عیراق لەوڵاتان‌و رۆڵی كورد لەم پرسەدا رووندەكاتەوەو دەڵێت: تائێستا لەسەر ئاستی باڵیۆز، دووجار باڵیۆز دانراوە، هەردوو جارەكە غەدر لەكورد نەكراوە، دەشڵێت: تەنها گفتوگۆ، چارەسەرە بۆ كێشەكانی حكومەتی فیدرال‌و هەرێمی كوردستان. ئاماژەی بەوەشدا ״سەرۆك مام جەلال لەهەموو روویەكەوە، بۆشاییەكی وای بەجێهێشتووە، بەهیچ كەسێك پڕنابێتەوە״.
دیداری، كوردستانی نوێ فۆتۆ: حەمە عومەر

ماوەی نزیكەی چوار ساڵە، شەڕی دژی تیرۆریستانی داعش لە عیراق، یەكێكە لە پرسە گەرمەكانی عیراق‌ و جیهانیش، بۆیە تاوتوێكردن‌و شێوازی مامەڵەی عیراق لەگەڵ ئەم پرسەدا، دەستپێكی دیدارەكەی كوردستانی نوێ بوو لەگەڵ بەكر فەتاح-دا، لەوبارەیەوە وتی: لەڕاستیدا روبەڕوبونەوەی تیرۆر، پرسێكی جیهانییە، راستە شەڕەكە زیاتر كەوتۆتە ناوچەكانی عیراق‌و سوریاوە، بەڵام هەڕەشەیەكی گەورەیە بۆ سەر هەموو جیهان، لەبەرئەوە عیراق هەوڵێكی زۆری دا بۆ ئەوەی لەشەڕی دژی تیرۆردا، نەك تەنها لەڕووی سەربازییەوە سەركەوتن بەدەستبهێنێت، بەڵكو توانی پشتیوانییەكی گەورە لەكۆمەڵگەی جیهانییەوە بەدەستبهێنێت، چونكە ئەوان خۆشیان دەیانزانی ئەوە شەڕێكی جیهانییە، بۆیە فیعلەن وایە كە عیراق لەجیاتی هەموو جیهان روبەڕوی ئەو شەڕە بۆوە، دەوڵەتەكانیش دیارە كۆمەڵێك میحوەر هەیە، میحوەرە هەرە گەورەكەیان كە هاوپەیمانیی ئەمریكی‌و ئەوروپاو هەندێك وڵاتی دیكەیە، پشتیوانییەكی زۆری عیراقیان كرد، هەروەها میحوەری روسیاو ئێرانیش پشتیوانیی عیراقیان كرد، چونكە دەیانزانی لەئەنجامدا ئەو شەڕە روبەڕوی ئەوانیش دەبێتەوە، لەبەرئەوە لەهەموو بوارێكدا هاوكارییەكی زۆری عیراق كراوە، بەڵام ئەوان هەموو جارێك باسی ئەوە دەكەن كە سەركەوتن بەسەر داعش‌و تیرۆردا تەنها لەڕووی سەربازییەوە بەس نییە، چونكە دەبێت بزانن دەركەوتنی ئەم رێكخراوە تیرۆریستییانە، هۆكارەكەی چی بووە، بۆیە پێویستە ئەو هۆكارانە لەڕەگ‌و ریشەوە چارەسەر بكەین، ئەگەر چارەسەری نەكەین، رەنگە رێكخراوی تیرۆریستی دیكەش دروست ببێت، وەكو ئەوەی هەموو جارێك دەوترێت داعش كوڕی قاعیدە بووە، لەوانەیە كوڕی داعشیش ببینین، ئەگەر چارەسەری بنچینەیی بۆ ئەو كێشەو گرفتانە نەكرێت كە بوونەتە هۆی دەركەوتنی ئەم رێكخراوە تیرۆریستییانە.

هۆكارەكانی دەركەوتنی داعش
بەكر فەتاح بەچەند خاڵێك ئاماژەی بە هۆكارەكانی دەركەوتنی رێكخراوی تیرۆریستی داعش، كردو وتی: یەكێك لە هۆكارە سەرەكییەكان، نادادپەروەریی كۆمەڵایەتییە، هەژاری، گەندەڵی‌و بڵاوبوونەوەی گەندەڵی، بۆیە پێویستمان بەوەیە ئەم هۆكارانە چارەسەر بكەین، بۆ ئەو مەبەستەش دەبێت هەموو عیراقییەكان بەشداریی بكەن لەحوكمدا. من زۆر لەگەڵ ئەوەدا نیم كە بەپێی كۆتاو موحاسەسە بێت، بەڵكو لەگەڵ ئەوەدام هەموو پێكهاتەكانی عیراق بەپێی تواناو لێهاتوویی، بەشدارییەكی كارا بكەن لە حكومەتدا، هەروەها دروستكردنی دامودەزگای جیاواز كە بتوانێت دادپەروەریی كۆمەڵایەتی دەستەبەر بكات‌و رێگە بگرێت لە گەندەڵی، چونكە دەتوانم بڵێم گەندەڵی مەترسیدارترە لە تیرۆریزم، ئەگەر گەندەڵی چارەسەر نەكرێت، دڵنیام رێكخراوی تیرۆریستیی توندڕەوتریش دێتە پێشەوە، لەبەرئەوە هەموو دنیای دەرەوە عیراقییەكان هان دەدەن بۆ ئەوەی بەزووترین كات هەنگاوی كرداری بنێن بۆ دروستكردنەوەو بنیاتنانەوەی ئەو دامودەزگایانەی كە دەبنە هۆی ئەوەی گەرەنتی بدەن بەوەی یەكسانی كۆمەڵایەتی لەناو عیراقدا دێتەكایەوە، هەروەها هانی بەشداریكردنی هەموو عیراقییەكان لەحوكمدا دەدەن.

گەڕانەوەی ئاوارەكان
ئەوەشی روونكردەوە، پرسێكی دیكەی گرنگ ئەوەیە كە ئێستا لەناو عیراقدا زیاتر لە سێ ملیۆن ئاوارەی ناوخۆ هەیە، پێویستە كاری جددییان بۆ بكرێت بۆ ئەوەی بگەڕێنەوە بۆ سەر ماڵ و موڵكی خۆیان، بۆئەوەش دەبێت هەموو خزمەتگوزارییەكانیان بۆ دابین بكرێت، ئەوەش پێویستی بە توانایەكی گەورەیە كە رەنگە عیراق لەم بارودۆخەی ئێستادا بەتەنها نەتوانێت مامەڵەی پێویستی لەگەڵدا بكات، لەبەرئەوە ئەرکی سەرشانی كۆمەڵگەی نێودەوڵەتییە كە هاوكاریی عیراق بكات، بۆ ئەوەی بتوانێت لە قۆناغی یەكەمدا شارەكان ئاوەدان بكاتەوەو ئاوارەكان بگەڕێنەوە بۆ شوێنی خۆیان. هەروەک بتوانێت سیستمێكی بەهێزیش دابنێت كە رێگری تەواو لە گەندەڵیی بكات.
باسی لەوەشكرد کە پێویستە عیراق نەچێتە ناو هیچ میحوەرێكەوە، بەڵكو دەبێت كار لەسەر ئەوە بكات كە رۆڵێكی ئیجابی ببینێت بۆ چارەسەركردنی ئەو گرفت و كێشانەی لە ناوچەكەدا هەن.

بەرژەوەندیی گشتیی عیراقییەكان بپارێزرێت
بەڵام پرسیار ئەوەیە بەكردەوە عیراق بەم شێوەیە مامەڵەی كردووە؟، لەوبارەیەوە وتی: بەكردەوە هەوڵمانداوە هاوسەنگییەك دروست بكەین، چونكە ئێمە ناتوانین نەخشەی عیراق بگۆڕین‌و بیبەینە شوێنێكی ترەوە، جوگرافیای عیراق لەم ناوچەیەدایە، لەبەرئەوە دەبێت كێشەكانمان لەگەڵ دراوسێكانماندا چارەسەربكەین، هەروەها پێویستە عیراق پەیوەندییەكی بەهێز لەگەڵ هەموو دراوسێكاندا دروست بكات، بۆ ئەوەی بەرژەوەندیی گشتیی عیراقییەكان بپارێزرێت.

پەیوەندییەكانی بەغداو هەرێم
لەبارەی پرسی پەیوەندییەكانی نێوان بەغداو هەرێمی كوردستان‌و شێوازی چارەسەری كێشەكانیشەوە، دەڵێت: جگە لە گفتوگۆو دیالۆگ، چارەسەری دیكە نییە بۆ كێشەكانی نێوان هەرێمی كوردستان‌و حكومەتی فیدرالی. دەبێت كێشەكان بەشێوەیەك چارەسەر بكرێن كە بەرژەوەندیی هەموو لایەك بپارێزرێت، ئەگەر ئەوە نەكرێت، رەنگە دۆخی عیراق بەرەو خراپتر بڕوات. پێویستیشە لێپرسراوانی هەردوولا لەئاستی ئەو لێپرسراوێتییەدا بن كە بتوانن كێشەكان چارەسەر بكەن، راستە لەدوای ریفراندۆم دۆخێكی نا ئیجابی‌و سلبـی دروستبووە لە نێوان هەردوولادا، بەڵام ئێستاش هەنگاوی باش نراوە بۆ چارەسەری كێشەكان، دیارە كورد لە 2003-دا رۆڵێكی گرنگ‌و بەرچاوی بینی لە دروستكردنەوەی عیراقدا، ئەو سەركەوتنانەش كە لە عیراق بەدەستهاتوون، هەم لەدژی تیرۆر، هەم لە دروستكردنەوەی عیراق، ئەگەر كوردی تێدا نەبووایە بەئاسانی ئەو سەركەوتنانە تۆمارنەدەكران، بۆیە ئێمە كە ئەو سەركەوتنانەمان بەدەستهێناوە، پێویستە سەركردایەتیی كوردستان بیر بكاتەوە كە شەریكە لەو سەركەوتنانە، نەك كورد دوورەپەرێز بگرێت. هەموو لایەك دەزانن كێشەكانمان لەبەغدا چارەسەر دەبن، هەر پڕۆژەیەكیشمان هەبێت، دەبێت بەتەوافوق لەگەڵ حكومەتی فیدرالیدا بێت.

رۆڵی سەرۆك مام جەلال
باڵیۆز بەكر فەتاح لەباسی رۆڵی سەرۆك مام جەلال-دا وتی: سەرۆك مام جەلال لەهەموو روویەكەوە، بۆشاییەكی وای بەجێهێشتووە، بەهیچ كەسێك پڕنابێتەوە. كەس ناتوانێت ئەو بۆشاییەی سەرۆك مام جەلال پڕبكاتەوە.

رۆڵی سوید
لەبارەی رۆڵ‌ و بۆچوون‌ و تێبینییەكانی سوید لە چارەسەركردنی كێشەكانی نێوان حكومەتی فیدرال‌ و حكومەتی هەرێم، وتی: حكومەتی سوید لەڕێگەی كەناڵی دیپلۆماسییەوە هەوڵیداوە رۆڵێكی ئیجابی ببینێت بۆ ئەوەی كێشەكان چارەسەر بكرێن، هەموو جارێك پێیان دەوتم دەبێت كێشەی نێوان هەولێرو بەغدا چارەسەر بكرێت، كێشەی نێوان هەولێرو سلێمانی چارەسەر بكرێت، ئەگەر ئەوانە چارەسەر نەكەن، ناتوانن داهاتوو بۆ میللەتەكەتان مسۆگەر بكەن. بۆیە ئەوان لە رێگەی كەناڵی دیپلۆماسییەوە هەوڵیانداوە، هەم لەڕێگەی پەیوەندییەكانیان لەگەڵ حكومەتی هەرێم، هەم پەیوەندییەكانیان لەگەڵ حكومەتی فیدرالدا. دیارە سوید وڵاتێكە بەشداریی نەكردووە لەهیچ لەو تەنگژە سەربازییانەی كە لەدنیادا روویانداوە، بەڵام پەرلەمانی سوید بڕیاریدا بەشدارییەكی كارا بكەن لە رووبەڕوبوونەوەی تیرۆردا ئەویش بەناردنی راوێژكاری سەربازیی بۆ هاوكاریكردنی پێشمەرگە، واتە هەم لەڕووی سیاسییەوە هەوڵیاندا هەموو لایەنەكان هان بدەن بۆ ئەوەی بتوانن لەڕێگەی گفتوگۆوە كێشەكانیان چارەسەر بكەن، هەم لەڕووی مرۆڤایەتییەوە هاوكارییەكی زۆ‌ریان ناردووە بۆ ئاوارەكان، هەروەها كۆمەڵێك ۆرکشۆپیان كردووە بۆ راهێنانی خەڵك‌و چۆنێتی گەشەپێدانی دیموكراسی لەناو كۆمەڵگەی عیراقدا.

پەیوەندییە دیپلۆماسییەكانی هەرێمی كوردستان
لەبارەی پرسی پەیوەندییە دیپلۆماسییەكانی هەرێمی كوردستانیشەوە، وتی: پەیوەندییە دیپلۆماسییەكان هەمیشە پشتیوانییەكی گەورە بوون بۆ ئەو بزووتنەوەو جووڵانەوەیەی كە لەناوخۆدا هەیە. لەڕاستیدا سەرۆك مام جەلال رۆڵێكی گەورەی بینی، ئەو لەپێش هەموو كەسێكدا دركی بەوە كردبوو كە پەیوەندییە دیپلۆماسییەكان بۆ یەكێتیی نیشتمانیی كوردستان، بۆ جووڵانەوەی ئازادیخوازیی گەلی كوردستان چەند گرنگە. چونكە ئەگەر ئێمە لەناو كوردستانیشدا بتوانین سەركەوتن بەدەستبهێنین، ئەگەر پشتیوانی دیپلۆماسی‌و پشتیوانیی دەرەوەت لەگەڵ نەبێت، ناتوانیت پارێزگاریی لێبكەیت، بۆیە لە قۆناغی یەكەمدا نوێنەرمان لەچەند وڵاتێك هەبووە، بەڵام لەقۆناغی دووەمدا كار لەسەر ئەوەكرا كە پەیوەندییەكانمان زۆر فراوانتر بێت. دیارە تۆ چەند لەناوخۆ بەهێز بیت، ئەوەندەش لەدەرەوە مامەڵەت لەگەڵدا دەكەن، ئەم پەیوەندییانەی ئێمەش پێشتر، پەیوەندیی دیپلۆماسی رەسمی نەبووە، پەیوەندیی دیپلۆماسی ناڕەسمی بووە، ئەوكات لێمان قبووڵكراوە، چونكە ئەوكاتە عیراق لەژێر دەستی دیكتاتۆرێكدا بووە كە هەموو دنیا ناسیویەتی. لەبەرئەوەی ئەو هێزانەی توانیویانە پەیوەندیی دیپلۆماسی دروست بكەن لەگەڵ وڵاتاندا، دەنگی واقعی راستەقینەی ئۆپۆزسیۆن بووە لەناو عیراق، بۆیە خەڵك گوێی لێگرتووەو هەموو وڵاتەكان بەپەرۆشەوە ویستوویانە پەیوەندییان لەگەڵ بكەن، بۆ ئەوەی بزانن چی دەگوزەرێت لەناو عیراقدا. بەڵام لەدوای رووخانی رژێمەوە ئیتر ئەو فەزایە گۆڕاو كورد بەشدارییەكی كارای هەبووە لە وەزارەتی دەرەوەی عیراقدا، هەم وەزیر كورد بووە، هەم چەندین باڵیۆزمان هەبووە، هەتا باڵیۆزەكانی تر جگە لە كورد، وەكو نەفەسی كورد قسەیان كردووە، كوردەكانیش بەنەفەسی عیراقی قسەیان كردووەو پەیوەندییەكانیان گەشەپێداوە لەگەڵ وڵاتانی تر، هەم باڵیۆزەكانی دیكەش بەهەمان شێوە. بۆیە جۆری پەیوەندییەكانی حزبەكان لەدوای 2003-ەوە گۆڕاوە. دیارە لەبواری دیپلۆماسیدا، ئێمە ئەزموونمان كەم بوو. لێرەشدا بەپێویستی دەزانم بڵێم هانی هەموو خوێندكارێك دەدەم كە بچێت لەبەغدا داوابكات دابمەزرێت لە وەزارەتی دەرەوە، چونكە ئەگەر وانەكرێت كادرمان لەم بوارەدا كەم دەبێتەوە. جا ئەوە من نایخەمە سەر ئەوەی حكومەتی عیراق نایەوێت، بەڵكو هەندێكجار خوێندكارەكانی خۆشمان ناچن لەوێ بخوێنن.

رێژەی كورد لە بواری دیپلۆماسیدا
لەوەڵامی پرسیارێكی تردا سەبارەت بە رێژەی كورد لەبواری دیپلۆماسیی عیراقدا، وتی: تائێستا لەسەر ئاستی باڵیۆز، دووجار باڵیۆز دانراوە، هەردوو جارەكە غەدر لەكورد نەكراوە، بەڵام ئێستا ماوەیەكی زۆرە باڵیۆز دانەنراوە، هەندێكیان خەریكە خانەنشین دەبن، دەبێت جێگەیان پڕبكرێتەوە، لەماوەی پێشوودا لیستێك پێشكەش بە ئەنجومەنی وەزیران كرا، رەزامەندیی لەسەر زۆربەیان دەربڕاوەو دەبێت بچێتە ئەنجومەنی نوێنەران‌و لەوێ پەسەند بكرێن، لەو لیستەدا خەڵكی بەتوانای كوردی تێدایەو هیچ غەدرێك لەكورد نەكراوە.
سەبارەت بە كاری نوێنەرایەتییەكانی حكومەتی هەرێمیش وتی: ئەوان رۆڵێكی باشیان هەبووە لە چالاكی جۆراوجۆر لە هەندێك بواردا، بەڵام لەڕووی چالاكیی سیاسییەوە، كوردستان بەشێكە لە عیراق‌و سیاسەتمان یەك سیاسەتە.

شێوازی كاركردنی باڵیۆزەكان
ئاماژەشی بەشێوازی كاری باڵیۆزەكان كردو وتی: لەوەزارەتی دەرەوەی عیراق لەدوای ساڵی 2003 بەپێی ئەو پەیڕەوو پرۆگرامەی كە هەیە لەناو وەزارەتدا، باڵیۆز پێنج ساڵ لەدەرەوە كار دەكات، دوای پێنج ساڵەكە، دوو ساڵ دەگەڕێتەوە بۆ وەزارەت، لەناو وەزارەتدا كۆمەڵێك فەرمانگە هەیەو یەكێك لەو فەرمانگانە وەردەگرێت، بۆ نموونە فەرمانگەی ئەوروپا، ئاسیا، ئەفریقا، وڵاتانی دراوسێ، ئابووری، دارایی، ئیداری هەیە، باڵیۆزەكە یەكێك لەو فەرمانگانە وەردەگرێت. بەڵام هەندێكجار ئەگەر پێویست بێت باڵیۆزەكە دوو ساڵەكەش تەواو ناكات، دەنێردرێت بۆ شوێنێك، یان هەندێكجار باڵیۆزەكە زیاتر لە پێنج ساڵەكە دەمێنێتەوە، چونكە پێویست بووە. ئێستا بۆ نموونە من دوای ساڵێك كە لەبەغدا بووم ناردیانم بۆ باڵیۆزخانەی عیراق لە بەرازیل، دەبووایە پێنج ساڵ بمێنمەوە، پاشان بێمەوە بۆ بەغدا، بەڵام دوای سێ ساڵ یەكسەر ناردیانم بۆ سویدو ماوەی چوار ساڵ و نیو لەوێ مامەوە، دەبوو من پێشتر بگەڕێمەوە بۆ بەغدا، بەڵام بەهۆی پێویستی، وتیان دەبێت بمێنێتەوە.
ئێستا هەندێك باڵیۆز هەن لە وەزارەتدا، هەندێك باڵیۆزیش زۆر لە دەرەوە ماونەتەوە. لەبەرئەوە دەبێت ئەوانە بێنەوە شوێنەكانیان‌و باڵیۆزەكانی ئێرە دەچنە دەرەوە، ئێستا لەجێگەی من، باڵیۆزێكی تر دەچێتە سویدو لەوێ كاردەكات.
دیارە لەهەندێك وڵات كە باڵیۆز دەگەڕێتەوە بۆ وڵاتەكەی خۆی، بۆ نموونە رەنگە 30 باڵیۆزیان هەبێت و 15 فەرمانگەیان هەیە، بۆیە باڵیۆزەكە دەچێتە ماڵەوەو ئەگەر شتێكیان پێویست بوو، ئاگاداری دەكەن كە بچێت بۆ وەزارەت، بۆئەوەی بینێرن بۆ وڵاتێكی تر.
وتیشی: لەوەزارەتی دەرەوە تائێستا هیچ شتێك نابینم لە جیاوازیكردن لەنێوان باڵیۆزەكاندا.
بەپێی زانیارییەكانی كوردستانی نوێ-ش ئێستا لە وەزارەتی دەرەوەی عیراق، بریکاری وەزارەت بۆ كاروباری ئیداریی‌و دارایی، سەرۆكی فەرمانگەی یاسایی، سەرۆكی فەرمانگەی ئاسیا كوردن، بڕیارە سەرۆكی فەرمانگەی ئەوروپاش وەربگرێت. هەروەها چەند باڵیۆزێكی عیراق لە ژمارەیەك لەوڵاتان كوردن.

بەڵێنەكان بەكردار بسەلمێنرێت
بەکر فەتاح تیشكیشی خستە سەر ئەوەی «پێویستە لە عیراقدا بەڵێنەكان بەكردار بسەلمێنرێت»، چونكە كۆمەڵگەی نێودەوڵەتی ئەو هەنگاوەیان زۆر بەلاوە مەبەستە. ئاماژەی بەوەشدا کە «دروستكردنی سیستمێكی دیموكراتی لە وڵاتێكی فرە نەتەوە، فرە ئایین و فرە رەگەزو فرە مەزهەب ئاسان نییە»، رەنگە بۆ هەندێك وڵات ئەوە خاڵێكی بەهێز بێت، بەڵام بۆ وڵاتێك كە 40 ساڵ لەژێر سایەی دیكتاتۆرییەتدا ژیابێت، 40 ساڵ خەڵك بێبەش كرابێت لە قسەكردن، وەكو مەنجەڵێكی گەورە وایە کە سەرقاپەكەیت داخستووەو لەپڕ سەرقاپەكەی دەكەیتەوە، بەو شێوەیە دەردەچێت. چونكە دیموكراسی سیستمێک نییە بەزۆر بیسەپێنی بەسەر كۆمەڵگەیەكدا.
لەدوای 2003-ەوە هەلێكی باش رەخسا بۆ ئەوەی بتوانین رژێمێكی دیموكراتی لەم وڵاتەدا دروست بكەین‌و ببین بەنموونە بۆ وڵاتەكانی تر، بەڵام كە نەكرا هۆكاری زۆری هەبوو، هەندێك وڵات هەر لە رووخانی رژێمەوە دژایەتییان كرد، هەروەها رووبەڕووی گەورەترین دوژمنی تیرۆریستی بووینەوە لەدوای 2003-ەوە، دیارە هەندێك رژێمیش پێیان خۆش نییە لەم ناوچەیەدا رژێمی دیموكراتی هەبێت، بۆیە هەوڵیانداوە نەهێڵن ئەم سیستەمە دیموكراتییە سەربگرێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ئایا ئه‌و پزیشكانه‌ی.. له‌ كاتی قه‌یرانه‌كاندا كاره‌كانیان به‌جێ هێشت.. بۆشاییان دروست كرد له‌ بواری خزمه‌تگوزاری ته‌ندروستیدا

محەمەد ره‌زا خزمه‌تگوزاری ته‌ندروستی به‌ گشتی له‌ كوردستان پێشكه‌وتن و ...