لە چەند هەفتەی رابردوودا، لە سنووری شاری سلێمانی چەندین باندی تیرۆریستی دەستگیركران، راستە جێگەی دەستخۆشی و خۆشحاڵییە، بەڵام ئاماژەن بۆ ئەوەش مەترسی و پیلان هەیە بۆ تێكدانی ئارامی شار و تێكدانی سەقامگیریی پایتەختی رۆشنبیری.
لە مێژووی خۆیدا، سلێمانی بەردەوام داهێنانی پێشكەش بە كوردستان و مرۆڤایەتی كردووە، هەر ئەمەیە وادەكات خەڵكی ناحەز و تیرۆریستان و ئەوانەی دژە مرۆڤایەتی و كوردن، چاویان بە سلێمانی هەڵنەیەت و بیانەوێ سیمای ناشیرین بكەن.
راستییەكی دیكەش هەیە، كە پەیوەندیی بە سستكردنی رۆڵی سلێمانیییەوە هەیە، بۆ ئەوەی كە داهێنان لە سلێمانی بوەستێنن، روونتریش بیانەوێ دڵگەورەیی شار بچووك بكەنەوە و بیكێشنە نێو شەڕێكەوە كە سروشتی خەڵكی سلێمانی دەمێكە دژیەتی.
سلێمانی دوژمنی زۆرە، لەبەرئەوەی داهێنانی زۆرە، چونكە سلێمانی دژی بیری كۆنەپەرستی و فاشیزمە، سلێمانی سەرقافڵەی بزووتنەوەی ئازادیخوازیی خەڵكی كوردستانە.
بنیاتنانی سلێمانی هەر لە سەرەتاوە لەسەر فرەیی و پێكەوەژیان و رەنگ و دەنگی جیاواز بووە، پێكهاتەی شار جۆراوجۆر بووە، هەر بۆیە بەردەوام خاوەن بزووتنەوەی دەنگە ناڕازییەكان و سەرقافڵەی داكۆكیكردن لە ئازادی و پێكەوەیی بووە.
هێزی زۆری كۆنەپەرست و تیرۆریست، كاری زۆریان بۆ شێواندنی سلێمانی و تێكدانی سایكۆلۆژیەتی خەڵكەكەی كرد، نەك هەر نەیانتوانی بگرە مەرگی خۆشیان بینی.
چی بزووتنەوەی كوردستانی هەیە، كۆڵەكەیەكی پێكهێنانی لە شاری سلێمانی بووە، لە سلێمانییەوە مەشخەڵی شۆڕش و بانگی ئازادی لێدراوە، رژێمی بەعس بە هەموو هێزییەوە هەوڵیدا سلێمانی سەرکوت بکات، نەك هەر نەیتوانی بگرە لەوێشەوە جاڕی كۆتییهاتنی درا.
سلێمانی نابێتە ئامێزی گەشەی هیچ رەوتێكی تیرۆریستی، هەر ئەوەش نهێنی ئازادیخوازی و رەوتی ئازادیخوازانەی سلێمانییە، پێویستە كۆتایی بە خۆتاقیكردنەوە بەرامبەر سلێمانی بهێنرێت، سلێمانی شاری مەرگی ئەو هێزانەیە دژی ئازادین.
ئاساییشی سلێمانی بەردەوامە لە پاراستنی سەقامگیری و گیانی هاووڵاتییان
