هەردوو دادگەهـ ل هەمبەر دادگەها پلاسخارت

10:12 - 2023-02-07
ئیمان ئامێدی*
340 خوێندراوەتەوە

دهاتە پێشبینیكرن پشتی پێكئینانا كابینا نووی یا حكومەتا عیراقی كێشە و گرفتێن هەلاویستیێن دناڤبەرا بەغدا و هەولێردا بهێنە چارەسەركرن، نەخاسمە دەربارێ‌ پرسێن دارایی و دابینكرنا مووچە و بودجێ هەرێما كوردستانێ، لێ‌ وەسا دەرنەچوو. 
بەروڤاژی وێ چەندێ دادگەها فیدراڵی چەكوچێ خۆ داوەشاندە سەرێ وان رێكەفتن و دهەڤگەهشتنێن زێدەتر ب شێوەیەكێ تیوری دناڤبەرا هەردوو دەسەڵاتاندا هاتینە گەڵاڵەكرن، نەك مۆركرن.
ل سەر گۆڕەپانا هەرێما كوردستانێ ژی ناكوكی و لێكترازان یا بەردەوامە، پشتی دەمەكێ درێژ یێ دابڕان و هەڤڕكیێ، بۆ ئێكەم جار ل 28ـ1ـ2023 مەكتەبێن سیاسیێن ئێكەتییا نیشتمانییا كوردستانێ و پارتیا دیموكراتا كوردستانێ كۆمبوونەك ل سلێمانیێ سازكر، كو پێشبینی دهاتەكرن ببیتە ئەگەرێ‌ بوهژاندنا پەیوەندیێن بەستیگرتیێن هەردوو حزبێن سەرەكی و دەرگەهەكێ خێرێ بۆ خەلكی ڤەبیت، لێ‌ دیسان دادگەها ئاسایشا هەولێر چەكوچێ خۆ لسەرێ‌ وێ دەستپێشخەریێ دا و جارەكا دی حەز و ئومێدێن خەلكی ڤەگەڕاندنە دلیس و كاڤلوژانكێ واندا.
هەتا رادەكێ زۆر بڕیارێن هەردوو دادگەها بوونە ئەگەر، جینین پلاسخارت نوونەرا تایبەتا نەتەوێن ئێكگرتی ل عیراقێ راپۆرتەكا نەرێنی دەربارێ‌ هەرێما كوردستانێ بتایبەتی بدەتە كۆمبوونا جڤاتا ئاسایشا نێڤدەولەتی، ئەوا ل ڕۆژا پێنجشەمبی رێكەفتی 2 ـ 2 ـ 2023 هاتییە سازكرن كو زەنگەكا مەترسیێ یە بۆ هەرێمێ.
د راپۆرتا خۆدا پلاسخارت زێدەتر ئاماژێن نەرێنی ئاراستەی حكومەتا هەرێمێ كرن و بڤی شێوەی.
* هەر پرسەكا گرێدای پێشڤەچوونێ بەحس كربیت، هەرێم و دەسەڵاتا وێ ژێ دڤەدەر بوون.
بەروڤاژی وێ چەندێ هەر ئاماژەكا خراب بەحس كربا، دەسەڵاتا كوردی ژی بخۆڤە دگرت.
* پلاسخارت د راپۆرتا خۆدا خۆیاكر كو حكومەتا بەغدا یا پێگیرە ب رێكەفتنێن خۆ دگەل هەرێمێ، لێ‌ دیار نەكر كو ل بەرامبەر وێ چەندێ هەرێم ژی پێگیریێ دكەت یان نە؟
* پلاسخارت بەحسێ بڕیارا دادگەها فیدراڵی ل دژی هەرێمێ ب خرابی بەحس نەكر.
* دەربارێ‌ رەوشا هەرێمێ پلاسخارت ب ئاشكرا گوت رەوشەكا خراب و بێسەروبەرە.
دماوێ كێمتر ژ دوو ساڵاندا، ئەڤە دووەم زەنگا مەترسیێ یە جینین پلاسخارت بۆ هەرێما كوردستانێ لێددەت، ئێكەم جار ل 19 ـ 5 ـ 2021 د كۆنگرێ‌ ئێكڕێزی و دەستووردا ئەوێ ل زانكۆیا كوردستان ل هەولێر هاتییە رێكخستن پلاسخارت دپەیڤەكێدا ب راشكاوی پەیامەك ئاراستەی دەسەڵاتدارێن هەرێمێ كر و گوت: ئەگەر چاكسازی نەهێنە كرن د وێ هزرێدا نەبن هەتا هەتایی ئەڤ قەوارێ‌ حوكمرانیێ (هەرێما كوردستانێ) بڤی شێوەی بمینت!
جڤاتا تەناهییا نێڤدەولتی بلندترین گوپیتكا برێڤەبرنا سیاسەتا جیهانێ یە، رەخنێن پلاسخارت ژی كو ئاراستەی هەرێما كوردستانێ و دەسەڵات و لایەنێن وێ یێن سیاسی كرین، نە گەفن و نە بوو ترساندنێ نە، بەلكو راستییە و بدوور ناهێتە زانین بۆ ئایندەكێ نێزیك نەخشێ سیاسیێ عیراقێ لسەر بهێتە داڕشتن و ئەنجام ژی دێ د وێرانكار بن.

رەخنێن پلاسخارت ژی كو ئاراستەی هەرێما كوردستانێ و دەسەڵات و لایەنێن وێ یێن سیاسی كرین، نە گەفن و نە بوو ترساندنێ نە، بەلكو راستییە

بەلێ‌ ل گورەی دیتن و پێشهاتان ژلایەكی ڤە كێشە و گرفتێن هەرێمێ و عیراقێ زێدەتر یێ ئاڵۆز دبن، ئەگەر چارەسەریێن بنەرەتی بۆ وان كێشە و گرفتان نەهێنە دیتن، چارەسەریێن بەروەخت گەلەك نا ڤەكێشن و وەكو یاریا زار و ماری بارودوخ دێ ڤەگەڕیتە چوارگۆشا ئێكێ.
 ژلایەكێ دیڤە ناكوكیێن حزب و لایەنێن سیاسیێن كوردستانی بەردەوام زێدە دبن، ئەگەر ب زووترین دەم پێنگاڤێن پراكتیكی نە هێنە هاڤێتن بەرەڤ ئاڤاكرنا سیستمەكێ مۆدێرن و هەڤچەرخێ حوكمرانیێ بدوور ناهێتە زانین هەرێم روو ب رووی روودانێن نەخوازراو ببیت.
 ئومێدەوارین وەكو كورد ئەم پێداچوونەكا هەمەلایەن د رەوشا خۆدا بكەین و هەوڵ بدەین ئاڤێ ڤەگەڕینینە دەراڤێن وێ.

*ئەندامی نوێنەرانی ئەنجومەنی عیراق

وتارەکانی نوسەر