کۆمێنت

09:23 - 2022-05-12
شیرین. ک
81 خوێندراوەتەوە

(5)

ئێواران

ساڵانێك خووم بە رۆمانەكەی بەختیار عەلی-یەوە گرتبوو، بەڵكو ئالوودەی (ئێوارەی پەروانە) بووم، لە سەرەتای مانگی دیسەمبەردا، هەر وەكو سرووتێكی تایبەت لەگەڵ كۆتاییەكانی پایز و سەرەتای زستاندا دەبوو ئەم رۆمانە بخوێنمەوە، لە نێوان ساڵی 1998 بۆ 2004 حەوت جارم خوێندەوە، بەڵام وا ئێستا هەژدە ساڵ تێپەڕیوە بەسەر دوایین جاردا كە خوێندوومەتەوە، ئاخۆ ئەگەر ئێستا بیخوێنمەوە هەمان ئەو سیحرەی جارانی دەبێت؟! خوێنەر لەهەر سەردەمێكی تەمەنیدا بە نووسەر و جۆرێك لە نووسین سەرسام دەبێت، مەرجیش نییە ئەو سەرسامبوونەی بەردەوام بێت، بەڵام دڵنیام جۆرە نووسەر و كتێبێك هەن كە سەرسامبوونمان پێیان بەردەوامە، دەڵێن خوێندنەوەی ئەو كتێبانەی كە پێشتر خوێندوومانەتەوە چێژێكی جیاوازی هەیە لەگەڵ یەكەم خوێندنەوەماندا، بەڵام چەند جارێك ویستوومە یەكێك لەو كتێبانەی پێشتر خوێندوومنەتەوە و پێیان سەرسام بووم بیانخوێنمەوە كەچی نەمتوانیوە لە خوێندنەوەیان بەردەوام بم، چونكە هەمیشە پەلەم بووە كتێبی تازە بخوێنمەوە، بەڵام چەند ساڵێك لەسەر یەك بەهەمان چێژەوە (ئێوارەی پەروانە)م خوێندەوە، ئاخۆ ئەگەر ئێستا ئەو رۆمانە بخوێنمەوە بەهەمانشێوە سەرسامم دەكات؟ لەگەڵ خوێندنەوەیدا هەست بە سەرمای ژێر هەرزاڵەكان دەكەم؟ ئەو خەمەی ئەوسا دامدەگرێ؟! خەمێكی خۆش بوو!! خەمێكی سەیر بوو!! هەستمدەكرد ئەوە حیكایەتی بێئومێدیی منە لە عەشق یان حیكایەتی كەسانێكە كە دەیانناسم، كەشوهەوای ئەو ساڵانە سیحرێكی تایبەتی دەبەخشییە رۆمانەكە، ئەوەتا لە دەفتەری ساڵی 2001دا نووسیومە: (هەر وەكو ئەوەی مرۆڤ نەمر نییە چەندە تەمەنیشی درێژ بێت لەچاو تەمەنی گەردووندا لەحزەیەكیش نییە، عەشقیش بە هەموو جوانی خۆیەوە تەمەنی چەندە درێژیش بێت لەچاو تەمەنی شتەكانی تری ژیانماندا زۆر كورتە، لەحزەیەكە زوو دەژاكێ و رەنگی دەپەڕێ، زوو دەمرێ، بۆیە ئەم رۆمانە حەزینترین حیكایەتی عەشقە، هەر جارێك كە دەیخوێنمەوە زیاتر قەناعەت دەهێنم كە عەشق چەندە تەمەنی كورتە و هیچ دەسەڵاتێكیشمان نییە. لەبەردەم عەشق و مردنا چەند بێدەسەڵاتین!).

وتارەکانی نوسەر