شەش مانگ بەسەر هەڵبژاردندا تێپەڕی و تائێستا هەنگاوەكان بەرەو پێكهێنانی حكومەت رێچكەی خۆیان نەگرتووە، پرۆسەی سیاسی لە عیراق دووچاری چەقبەستنێكی نائاسایی بووە و چەەندان دەستپێشخەرییش بۆ دەرچوون لەم رەوشە خراونەتەڕوو، بەبێ ئەوەی ببنە مایەی كلیلی كردنەوەی دەرگا داخراوەكان.
سەدرییەكان چەند دەستپێشخەرییەكیان بۆ چارەسەری تەنگژەكە خستەڕوو، بە هەمان شێوە چوارچێوەی هاوئاهەنگی، سەربەخۆكانیش دیدی خۆیان هەیە بۆ دەربازكردنی پرۆسەی سیاسی، بەڵام تائێستا هیچ كام لەو دەستپێشخەریانە كۆدەنگییان لەسەر دروستنەبووە و نەبوونەتە مایەی فریادەڕەس و بەلاداخستنی رەوشەكە.
لەگەڵ تەوابوونی ماوە دەستورییەكان، دەستپێشخەرییەكان بەردەوام دەبن و پرۆسەی سیاسیش لە قۆزاخەی چەقبەستوویی خۆیدا دەمێنێتەوە، تایەكە بەلایەكدا ناكەوێت و گەمەی سازدانی كۆبوونەوەی تایبەت بە هەڵبژاردنی سەرۆك كۆمار و لەگەڕخستنی درێژەدەكێشێت.
دەمارگیریی و توندڕەوی و سازشنەكردن، تارمایی خۆی بەسەر عەقڵی سیاسیدا كێشاوە و مل بۆ چارەسەرێكی لۆژیكی و گونجاو كەچ ناكات، ئەمەش بەدەر نییە لە دەستوەردانە ئیقلیمی و نێودەوڵەتییەكان كە لە ساڵی 2003وە ململانێكان ئاراستە دەكەن و بوار بە سەربەخۆبوونی بڕیاریی سیاسی لە عیراقدا نادەن.
رەوشی سیاسی ئێستای عیراق، لەنێوان پێكهێنانی حكومەتی رزگاریی نیشتمانی و رۆیشتن بەرەو هەڵبژاردنێكی تری پێشوەختە، یان مانەوەی رەوشەكە وەك خۆی و بەڕێكردنی كارەكاندایە لەلایەن حكومەتی كاربەڕێك كە بە هەلێكی زێڕین بۆ هەندێك لایەنی سیاسی دادەنرێت.
ئەوەی زیاتر لە واقیعی سیاسی ئێستای عیراقەوە نزیكە، مانەوەی حكومەتەكەی كازمییە كە دەیەوێت زیاتر لە دەسەڵاتدا بمێنێتەوە، تا جێ پەنجەی خۆی بەسەر زۆرێك لە كایە سیاسی و ئیدارییەكاندا بەجێبهێڵێت، هەرچی دەستپێشخەریشە بۆ كردنەوەی گرێكوێرەكان، گەمەكردنە لە كاتی زیادكراودا، بەبێ ئەوەی گۆڕانكاریی بەسەر ئەنجامەكەدا بێت.
تا كاتێكی نادیار، هاتن و چوون لەنێوان دەستشخەرییەكاندا بەردەوام دەبێت، بەجۆرێك نە ئەم بەدەستپێشخەریی ئەو قایل دەبێت، نە ئەوی دی دانی خێر بەدەستپێشخەریی ئەمدا دەنێت، هەوڵی پەلكێشكردنی یەكدی بۆ دروستكردنی گەوورەترین فراكسیۆن و كۆتایی هێنان بە گەمەی لەگەڕخستن لەسەر هەمان رێچكەی ئێستا دەڕوات و دواجاریش دەگەڕێنەوە بۆ چوارگۆشەی یەكەم و خاڵی سەرەتا.
بە مانایەكی تر، دەستپێخەرییەكانیش لە خزمەتی درێژەدان بە چەقبەستنی سیاسیدا دەبن و نابنە مایەی كۆتایی هێنان بەم رەوشە سیاسییە كە خەریكە ناكۆكییەكان دەگەیەننە ئاستێكی نەخوازراو و عیراقییەكان بەسەر دوو بەرەی جیاوازدا دابەش دەكەن.
