پێكئینانا حكومەتێ ئیرادە بۆ دڤێت
قوناغا ھەلبژاردنان بدووماھی ھات و ھەر حزبەكێ، سەنگا خوە زانی. پێشوەخت ھندەك حزبان ھەلویستێ خوە بۆ چوونا ناڤ حكومەتێ دیاركرییە و حزبێن خودان زێدەترین كورسی وەك (ئێكەتی و پارتی)، شاندێن خوە بۆ دانوستاندنان دیاركرینە و ئەگەر ل ژیێ حوكمرانییا ل ھەرێما كوردستانێ ژی بنێرین، سێ دەھك دەرباز بوون و نەھـ حكومەت ھاتینە پێكئینان و ئەڤ حوكمڕانییا ل ھەرێما كوردستانێ دھێتە دیتن، بدرێژترین حوكمرانییا كوردان دھێتەزانینێ و وەك چاڤدێرێن سیاسی ژی ئاماژێ بۆ دكەن، رەنگە پێكئینانا حكومەتا ڤێجارێ یا ب ساناھی نەبیت و ئەگەر بتنێ درووشمێن حزبان یێن ھەوا ھەلبژاردنان بخوینین، حزبێن سیاسیێن كوردستانێ ل سەر دوو بەرەیان ھاتبوونە دابەشكرن، بەرەیەكی ئەڤ حوكمڕانییا ل ھەرێما كوردستانێ ھەیی ب حوكمڕانیەكا نەدروست ل قەلەمددان و درووشمێ ھەمیان ژی گوھورین بوون د شێوازێ حوكمڕانیێدا و ل بەرەیێ دی، درووشمێ خوەراگریێ و بەردەوامیێ دھاتە بلندكرنێ و د خواندنەكا ڤان درووشماندا، بەرەیەك یێ دبێژیت ئەڤ شێوازێ بەری نوكە یێ حوكمرانیێ بدلێ مە نینە و دڤێت گوھورانكاری ب سەردا بھێن و بەرەیێ دی ژی ل سەر درووشمێ خوە یێ خوەراگریێ و شێوازێ ھەمان حوكمرانیێ یێ بەردەوامە و ئەڤە ژبلی كو دڤان زێدەتر ژ (30) سالێن دەربازبوویدا، ھێشتا دوو شوونەوارێن دوو ئیدارەیێ دھێنە دیتنێ و ھێشتا دناڤبەرا ھەردوو زوونێن كەسك و زەردا زالگەھێن خوە ھەنە و ھێشتا ھەر زوونەكێ ھێزا خوە یا تایبەت ھەیە و دڤی سەرۆبەندێ ھەنێدا، ئەگەر ئیرادەیەك بۆ چاككرنێ، بۆ گوھورینێ، بۆ خزمەتكرنێ، بۆ راگرتنا بەرژەوەندییا ھەرێمێ نەبیت، ئەگەر حكومەتەك ژ دایك ببیت ژی، دێ حكومەتەكا لەنگ بیت و نەشێت نوینەراتییا ھەرێما كوردستانێ بكەت و ھەكو ب كوردی دبێژن (پەرێ وەكی بەرێ) و چ ئومێدەك بۆ چارەسەرییا كێشێن ناڤخوو یێن ھەرێمێ و ئێكگرتنێ نابن، چ ئومێدەك بۆ ئێكڕێزییا ناڤ مالا كوردی نابن و دێ ھەر حزبەك خوە دەتە بەر سیبەرا ھێزەك و دەولەتەكا بیانی و ھیڤیدارین ئەڤە روینەدەت و حزبێن مە ب بەرپرسیارانە بەرەڤ دانوستاندنێن پێكئینانا حكومەتێ ڤە بچن و دووماھیێ ب ناكوكیێن خوە بینن و بەرژەوەندییا مللەتی و دەستكەفتێن مللەتی و ئێكڕێزییا مللەتی ل سەرووی ھەمی تشتەكی دانن.
