تاجی سەروەریی و مەدالیای زێڕین

عیماد ئەحمەد

هەروەک لە گێڕانەوەی یادەوەریی پێشومدا باسمکرد، لەو رۆژگارەدا مەڵبەندی کەرکوک بە هیمەت و دڵسۆزیی ئەندام و کادرەکانی و بە پشتیوانیی بێ سنووری رەوانشاد مام جەلال، بوو بە یەکێک لە مەڵبەندە هەرە سەرکەوتووەکانی یەکێتیی نشتیمانیی کوردستان، کۆمیتەکان لەسەر بنەمای جوگرافیی دابەشکرابوون و بە سیستمی مەرکەزیەتی دیموکراتیی کاریان دەکرد.
کاک عەلی شامار کەمتر بڕوای بە دیموکراتییەت هەبوو، بە تایبەت لە وڵاتانی جیهانی سێهەمدا، دەیوت: بڕیار بە دەست جاهیل و نەزانەوە بێت خەتەرناکە و بەڵا دروست دەکات.

لەو رۆژگارەدا مەڵبەندی کەرکوک بە هیمەت و دڵسۆزیی ئەندام و کادرەکانی و بە پشتیوانیی بێ سنووری رەوانشاد مام جەلال، بوو بە یەکێک لە مەڵبەندە هەرە سەرکەوتووەکانی یەکێتیی نشتیمانیی کوردستان، کۆمیتەکان لەسەر بنەمای جوگرافیی دابەشکرابوون و بە سیستمی مەرکەزیەتی دیموکراتیی کاریان دەکرد

هەڵبژاردنی کارگێڕی مەڵبەند
جارێک لە ناو ئەنجومەنی مەڵبەند، هەڵبژاردنمان بۆ (11) کارگێری مەڵبەند کرد، کاک عەلی و وەسفییە خان خۆیان کاندید کرد بۆ کارگێڕی مەڵبەند، لە هۆڵی رێکخستنی مەڵبەند پرۆسەکەمان ئەنجامدا، دوای تەواوبوون و خوێندنەوەی دەنگەکان، وەسفییە خان دەنگی زیاتری هێنا و سەرکەوت، بەڵام کاک عەلی دەنگی کەمتری هێنا و دەرنەچوو!.
من وەکو لێپرسراوی مەڵبەند، ویستم هەندێ قسە بکەم دەربارەی ئەم پرۆسەیە، کاک عەلی دەستی بەرزکردەوە پێش ئەوەی مەجالی بدەم، هاتە سەر ستەیجەکە و سوور و شین هەڵگەڕابوو، رووی دەمی کردە من و یەکسەر وتی: عیماد ناڵێم دیموکراتیەت ترسناکە و دادپەروەریی تێدا نییە؟!.
ئینجا بەدەنگی بەرز هاواری کرد: ئەوەی دەنگی بە من داوە دەیخەمە سەر سەرم، ئەوەشی دەنگی  بە من نەداوە دەیخەمە ژێر قۆندەرە، سەبارەت بەو قسانەی کاک عەلی، هەڤاڵانی ئەنجومەنی مەڵبەند هیچیان لە دڵ نەگرت، چونکە هەم کاک عەلی شاماریان وەکو برای گەورە سەیر دەکرد و هەمیش دەیانزانی تێکۆشەرێکی چەند راشکاو  و  پەرۆش و دڵپاکە، من کە زانیم کاک عەلی تەواو توڕە بووە و زۆر نیگەرانە، یەکسەر دەستم گرت و هێنامە خوارەوە و دواتر پێکەوە بە رێکەوتین بۆ سلێمانی و چووین بۆ لای کاک نەوشیروان، ئەوسا کاک نەوشیروان لە بیناکەی تەنیشت ریستۆرانتی شکار، دەوامی دەکرد، کاتێک کاک نەوشیروان کاک عەلی بەو شێوەیە بینی، وتی: عیماد، کاک عەلی بۆ وایلێهاتووە؟!
منیش وتم: لە هەڵبژاردنی دەستەی کارگێڕی مەڵبەنددا دەرنەچووە، ئەویش بۆ دڵدانەوە دەستی خستە سەر شانی کاک عەلی و وتی: کاکە خەمی چی دەخۆی تۆ هەر کاک عەلی شاماریت، دەربچیت یان دەرنەچیت.
هاتینە ماڵەوە، هەفتەیەک نەچووین بۆ دەوام، دوای هەفتەیەک رۆیشتینەوە بۆ مەڵبەند لە دەربەندیخان، بەڵام کاک عەلی هەر دواتر دەوامی نەکرد و لە ماڵەوە دانیشت.
  رۆژێک کاک پشتیوان ئەحمەد، ئەندامی مەڵبەندی کەرکوک بوو، رۆشتبوو بۆ لای کاک عەلی شامار لە ماڵەوە، سەلام لە کاک عەلی دەکات و دەیەوێت دابنیشێت، بەڵام کاک عەلی پێی دەڵێت: جارێ ناڵێم عەلەیکوسەلام و داشمەنیشە، بابزانم تۆ لە جەماعەتی سەرەکەی یان قۆندەرەکە؟!
ئەویش وتبووی بە ئیمامی عەلی و حەزرەتی عەباس، دەنگم بە تۆ داوە، ئینجا کاک عەلی وتبووی: عەلەیکە سەلام و فەرموو دانیشە.
 لە بەهاری ساڵی (1994)، بە هەڵبژاردن لە کۆبوونەوەیەکی سەرکردایەتی لە ماڵی مام جەلال لە هەولێر، لەگەڵ کاک دارۆ و کاک بەرهەم و کاک حەمە توفیق و شێخ محەمەد شاکەلی بووین بە ئەندامی (م- س).

کەرکوک بوو بە دوو مەڵبەند
لە سەرەتای ساڵی (1995)دا بە بڕیاری سەرکردایەتیی، مەڵبەندی کەرکوک بوو بە دوو مەڵبەند، مەڵبەندی کەرکوک و مەڵبەندی گەرمیان، مەڵبەندی کەرکوک کە بارەگاکەی لە تەکیە بوو، کاک عوسمانی حاجی مەحمود بوو بە لێپرسراوی  مەڵبەند و مەڵبەندی گەرمیانیش، کاک عەدنانی حەمەی مینە کرایە لێپرسراوی و بارەگای لە دەربەندیخان بوو، بەندەیش بووم بە لێپرسراوی بەشی رێکخراوە دیموکراتییەکانی سنووری مەڵبەندی سلێمانی و کەرکوک و گەرمیان، بارەگاکەشی لە سلێمانی بوو، بارەگای سەرەکیی رێکخراوە دیموکراتییەکان لە هەولێر بوو، کاک بەختیار لێپرسراوی بوو، کاک عارف روشدی لێپرسراوی رێکخراوەکانی سنووری مەڵبەندی دهۆک بوو، کاری رێکخراوەکان لەسەر بنچینەی پیشەیی بوو، مەڵبەندەکانیش بەشی رێکخراوە دیموکراتییەکانیان هەبوو، ئێمەش پەیوەندییەکی باشمان لەگەڵیاندا هەبوو، چالاکییەکان بە باشیی ئەنجام دەدران و بە هەردوولا سەرکەوتنی باش و نایابمان بەدەست دەهێنا. 
لەناو هەموو رێکخراوە دیموکراتی و پیشەییەکاندا، تەنها یەکێتیی ژنانی کوردستان سەر بە رێکخراوە دیموکراتییەکان نەبوو،  مام جەلال خۆی سەرپەرشتیی دەکرد، کە من ئەم پۆستەم وەرگرت بە رەزامەندیی یەکێتیی ژنان، مام جەلال منی کردە وەکیلی خۆی و من سەرپەرشتیم دەکرد. 

گەشەدان بەرێکخراوە پیشەیی و دیموکراتییەکان
لە راستیدا لەو سەردەمەدا لەگەڵ ژمارەیەک کادری زۆر چاک و چالاک و شارەزا، توانیمان گەشە بەرێکخراوە پیشەیی و دیموکراتییەکان بدەین و پەیمانگای کادران بۆ ئەم بوارە دابمەزرێنین لە سلێمانی، یەکەم خولیش بۆ خوێندکاران بوو، لە دوا رۆژەکانی مانگی تەمموزی ساڵی (1996)، مام جەلال بە ئامادەبوونی کاک عومەری سەید عەلی و کاک جوتیار نوری بابەتێکی نایاب و بەهێزی پێشکەش کرد، سەبارەت بە مێژووی بزووتنەوەی خوێندکاران و ئەزموونی خۆی لە پەنجاکانی سەدەی رابردوودا، لە رێکخراوی قوتابیان و بە وردیی باسی رۆڵی خوێندکارانی دەکرد، لە بزوتنەوەی سیاسیدا، ئای هۆڵەکە چەند گەرم بوو، جاروبار کارەباش دەکوژایەوە، زۆربەمان بێزار بووین لەو گەرمایە، بێجگە لە مام جەلال، کە بە حەوسەڵە بوو .
نامەوێت لەسەر ئەم کورتە زەمەنەی کاری رێکخراوەیمان بنووسم، چونکە لە «کتێبی بروسکە نامە»، لە پەڕەی (258)دا، مام جەلال لە نامەیەکیدا بۆ کاک نەوشیروان، ئەو کات کاک نەوشیروان لە لەندەن بوو، بارودۆخی یەکێتی بۆ شی دەکاتەوە و دەنووسێت: 
 3- (رێکخراوە دیموکراتییەکان لەوەتەی عیماد دەستی بە کار کردووە، زۆریان گەشە کردووە، بەتایبەتی خوێندکاران و ژنان، واخەریکە جوڵانەوی کرێکارانیش، (ریاضه)ش زۆر پەرەی سەندووە و زۆربەی زۆری (یانەکان) و (تیپەکان) دۆستی خۆمانن، ئەوە وێڕای لیژنەی ئۆڵمپی مەلا بەختیاریش)، ئەم بروسکە کورت و پوختەی سەرۆک مام جەلال، تاجی سەروەریی و مەدالیایەکی زێرینە بۆ ئێمە، چونکە دەرخەری چۆنایەتی کاری حزبیی و رێکخراوەییمانە لەو سەردەمانەدا.
*ئەندامی مەكتەبی سیاسیی (ی.ن.ك)

خوالێخۆشبوو عەلی شامار، عیماد ئەحمەد

خوالێخۆشبوو وەسفیە بەنی وەیس، عیماد ئەحمەد