هێشتا زانیاریی پێویست لەبارەی رۆڵی راستەوخۆی ئەمریكاو ئیسرائیل نییە لە دۆسێی روخاندنی رژێمی ئەسەد. راستە ناتەنیاهۆ، ناوبەناو جاڕیدەدات كە روخساری رۆژهەڵاتی ناوەڕاست دەگۆڕن، بەڵام ئەم هەڵوێستە پەیوەندیی بەو سەركەوتنە سەربازی و سیاسییانەوە هەیە كە لە غەززەو لوبنان بەدەستیهێناون نەك لەروخاندنی ئەسەددا. رۆڵی تەلئەبیب لە دۆخی سوریادا پەیوەندیی بە كاریگەرییەكانی پاشەكشەی بەرەی جەنگی بەوەكالەتی نەیارە تەقلیدییەكەیەوە(ئێران) هەیە لەسەر هێزو ورەی سیاسی و سەربازیی رژێمی ئەسەد، دەنا ئیسرائیل ئێستا لەدەورانی ئەسەد زیاتر زیان لەدەوڵەتی سوریا دەدات!. ناتەنیاهۆ هەر دوێنێ بوو بە شانازییەوە وتی: لەچوار رۆژی رابردوودا(320) پێگەی سەربازیمان لە سوریادا وێرانكردووە بەو ئامانجەی چەكی قورس و پێشكەوتووی ئەو رژێمە لە تانك و هیلیكۆپتەرو رۆكێت و موشەك و كارگەكانی بەرهەمهێنانی چەك نەكەونە ژێر كۆنترۆڵی گروپە چەكدارو ئیسلامییەكان. ئەمە بەڵگەی چییە؟ بەڵگەیە بۆ دڵەڕاوكێی تەلئەبیب بەرامبەر بەو گروپە چەكدارانەی كە حوكمی قۆناغی نوێی سوریایان كەوتۆتە دەست، ئەمە جگە لە هەڕەشەی راستەوخۆیشی لێیان ئەگەر بوار بە هەر رۆڵێكی نوێ بە ئێرانییەكان بدەنەوە، بەتایبەتی كە مۆساد ئاگاداری پەیوەندیگرتنی تارانە بە جۆلانییەوە وەكچۆن جۆلانی خۆیشی، لە تۆڕە كۆمەڵایەتییەكانەوەو بۆ نمایشكردنی زۆربوونی ژمارەی پاڵپشتیی ئیقلیمی، هەرزوو، كرانەوەی عیراقیشی بە رووی جەبهەكەیدا ئاشكراكرد كاتێك كە پەیوەندییەكی تەلەفۆنیی سودانی دزە پێكردو بڵاوی كردەوە.
هەرچی ئەمریكایە، ئەوا جگە لەوەی كە ترامپ دەستبەجێ رایگەیاند كە جەنگەكە پەیوەندیی بەوانەوە نییە، بەڵام ئەو و بایدن و زۆر سیناتۆرو فەرماندەی سەربازیی وڵاتەكەشی سوورن لەسەر پاراستنی نزیكەی 1000سەربازیان لە سوریاو رێگرتن لەگەڕانەوەی داعش و مانەوەی 80 %ی بەرهەمی نەوتی سوریا لەژێر كۆنترۆڵی هێزەكانی و هەسەدە. شیكاریی ترامپ بۆ روخانی ئەسەد، پاشەكشەی نفوزی ئێرانە لەناوچەكەو سەرقاڵبوونی روسیایە بە جەنگی ئۆكرانیاوە. جیا لەوە، سیاسەتی واشنتۆن لەدۆخی سوریادا ئەوەیە كە تێدەگات كەوتنی دیمەشقی ئەسەد، کە قەڵایەکی هاوپەیمانییەتی تاران و رژێمەکە و حزبوڵڵاو هەندێ لە میلیشاکانی عیراق بوو، ئاسایشی ئیسرائیل مسۆگەرتر دەكات، دەشزانێت كە سەقامگیری بەوزووانە لەو وڵاتەدا نایەتەدی، بۆیە هەلێكی مێژووییە بۆ ئیسرائیل كە ژێرخانی سەربازیی سوریا تەفروتونا بكات و دەسەڵاتێك لە دیمەشقی نوێ هەبێت كە نەك هیچ هەڕەشەیەكی بۆ سەر ئەلئەبیب نەبێت، بەڵكو وەك ئێستا لە وێرانكردنی ژێرخانی سەربازیی دەوڵەتی سوریاو داگیركردنی ناوچەی نوێ-یش لەجۆلان، بێدەنگی هەڵبژێرێت.!
ئەوەی كە شتێك دڵەڕاوكێ بۆ واشنتۆن و ئیسرائیل دروستدەكات، رۆڵی زێدەڕۆی توركیایە لەدۆسێی سوریادا. ئەوان نایانەوێ هەموو شتێك لەژێر كۆنترۆڵی ئەنقەرەدا بێت رەنگە تەنها بەو مەرجە نەبێت كە ئاسایشی ئیسرائیل و بەرژەوەندییە سیاسی و ئابوری و ئەمنییەكانی ئەمریكاو جڵەوكردنی پێگەی ئێرانییەكانیان بۆ گرەنتی بكات. لەم رووەوە، ئەنقەرە هەموو ئەوانەیان بۆ دەكات، لەبەرامبەردا بێدەنگییانی دەوێت لەوەی كە چی بە كوردی رۆژئاواو ئیدارەكەی دەكات، ئەمەش ئەو شتەیە كە حاڵی حازر روودەدات، زەرەرمەندیش تیایدا، تا ئێستا، كوردی رۆژئاوایە. دەمێنێتەوە كورد خۆی لەوێ، جگە لەجموجوڵی دیبلۆماسی، بەرەنگارییش بكات تا ئەو كاتەی كە جیهان دەگاتە ئەو باوەڕەی كە تاقە رێگا، هەروەك رۆژنامەی واشنتن پۆست بیری خستۆتەوە، گەڕانەوەیە بۆ بڕیارنامەی 2254ی ئەنجومەنی ئاسایش کە لە ساڵی 2015 پەسەندکراو داوای ئاگربەست و دامەزراندنی دەسەڵاتێکی گواستنەوە دەکات کە هەموو لایەنە بەشەڕهاتووەكانی سوریا لەخۆبگرێت و لەژێر چاودێری نەتەوە یەکگرتووەکانداو دوای 18 مانگ، هەڵبژاردنێكی گشتی بكرێت.
