وەك هێزێكی چەپ و دیموكرات، هاوكات پابەند بە هێڵێكی نیشتمانی كە لە رەوایەتیی دۆزی كوردەوەیە، یەكێتی باوەڕی بە هەموو گۆڕانكارییەكی سیاسی هەیە كە كۆتایی ستەم و، ئازادیی گەلان و سەركەوتنی دیموكراسیی، بەدوادابێت. لەسیاسەتیشدا ئاشكرایە كە بیروباوەڕ، پێویستیی بە ستراتیژو تەكتیكە، پەیوەندیبەستنیش لەگەڵ هەر سەرچاوەیەكی هێزدا كە ببێتە هۆی بەدیهێنانی ئەو ئامانجانەی كە هەر گەلێك هەیەتی و پارتە سیاسییەكانی هاندەدات كە رێسای دروستكردنی بەرژەوەندیی هاوبەشی بۆ بگرنەبەر.
پەیوەندیی یەكێتی و دەوڵەتی سوریا لە حەفتاكانی سەدەی پێشووەوە تا سەروەختی راپەڕینی گەلانی سوریا لە(2011ز)، دەرەنجامی كەڵكوەرگرتن بووە لەناكۆكیی ستراتیژیی نێوان هەردوو باڵەكەی بەعس لە عیراق و سوریا. ئەودەم دیمەشق، كە باڵی چەپی بەعس بوو، پاڵپشتیی لەهەر هێزێك دەكرد كە لەگەڵ بەعسی عیراقدا ناكۆك بووایە، یەكێتییش پاڵپشتی هەر هێزێكی ناوچەكەی قبوڵ بوو كە پشتیوانی لە شۆڕشی نوێی گەلی كورد بكات بەبێ ئەوەی پەیوەندیی لەگەڵ پارتە كوردییەكانی سوریادا بپچڕێنێت كە ئاڵا هەڵگری مافی گەلەكەمانن لەو وڵاتەدا. لەم رووەوە، هەموو رووداوەكانی ئەو مێژووە سەرلەبەر تۆماركراون، بەگشتییش لەپێناوی پرۆژەیەكی سیاسیی رزگاریخوازیدا بوون و هیچیتر.
كە گەلانی سوریا راپەڕین(2011ز)، هاوكێشەی كورد لەو وڵاتە، گۆڕانكاریی لەپەیوەندییەكاندا دروستكرد. خوالێخۆشبوو مام جەلال، لەروانگەی خوێندنەوەی سیاسەتی نێودەوڵەتییەوە، باوەڕی وابوو شەپۆلی بەهاری عەرەبی، رژێمی سوریا ناڕوخێنێت، لەوەشدا هەم مەبەستی بوو كە كورد نەكرێنە سوتەمەنی شەپۆلەكە كە ئەجێندایەكی دەرەكیی دژە كورد بەڕێوەی دەبات و وا بەداخەوە تائێستاش بەردەوامە!، هەم دەشیزانی روسیاو چین و ئێرانییەكانیش پاڵپشتی رژێمی ئەسەدن. لەمەشدا هەموو پێشبینییەكانی راست دەرچوون.
روخانی رژێمی سوریا دوای 13ساڵ، زادەی كۆمەڵێك گۆڕانكاری وەرچەرخێنەر بوو لە دیمەنی رووداو و پەیوەندییە نێودەوڵەتییەكاندا، لەوانە: شەڕی روسیا - ئۆكرانیا، شەڕی ئیسرائیل– غەززە، ئیسرائیل-لوبنان، سزا توندەكانی ئەمریكا لەسەر تاران، ململانێی بازرگانیی چین – ئەمریكا، پەرەسەندنی رۆڵ و نفوزی توركەكان لە رۆژهەڵاتی ناوەڕاست و باكوری ئەفریقیا. مام لە(2017)دا كۆچی دوایی كردو ئەم گۆڕانكارییانە هاومێژووی نەبوون، دەنا بەدڵنیاییەوە هەم خوێندنەوەیەكی نیشتمانییانەی بۆ ئاراستەی رووداوەكان دەبوو، هەم لەبەر رۆشناییشیان تەكتیك و ستراتیژی تری دەدۆزییەوە وەكچۆن لە دۆسێكانی عیراقدا هەم ئەمریكییەكان و هەم ئێرانییەكانیشی لەسەر یەك خوان كۆدەكردەوە، كە لەوەشدا هەم عیراق و هەم هەرێمیش سوودمەندبوون.
بێگومان یەكێتی، بێ خوێندنەوە نییەو نەبووە بۆ رووداوەكانی ئێستاش. جارێ لە 2011وە لە پەیوەندیدا بە سوریاوە، بەپێچەوانەی خواستی دیمەشق و ئەجێندای تری دەرەكی، بەردەوام رێزی لە ئیرادەی نوێنەرانی سیاسیی كوردی رۆژئاوا گرتووەو پاڵپشتی دۆزەكەیان بووە، زۆر لەمێژیشە هەر رایەڵێك لەگەڵ دیمەشقی ئەسەددا لەو چوارچێوەیەدا قەتیسكردووە كە لەخزمەتی چارەسەری كێشەی كوردانی رۆژئاواو پاراستنی ناوچەكانیان بێت. واتە كات و دۆزو هاوكێشەكان لەسوریا ئاراستەی پەیوەندییەكانیان گۆڕی بەلای ئیستحقاقی خەباتی رزگاریی نیشتمانیی رۆژئاوای كوردستان، بەتایبەتی كە پێكهاتەكانی تری گەلانی سوریا خاوەنی خۆیان هەیە!، بەردەوام پاڵپشتی ئیقلیمی و عەرەبی و دەرەكیی زۆریان هەبووە. كاتێكیش رژێمی ئەسەد دەكەوێت و ئیرادەی گەلانی سوریا، لەناویاندا گەلی كورد لە رۆژئاوا، سەردەكەوێت، یەكێتی بەئاشكرا پاڵپشتی لەئازادیی خەڵكی سوریا رادەگەیەنێت، سەرۆكەكەی و مەكتەبی سیاسی و سەركردایەتی و میدیاكەشی رێزی تەواو لە ئیرادەی گەلانی سوریا دەگرن، هاوكات بێ ترس لە داگیركەران خەمی ئایندەی وڵاتەكەو لەسەرویانەوە كوردانی رۆژئاوا دەخۆن، هەروەك لە تازەترین لێدوانی رەسمیی قوباد تاڵەبانیی ئەندامی(م.س)ی یەكێتییشدا دووپاتكرایەوەو تیایدا داوای مسۆگەركردنی مافی كوردانی رۆژئاوا دەكات لە سوریای نوێدا.
[email protected]
