ئاوات كۆكەیی
كتێبی (ئەوكاتەی مەرگ وەكو ژیان سەوزە) لە ئامادەكردنی ئەمیرە محەمەد، كە ساڵی رابردوو بەبۆنەی یادی 46 ساڵەی دامەزراندنی یەكێتیی نیشتمانیی كوردستان بە زمانی كوردی چاپ و بڵاوكرایەوە، ئەمساڵ وەرگێڕدرایە سەر هەردوو زمانی ئینگلیزی و عەرەبی و لە رۆژی 1/6دا كە دەكاتە یادی 47 ساڵەی دامەزراندنی یەكێتیی نیشتمانی كوردستان، بڵاودەكرێنەوە.
كتێبەكە بۆ عەرەبی بەهاوبەشی لە لایەن هەریەك لە دكتۆر فایەق مستەفا و دكتۆر دڵسۆز جەعفەر بەرزنجی-یەوە وەرگێڕدراوە، چاپە ئینگلیزییەكەشی پاسار شێركۆ وەریگێڕاوە، هەروەها ئارێز عەبدوڵڵا، لێپرسراوی مەكتەبی گەشەپێدانی بیروهۆشیاری پێشەكیی بۆ هەردوو بەرگە ئینلگیزی و عەرەبییەكە نووسیوە.
پڕۆژەی دیاریی ئازادیی، هەر جارەو بۆ بۆنەیەكی حزبی و نیشتمانی و بۆ شەهیدان و كەسایەتییە سیاسییە تێكۆشەرەكان، كتێبێك چاپ دەكات، پڕۆژەكە، هی (بۆردی ئەرشیف و مێژوو)ی مەكتەبی گەشە پێدانی بیروهۆشیاریی یەكێتیی نیشتمانیی كوردستانە، بەزنجیرە كتێبەكان چاپ دەكات.
ناوەڕۆكی كتێبەكە
ناوەرۆكی ئەم كتێبە بریتییە لە وتەی پۆلێك شەهیدی یەكێتی كە لە زیندان و دواین دیداردا (ئاخر مواجهە) لەگەڵ كەسوكارەكانیان كردویانە، ئەگەرچی وتەكان رازی سەرەمەرگن، بەڵام جارێكی تر دووپاتی ئەوە دەكەنەوە رۆڵەكانی گەلی كورد لە پێناوی ئازادیی نیشتماندا هیچ كات دەربەستی ژیانی خۆیان نەهاتوون و هەمیشە خوێنی خۆیان نەزری خەباتی رزگاریی خاك و نەتەوە كردووە.
هەر یەك لەو گفتوگۆیانەی نێوان شەهیدەكان و كەسوكارەكانیان رۆحی نەبەزین و ورەو ئیرادەیان لێ بەدیدەكرێت.
یەكەم گفتوگۆی شەهیدەكان لەم كتێبەدا، وتەیەكی شەهیدی سەركردە خاڵە شیهابە. كاتێك خاڵە و مامۆستا جەعفەر عەبدولواحید و كاك ئەنوەر زۆراب بەرەو پەتی سێدارە دەبرێن، هەر یەكێكیان ویستبووی خۆی پێش بكەوێت و زووتر لە سێدارە بدرێت، ئیتر خاڵە شیهاب پێگەی لێپرسراوێتیی خۆی بەكار دەهێنێت و پێیان دەڵێت: (من بەر پرسیاری هەموتانم و پێش دەكەوم، دەبێت دوا بڕیاریشم جێبەجێ بكەن).
شەهیدێكی دیكە بەر لەوەی لە سێدارە بدرێت، لە هەڵوێستێكی هاوشێوەدا بە حەسرەتەوە بۆ كەسوكارەی دەدوێت: (زۆر خەمبارم، پێنج هاوڕێیان پێش من برد بۆ لە سێدارەدان، ئاخ من دەمویست یەكەم كەس بم).
ژنێكی گەنج-یش كە تەنها یەك هەفتە بەسەر زەماوەندەكەیدا تێپەڕیوە، نیوە شەوێك هێزێكی قواتخاسە دەدەن بەسەر ماڵیانداو (تازەزاوا) دەبەن، دواتر ژنەی تازەبوكیش دەبەن و دەڵێت: (شەوێك بردیانمە ژووری ئەمن سورەكە، بمرم یاخوا مێردەكەمیان هەڵواسیبوو، كارەبایان لێ دەداو پێیان دەوت ئیعتراف بكە، ئەگەر ئیعتراف نەكەی)... و ئیتر هەڕەشەی دەستدرێژی كردنە سەر تازەبوك لە مێردەكەی دەكەن.
وتەكانی بەر لە گوللەبارانكردن و لە سێدارەدان كە لەم كتێبەدا بڵاوكراونەتەوە زۆرن، تەواوی وتەو گفتوگۆكانی نێوان قارەمانەكانی زیندان لەگەڵ دایك و باوك و خوشك و براو هاوسەرو منداڵ و كەسوكاریان، موچڕك بە جەستەی خوێنەردا دێت.
كتێبەكە
ئەوكاتەی مەرگ وەكو ژیان سەوزە، نووسین و ئامادەكردن: ئەمیرە محەمەد.
چاپ: چاپخانەی حەمدی
تیراژ: 1000 دانە و 138 لاپەڕە.
وەرگێڕانی بۆ عەرەبی: دكتۆر فایەق مستەفا و دكتۆر دڵسۆز جەعفەر بەرزنجی، 131 لاپەڕە.
وەرگێڕانی بۆ ئینگلیزی: پاسار شێركۆ، 128 لاپەڕە.