نزیکەی سێ ملیار دیناری بۆ تەرخانکراوە

گرفتی رێگەوبانی گوندەکانی گەرمیان چارەسەردەکرێت

بەڕێوەبەرایەتیی رێگەوبانی گەرمیان لە هەوڵێکی نوێدا پرۆژەی قیرتاوکردنی رێگەی چەند گوندێکی ناوچەکەی راگەیاند.
عەدنان خەلیل بەڕێوەبەری رێگەوبانی گەرمیان، بە کوردستانی نوێ-ی راگەیاند: پرۆژەی قیرتاوکردنی رێگەی گوندەکانی زەردی حەمە، زەردی قادر، زەردی خەلیفە، زێڕین، دووخڕان، سەر بە ناحیەی رزگاری لە سنووری ئیدارەی گەرمیان، بە درێژایى 7.7 کیلۆمەتر لە بواری جێبەجێکردندایە.
راشیگەیاند: بودجەی پرۆژەکە نزیکەی دوو ملیار و 972 ملیۆن دینارە و لەلایەن بەڕێوەبەرایەتیی رێگەوبانی گەرمیانەوە سەرپەرشتی دەکرێت.
روونیشیکردەوە: پرۆژەکە تا ئێستا 11 ٪ی جێبەجێکراوە و پێکدێت لە دروستکردنى (7.7) کیلۆمەترو بە یەک چینی ستابلایزەر، بە پانى 6.5 لەگەڵ دروستکردنى نزیکەى (27) ئاوبارەى کۆنکرێتى بە قەبارەى جیاواز، 13 گوندی سنوورەکە لێی سوودمەنددەبن.  ‏
گەرمیان، حسێن عەزیز