وەزارەتی كۆچ و كۆچەرانی عیراق رایدەگەیەنێت، ئاوارەكان نایانەوێت هەرێمی كوردستان جێبهێڵن، بۆیە ناتوانن سەرجەم كەمپی ئاوارەكان لە عیراق دابخەن.
بەپێی راگەیەنراوێكی وەزارەتی كۆچ و كۆچەرانی عیراق، پاش باشبوونی رەوشی ئەمنی و كۆتاییھاتنی مەترسییەكانی گروپی تیرۆریستی داعش، زیاتر لە دوو ساڵە وەزارەتەكە ھەوڵ دەدات سەرجەم كەمپی ئاوارەكان بەتایبەت كەمپەكانی ھەرێمی كوردستان دابخات، بۆ ئەوەی ئاوارەكان بگەڕێنەوە بۆ شوێن و ناوچەكانیان بەڵام ئەو هەوڵانە سەرکەوتوو نەبوون.
وەزارەتەکە راشیگەیاندووە: هەرچەندە ھەموو كارئاسانییەكیان بۆ كراوە بەڵام، تائێستا نەیانتوانیوە سەرجەم كەمپەكان دابخەن چونكە، بەشێكی زۆر لە ئاوارەكان دەیانەوێت لە كوردستان بمێننەوە نەک بگەڕێنەوە ناوچەکانی خۆیان.
