له‌ یاده‌وه‌ریی تێكۆشانی عه‌لی وه‌رمه‌زیاری دا

11:18 - 2022-04-25
ڕاپۆرت
528 جار خوێندراوەتەوە

تێكۆشه‌ری نه‌مر عه‌لی ئه‌حمه‌د سلێمان ‎ناسراو به‌ عه‌لی وه‌رمه‌زیاری، ساڵی 1964 له‌ گوندی وه‌رمه‌زیاری ناوچه‌ی بازیان له‌ دایكبووه‌، هه‌رچه‌نده‌ خۆیان له‌ تیره‌ی دۆڵه‌چه‌وتی جافن، به‌ڵام به‌هۆی گونده‌كه‌یانه‌وه‌ نازناوی وه‌رمه‌زیاری وه‌رگرتووه‌،‌ له‌ بنه‌ماڵه‌یه‌كی هه‌ژار و جوتیاردا پێگه‌یشتووه‌، ساڵی 1970 له‌ گوندی گاوانی خراوه‌ته‌ به‌رخوێندن و سه‌ره‌تایی ته‌واوكردووه‌، هه‌رچه‌نده‌ له‌ خوێندندا زیره‌ك بووه‌، به‌ڵام له‌به‌ر نه‌بوونی قوتابخانه‌ی ناوه‌ندی له‌ ناوچه‌كه‌یاندا نه‌یتوانیوه‌ درێژه‌ به‌ خوێندن بدات، له‌كۆتایی ساڵانی حه‌فتاكاندا چۆته‌ سلێمانی و بۆ دابینكردنی بژێوی خۆی و خێزانه‌كه‌یان شانیداوه‌ته‌ به‌ر كرێكاری، ساڵی 1979 له‌ رێگه‌ی دكتۆر عه‌لییه‌وه‌ په‌یوه‌ندیكردووه‌ به‌ رێكخستنه‌كانی ی.ن.ك-ه‌وه‌.
دوای شه‌هیدبوونی دكتۆر عه‌لی بووه‌ته‌ پێشمه‌رگه‌، له‌ هه‌رێمی پێنجی قه‌ره‌داغ،  له‌ دوای پێكهێنانی تیپه‌كان، چووه‌ته‌ كه‌رتی دووی بازیانی تیپی 57ی سه‌گرمه‌، پێشمه‌رگه‌یه‌كی ئازاو هۆشیاربووه‌، خۆشه‌ویستی ناو هاوڕێكانی و خه‌ڵكی گونده‌كان بووه‌، له‌ ماوه‌یه‌كی كه‌مدا كراوه‌ته‌ فه‌رمانده‌ی مه‌فره‌زه‌و دواتر جێگری فه‌رمانده‌ی كه‌رت.
به‌شداریی ده‌یان شه‌ڕو داستانی هێزی پێشمه‌رگه‌ی كردووه‌، ‎له‌وانه‌: داستانه‌كانی دابان- هه‌لاج، ‎رزگاری و شه‌ڕه‌كانی گوندی جێشانه‌، شارۆچكه‌ی ئه‌ڵڵایی و ته‌یناڵ و هه‌یاسی و شه‌ڕه‌كانی خۆرهه‌ڵاتی كوردستان، ساڵی 1985 له‌ هێرشكردنه‌ سه‌ر ره‌بایه‌كانی نزیك گوندی هه‌یاسی به‌ سه‌ختی برینداركراوه‌.
له‌ راپه‌ڕینی ساڵی 1991 رۆڵی به‌رچاوی هه‌بووه‌ له‌ رزگاركردنی ناچه‌ی بازیان و جۆشدانی جه‌ماوه‌ر بۆ هێرش و په‌لاماردانی ده‌زگاكانی و به‌عس و ئازادكردنی شارو شارۆچكه‌كان، به‌شداری ئازادكردنی كه‌ركوك و ده‌وروبه‌ری كردووه‌.
 دوای ڕاپه‌ڕین كاری رێكخستنی كردووه‌ له‌ كۆمیته‌ی ڕێكخستنی بازیان كراوه‌ته‌ كارگێڕی كۆمیته‌.
كادرێكی هۆشیارو رۆشنبیر بووه‌، به‌رده‌وام سه‌رقاڵی خوێندنه‌وه‌و په‌یداكردنی كتێبی‌ به‌نرخ بووه‌، به‌زۆری خولیای كتێبی‌ رۆشنبیری و مێژووی كوردستان بووه‌، به‌رده‌وام هانده‌ری هاوڕێ و كه‌سه‌ نزیكه‌كانی بووه‌ بۆ گرنگیدانی به‌ خوێندن و خوێندنه‌وه‌و خۆڕۆشنبیركردن.
مه‌خابن، له‌ ئه‌نجامی بریندارییه‌كه‌ی له‌ ساڵی 1985دا، تووشی نه‌خۆشی درێژخایه‌ن ببوو و به‌وهۆیه‌شه‌وه‌ له‌ رۆژی 5/4/2003 كۆچی دوایی كردو له‌ گۆڕستانی بازیان به‌ خاك سپێردرا.

بابەتە پەیوەندیدارەکان