شەرەفەدین جەباری
1
کتێبی: نێرگز لە دۆزەخی ئەنفالدا
کتێبی «نێرگز لە دۆزەخی ئەنفالدا» لە لایەن نووسەر و رۆژنامەنووس «عارف قوربانی»یەوە نووسراوە و ئامادە كراوە، لە بڵاوكراوەكانی دەزگای یادەوەریی كوردە و بە تیراژی 3000 دانە لە چاپخانەی حەمدی چاپكراوە، قەبارە مام ناوەند و دوو توێی (188) لاپەڕەیە.
نووسەر كتێبەكەی پێشكەش كردووە بە موختارەكەی دوبز و لە پێشەكییەكەیدا بەوردی باس لە چۆنییەتی و بیرۆكەی كتێبەكە دەكات لە كۆتایی 1999 یان سەرەتای ساڵانی دوو هەزارەوە و پاشان دەستیكردووە بە ئەنجامدانی چاوپێكەوتن و دیدار لەگەڵ خاتوو نێرگز و دواتر كۆی چاوپێكەوتن و دیدارەكان لەگەڵ چەندین وێنە و بەڵگە و نووسراو، لەساڵی 2020 لە كتێبێكدا بە كوردی چاپی یەكەمی پەخش و بڵاوكرایەوە.
خاتوو نێرگز كە ناسراوە بە (تات هەرمێ)، لە چاوپێكەوتنەكاندا كە هەروەك خۆی بڵاوكراوەتەوە و نووسەر لە هەر كوێیەكدا پێویستی كردبێت پەراوێزی نووسیوە، باسی ماجەرای ژیانی خۆیی و كەس و كار و خزمان دەكات لە سنووری لیوای كەركوكی دێرین. ئەو بەسەرهاتانە دەگێڕێتەوە کە لە گوندی سۆرانی قوڵایی و مامشەی ناحیەی لەیلان قەرەحەسەن و ناوەندی كەركوك بینیونی. هەروەها نەهامەتییەكانی ئەو رۆژگارانە و ئەنفالكردن و بردنیان بۆ تۆپزاوا و دوبز و زیندانیكردنیان و خۆبەخشانە كاركردن لە ناو زیندانەكە وەك مامان بۆ رزگاركردنی ژیانی چەندین ژنی دووگیان و منداڵەكانیان و نەخۆشەكانی دیكە لەو ماوەیەی كە لە زینداندابوون لە ساڵی 1988 دەگێڕێتەوە.
خاتوو نێرگز (تات هەرمێ)، مرۆڤێكی میهرەبان و كۆڵنەدەری كوردستانە و یەكێكە لە رزگاربووان لە دۆزەخی رەشەبای ژەهر و ئەنفال و تێیدا بە سەروماڵەوە وەکو هاووڵاتیانی ئەنفال دیدە، كەوتنە بەر ئەو شاڵاوە نامرۆڤانەی رژێمی بەعس لە قۆناغی «سێ»دا بۆ ناوچەكانی كەركوك و گەرمیان و لە ئەنجامدا هاوسەرەكەی ( كاك محەمەد حاجی ئەحمەد حەسەنی گوندی مامشە) و سێ برای و ئەو دوای كەسوكار، شەهید و گۆڕغەریب كران لە بیابانەكاندا.
خاتوو نێرگز و منداڵەكانیشی وەكو ئەو هاووڵاتیانەی كە قەدەر و هەلومەرجی ئەو كاتانە ژیانێكی دیكەی بۆ نووسینەوە، پاش بەسەر بردنی ماوەیەك لە زیندانەكان، دواجار رزگاربوون و رژێم لە ئۆردوگا زۆرەملێكانی سنووری چەمچەماڵ نیشتەجێیكردن.
« نێرگز لە دۆزەخی ئەنفالدا «، جگە لە زمانی كوردی، بە چەند زمانێكی تریش وەكو ئینگلیزی و فارسی بڵاوبۆتەوە و چاوەڕوانیش دەكرێت لە ئایندەشدا بەزمانی عەرەبیش بڵاوبكرێتەوە. چیرۆكەكەی خاتوو نێرگز، بەرجەستەیەكی زیندووە بۆ كارەسات و ناخۆشییەكانی گەلی كوردستان بە درێژایی مێژوو.
2
کتێبی:»بەڕێوەبردنی ململانێ»
ئەم كتێبە لە نووسین و ئامادەكرنی بەڕێز غەریب خالیدە، پێكهاتووە لە (164) لاپەڕەی قەبارە مام ناوەند و بەرگێكی قەشەنگ و (15) تەوەری سەرەكی بە پێشەكییەكەشەوە لە خۆگرتووە. بەتیراژی 500 دانە و ساڵی چاپی 2020 كەركوكە. لە بڵاوكراوەكانی مەڵبەندی (2)ی كەركوكی (ی. ن. ك)، بەشی گەشەپێدانی بیروهۆشیارییە.
نووسەر لە پێشەكی كتێبەكەیدا نووسیویەتی:»تێگەیشتن لە (بەڕێوەبردنی ململانێ) بە ئاگابوون و تێگەیشتنە لە هەموو كایەكانی ژیان و سیستمە كۆمەڵایەتییەكان، لە بواری ئابووری، كارگێڕی، رێكخستن و كۆمەڵگەدا.
كتێبەكە رەنگدانەوەیە بۆ واقیعی كۆمەڵگە مرۆییەكان و نووسەرەكەشی پشتی بە سەرچاوەی باوەڕپێكراو بەستووە و چەندین خشتە و راپرسی و داتای لە خۆگرتووە و خوێندنەوەیەکی گرنگە و كۆمەڵگە و ناوەندە فیكرییەكان پێویستیان بەم جۆرە كتێبانە هەیە.
3
کتێبی: مێژووی تەلەفیزیۆنی كەركوك (1967 - 1999)
ئەم کتێبە لە نووسینی هاشم جەبارییە، كوردستان 2021 ، لە بەڕێوەبەرایەتی گشتی كتێبخانە گشتییەكان، هەرێمی كوردستان، ژمارەی سپاردنی (853) ساڵی 2021 ی پێدراوە.
کتێبەکە پێشكەشكراوە بە هەموو ئەو كارمەندانەی شەونخوونی پەخش و بەرنامەكان بوون» و (392) لاپەڕەیە.
پێڕستی كتێبەكە لە سەرەتاوە ئاماژە دەكات بە تەوەرە سەرەكییەكانی وەكو وتەیەكی پێویست، پێشەكی، تەلەفیزیۆنی جارانی كەركوك، كەناڵی تەلەفیزیۆنی كوردی، گۆرانی و گۆرانی بێژان، بەڕێوەبەران، ئەندازیاران، دەرهێنەران، بێژەران، وێنەگران، بەرنامەكان، بەشەكان و تا دەگاتە ئەرشیف و كۆتا پەیڤ و ئەلبومی وێنە.
كتێبی (مێژووی تەلەفیزێونی كەركوك، 1967- 1999)، لە هەمان كاتدا بەشێكی گرنگ و زیندووە لە مێژووی شاری ئازیزی كەركوك و بەزمانی عەرەبیش دوابەدوای نووسخەكە كوردییەكەی چاپكراوە و كەوتۆتە بەر دیدی خوێنەران.
لەبارەی كتێبەكە نووسەر نووسیویەتی:»لەم كتێبەدا هەوڵمداوە هەرچیم لەبیرماوە یان پرسیارم لەبارەیەوە كرد بێت سەبارەت بە بەرنامە و دراما و برگەی دیكەی پەخشی تەلەفیزیۆنی كەركوك، بینووسم».
وەك بەندەش پێم باشە هەر وێنە و دۆكیومێنت و بابەتێك لای بەڕێزانێك كۆبۆتەوە كە خزمەت بە سوودی گشتی كۆمەڵگە دەكات وێنە و دۆكیومێنت و بابەتیان هەیە لەبوارە جیاجیاكانی خزمەتكردن بە رەوتی ئاوەدانی و پێشكەوتنی كۆمەڵگە بۆ ئەوەی پەرتەوازە نەبێت و نەفەوتێت، گرنگە بەڕێ و شوێنی دۆكیومێنتاری پێویست لە تەكیدا مامەڵە بكرێت، یان هەر رێگەیەكی تر بەچاك بزانرێت كاری لەسەر بكرێت بە تایبەت لە كتێبدا چاپ بكرێت.
4
کتێبی: «شیعرییەتی دەق، مەودایەك بۆ سازاندنی زمان»، لێكۆڵینەوەی رەخنەیی.
ئەم کتێبە نووسین و لێكۆڵینەوەی بەڕێز پڕۆفیسۆری یاریدەدەر، د. ئازاد عەبدولواحید كەریم، كەركوك 2017 ، چاپی یەكەم، ژمارەی سپاردن (129)، كتێبخانەی گشتی بەغدا، قەبارەی مام ناوەند (238) لاپەڕەیە، كتێبەكە پێكهاتووە لە دوو بەشی سەرەكی و دە تەوەر.
د. ئازاد نووسیویەتی: « شیعر لە بازنەی تەعبیركردن لە مەبەستێكی دیاریكراودا، هەوڵدەدات كەرەستەی قسەكردن بگەڕێنێتەوە بۆ سروشتی خۆی، بەو مانایەی كە وشە رەهایە و وەڵامدانەوەی ویستی مۆسیقا و تەعبیركردنە. ئیستاتیكای دەقی شیعریش حەتمییەتی خۆی لەوەدا دەسەلمێنێت، كە پێویستی بە مێینەكردن و مكیاژكردنی زمانی وشەیە لە ناو پرۆسەی رامانی قسە و بنیاتنانی یەكەیەكی ئۆرگانیزمیدا».
5
کتێبی: « شیكاری دەق، توێژینەوەی زانستی»
ئەم کتێیە نووسین و توێژینەوەی پڕۆفیسۆر، د. محەممەد ئەحمەد سەعید، (كەساس جەباری)، ساڵی چاپ 2016، دووتوێی (326) لاپەڕەیە.
نووسەر لە پێشەكی كتێبەكەدا نووسیویەتی:»ئەم كتێبە كە لە ژێر ناونیشانی شیكاری دەق دایە، بریتیە لە هەشت توێژینەوەی زانستی و ئەكادیمی تایبەت بە بواری ئەدەب و رەخنە دەربارەی رۆمان و شیعر و زمانەوانی و رەخنەی ئەدەبی.»
6
کتێبی:»میحوەری چواری كەركوك، قەڵغانی بەرگریی دژ بە هێرشەكانی داعش»
ئەم کتێبە لە نووسین و ئامادەكردنی بەڕێز محەمەد قەیتولی، فەرماندە لە هێزەكانی پێشمەرگەی كوردستان، كەركوك (2017) یە.
كتێبەكە دۆكیومێنتارییە و لە بەڕێوەبەرێتی گشتی كتێبخانە گشتییەكان ژمارەی سپاردن (1472)، ساڵی (2017)ی پێدراوە، لە دوو توێی 342 لاپەڕەدا چاپ بووە.
لەم کتێبەدا ئاماژەكراوە بە وردەكاری بەرگری هێزەكانی پێشمەرگە و شێكاری تواناكانی و نەبەردییەكانی هەروەها چەندین چاوپێكەتن لەگەڵ فەرماندەكانی میحوەری چوار و رۆڵی هێزە ئەمنیەكانی كەركوك لە پاراستنی شاری كەركوك و رۆڵی راگەیاندن و ئیدارەی هێزی پێشمەرگە و دوا بەشیش تەرخان كراوە بۆ دۆكیومێنت و وێنەكان.
كتێبەكە سەرچاوەیەكی گرنگە بۆ تێگەیشتن لە وردەكاری بارودۆخی ئەو كاتانە. نووسەر لە بەراییدا نووسیویەتی:» پێشمەرگە هەمیشە شورایەكی پۆڵاین، هێزیكی لەبن نەهاتوو، خاوەن ئیرادە و ورە بەرز بووە بۆ بەرگریكردن و پاراستنی خاكی كوردستان و نەتەوەی كورد لەو هێرش و مەترسیانەی كەوتونەتە سەر كوردستانی باشوور.»