سەرۆک بافڵ: کەرکوکییەکان خۆیان بڕیار دەدەن

04:22 - 2023-11-18
کوردستان
340 جار خوێندراوەتەوە

دەقی پەیامی  سەرۆک بافڵ جەلال تاڵەبانی سەرۆکی یەکێتیی نیشتمانیی کوردستان لە رێورەسمی ناساندنی کاندیدانی هاوپەیمانی کەرکوک هێزو ئیرادەمانە کە لەلایەن ئاسۆ مامەند سەرۆکی قەوارەی هاوپەیمانی کەرکوک هێزو ئیرادەمانە خوێندرایەوە: 


ئامادەبووانی بەڕێز 


سڵاوی سەرکەوتنی هاوپەیمانیی (کەرکوک هێز و ئیرادەمانە) لە ئێوەی خۆشەویست دەکەم.


خۆشەویستان

هاوپەیمانیی کەرکوک هێز و ئیرادەمانە، هاوپەیمانیی رەسەنی شاری کەرکوک و کەرکوکییە سەربەرزەکانە بە هەموو نەتەوە و پێکهاتەکانییەوە. بەرنەماکەشمان لەپێناوی قووڵکردنەوەی ئەو تەبایی، پێکەوەژیان و ئاوەدانکردنەوەی شارە خۆشەویستەکەدایە.

ئێمە هەمیشە باوەڕی تەواومان بە هاوبەشی و کاری پێکەوەیی هەبووە، ئەقڵییەتی خۆفەرزکردنمان لە بڕیار و بەڕێوەبردندا رەتکردووەتەوە و ویستوومانە هەموومان پێکەوە خزمەتی کەرکوکی قودسی کوردستان بکەین.  ئێستاش هاوپەیمانیی کەرکوک هێز و ئیرادەمانە، کۆتایی بەو سەردەمە دەهێنێت و چیتر بڕیار بۆ کەرکوکییەکان نادرێت، بەڵکو خۆیان بڕیاردەر دەبن، چارەنووسی خۆیان هەڵدەبژێرن و شەڕ لەپێناو مافەکانیان دەکەن.


ئێمە مێژوویەکی درێژمان لەگەڵ خۆڕاگری و قارەمانێتیی کەرکوکییە سەربەرزەکان هەیە، بۆیە دڵنیام ئێستاش بە هەمان ئیرادە و رۆحییەتەوە، بەرەو سندوقەکانی دەنگدان دەچن و ژمارە ١٤٢ی هاوپەیمانییەکەی خۆتان هەڵدەبژێرن و دەیسەلمێنن ئێوەن شەڕە راستەقینەکە بۆ کەرکوک دەکەن و لە قەڵا دێرینەکەی خۆتانەوە مژدەی سەرکەوتن بەگوێی هەموواندا دەدەن.

ئێمە کەرکوکمان لە دڵماندا هەڵگرتووە، کەرکوک هێڵە سوورەکەی ژیانی سیاسی و حزبیمانە، وەکچۆن لەرابردوودا خوێنمان بۆ رشت، لە داهاتووشدا هەر خۆمان پارێزەرە دڵسۆز و راستەقینەکەی دەبین. پێکەوە لەگەڵ ئێوەی دڵسۆز رووبەڕووی ئاڵنگارییەکان دەبینەوە و بەرامبەر مەترسییەکان دەوەستینەوە، تەعریب ریشەکێش دەکەین و خەونی بەدینەهاتووی دوژمنانی کەرکوک لەباردەبەین. بۆ ئەمەش پێویستە دەنگ بە هاوپەیمانیی کەرکوک هێز و ئیرادەمانە بدەن و قەڵغانێکی پتەوبن بۆ پاراستنی ئەو ئاشتی و پێکەوەژیانەی سەرۆک مام جەلال بناغەدانەری بوو و ئێمەش درێژەپێدەری دەبین.

بەڵێ بۆ سەرکەوتن و دەنگدان بە هاوپەیمانیی کەرکوک هێز و ئیرادەمانە
بەڵێ بۆ ئاشتی و ئاوەدانی
سەربەرزی و سەرفرازیش بۆ ئێوەی خۆشەویست


بافڵ جەلال تاڵەبانی 
سەرۆکی یەکێتیی نیشتمانیی کوردستان

#بافڵ جەلال تاڵەبانی #هەڵبژاردنی پارێزگاکانی ناوچە دابڕێنراوەکان

بابەتە پەیوەندیدارەکان