״رێككەوتنەكانی نێوان بەغدا و ئەنقەرە روونکردنەوەیان پێویستە״

11:08 - 2024-04-29
عیراق
191 جار خوێندراوەتەوە
سەعد موتەڵیبـی

ئیدریس جەبار

 سەركردەیەكی هاوپەیمانیی دەوڵەتی یاسا، لە لێدوانێكیدا بۆ كوردستانی نوێ، باس لەو كاردانەوە سیاسیانە دەكات كە دروستبوون، سەبارەت بە رێككەوتنەكانی ئەم دواییەی نێوان ئەنقەرە و بەغدا.
سەعد موتەڵیبـی سەركردە لە هاوپەیمانیی دەوڵەتی یاسا، رایگەیاند: «ئەو رەخنانەی لە حكومەتی عیراق دەگیرێن لەبارەی رێككەوتنەكانی ئەم دواییەی نێوان سودانی و ئەردۆغان، لەو بڕوایەدام بابەتەكە سیاسییە زیاتر لەوەی راستی بێت، ئاشكرایە كارەكانی حكومەت رووبەڕووی كاردانەوەی سیاسی دەبنەوە لەلایەن پەرلەمانەوە».
بە وتەی موتەڵیبـی: «فراكسیۆنە سیاسییەكان باسیان لەو هۆكارە راستەقینانە نەكردووە كە دەبێت ببنە رێگر لەبەردەم رێككەوتنەكانی نێوان عیراق و توركیا، پرسی ئاویش پێویستی بە تاوتوێكردنێكی تەواوەتییە، ئەوەی ئێستا هەیە تەنیا سەرە قەڵەمە و تەنیا باس لە ناوی پرۆژەكان كراوە و وردەكارییەكان نەخراونەتەڕوو». 
سەركردەكەی دەوڵەتی یاسا دەڵێت: «وردەكارییەكانی پەیوەست بە هەماهەنگی نێوان بەغدا و ئەنقەرە لەبارەی ئاوەوە روون نییە، گەر وردەكارییەكان خرانەڕوو، رەنگە ئەو دەمە لێكدانەوەیەكی قووڵترمان هەبێت بۆ بابەتەكە».

بابەتە پەیوەندیدارەکان