خەسرەو گورون
وەرزی 1991 – 1992 –ی خولی پلە دووی یانەكانی عیراق، وەرزێكی تایبەت بوو بۆ ئێمە، چونكە ئەوە وەرزە ئەو یانانەی بەشدارییان لە یارییەكانی ئەم خولەدا دەكرد، لە چوار گروپ یانەدا کۆ کردبوونەوە، ئەو چوار یانەیەی دوا تیپی ریزبەندیی هەر چوار گروپەكانی ئەم خولە بوون، دەبوو پاڵاوتنێكی تر بكەن بۆ ئەوەی دوان لەو چوار یانەیە، لەخولەكەدا بمێننەوە و دوانیشیان بۆ خولی پلە سێی یانەكانی عیراق دابەزن، ئێمەش ئەو وەرزە 1991-1992 دوا تیپی ریزبەندیی گروپی باكوری یانەكانی عیراق بووین، بۆیە كەوتینە ئەم گێژاوە و بەشداریی یارییەكانی ئەم قۆناغەشمان كرد.
ئەو وەرزە، تیپی تۆپی پێی یانەكانی عیراق، سەرجەمیان یان بەشداریی خولی پلە یەك بوون، یان بەشداریی خولی پلە دوو بوون، بەمشێوەیە تا خولی پلە چواری یانەكانی عیراق هەبوو، ئێمە وەك یانەی سلێمانی لە خولی پلە دوو دا بەشداربووین، لەبەر ئەوەی دواتیپی گروپی باكووری عیراق بووین، بەشداریی ئەم یارییانەشمان كرد و هەوڵمان دەدا لەم خولەدا بمێنینەوە. لەم قۆناغەی یارییەكاندا تیپی ئێمە (یانەی سلێمانی) لەگەڵ هەردوو تیپی یانەكانی بابل و ئیتیحادی بەسرە یارییمان كرد، یەكەم و دووەم یارییمان بە بابل و ئیتیحادی بەسرە دۆڕاند، یەكەمیان 1-0 بە بابل، دووەمیش بەهەمان ئەنجام بە ئیتیحادی بەسرە، لە یاریی سێییەمماندا كە یارییەكی یەكلاكەرەوەبوو بۆ مانەوە یان دابەزین لەم خولەدا، جارێكی تر بەر یانەی بابل كەوتینەوە.
یاریی یەكەممان رۆژی 7/7/1992 لە یاریگای حدود لە بەغدا كرد، دوو رۆژ دوای ئەم یارییە، دووەم یاریشمان هەر لە یاریگای حدود كرد، سێیەم یارییشمان كە یارییە یەكلا كەرەوەكە بوو، رۆژی 17/7/1992 كردمان، یارییەكە لە یاریگای كەشافە -ی شاری بەغدابوو، سەعات 5 ی عەسر دەستیپێكرد، ناوبژیوانان لە بەغدا بوون (حەسیب جیهاد، سەمیر مهەننا، فەلاح مەنفی)، مامۆستا ئازاد وەهاب سەرۆكی وەفدی ئێمە بوو، حەمە بچكۆل راهێنەر و ئازاد مستەفا یاریدەدەری بوو، سەرەنجام توانیمان ئەم یارییە 1-0 لە بابل ببەینەوە و بەمەش مانەوەمان لەخولی پلە دووی یانەكانی عیراقدا مسۆگەر كرد.
بۆ هەرسێ یارییەكە زۆبەی یاریزانەكان هەمان ئەو یاریزانانە بوون كە بەشداریی هەر سێ یارییەكەیان كرد، بە تایبەتی( رزگار عەلی گۆڵپارێز، خەسرەو گورون، شەهید هەرسین رەسوڵ، هادی كەریم، ئاسۆ رەشید، كاژاو كەمال، تایەری دەربەندیخان، ئالان قادر، رزە نێرە، جەعفەر تۆفیق، بەكر شێخ مستەفا، خوالێخۆشبوو شاهۆ حەمە فەرەج، بەكر رەشید، حەمەی هەڵەبجە، عەتا ساڵح، تەنیا حەسەن تەنیا، كامەرانی دەربەندیخان).
لەو سێ یاریەیدا ئێمە دوو گۆڵمان لێكرا و یەك گۆڵمان كرد، گۆڵەکەشمان لە یاریی سێیەمماندا بوو ئەوەیش بەختیار رەشید لە دەقیقەی 80 دا كردی، هەرچەند ئێمە پەناڵتییەكیشمان بۆ دروستبوو، بەڵام خەسرەو گورون گۆڵی نەكرد.
ساڵی 1992 ئەو كاتەی كە یەكێتیی تۆپی پێی عیراق بڕیاری ئەم یارییانەی دەركرد، ئێمە وەك تیپی یانەی سلێمانی لە بارودۆخێكی ناجێگیردا بووین، بەهۆی بارودۆخی خراپی ئەوكاتەی شاری سلێمانییەوە بەرچاومان روون نەبوو كە دەتوانین بەشداریی بكەین یان نا، خۆمان ئامادە نەكردبوو، بۆیە چەند یاریزانێكی سەرەكی وەك (رەفیق عەلی و ئامانجی سەید برایم و حەمەی كەریم و سەڵاحی شێخ ئەمین و نەزاد مستەفا) كە یاریزانانی سەرەكی تیپەكە بوون بەشداریی ئەم یارییانەیان نەكرد و بەو ژمارە كەمەی یاریزانەوە بەشدارییمان كرد.
