ئەکرەم ئەمین
کۆڵەکەکانی ئابووری زۆرن، ئابوری وەرزشیی یەکێکە لەکۆڵەکەکانی ئابووری، لە ئێستا لەئەوروپا و وڵاتە گەشە کردووەکاندا، گرنگییەکی زۆری پێدەدەن، ئابووریی وەرزشیی ڕۆڵێکی بەرچاوی هەیە لەگەشەی وەرزش و ئابووریی وڵات.
ئابووریی وەرزشیی کاریگەری گەورە و راستەوخۆی لەسەر گەشەی ئابووریی گشتی و گەشەی کۆمەڵایەتی و کەلتوری هەیە.
ئابووریی وەرزشیی چییە؟
ئابووریی وەرزشیی بریتییە لە کۆمەڵێک چالاک ئابووری لەچوارچێوەی پیشەسازیدا ئەنجامدەدرێن، وەک: بەرهەمهێنان و فرۆشتنی کاڵای وەرزشیی، تکتی یارییکردن، مافی پەخشکردن و فرۆشتنی بە کەناڵەکانی تەلەفزیۆن، گەشتکردنی وەرزشیی، هەموو ئەم چالاکییانە دەبنە هۆی دەستکەوتنی پارە و داهات و خوڵقاندنی هەلی کار و گەشە و زیادکردنی ئابووری و داهاتی وڵات و تاکەکەس. ئابووریی وەرزشیی کاریگەریی هەیە لەسەر سەرمایەی دەرەکی و ڕاکێشانی بۆ ناوخۆ، کە دەبێتە پاڵپشت بۆ ژێرخانی وەرزش و گەشتکردن و گواستنەوەو گەیاندن بەگشتی.
ئابووریی وەرزشیی و چالاکییەکانی دەبنە زیادکردنی پەیوەندی و گەشەی کۆمەڵایەتی بەشێوەی گروپ و تاک و ئاڵوگۆڕی کەلتوری لەنێوانیان و زیادکردنی ئارامی دەروونی.
ڕوڵی حکومەت لەگەشەی وەرزشدا
ئابووریی وەرزشیی لە وڵاتانی تر گرنگی زۆری پێدەدرێت، بەڵام لەکوردستان لەدۆخێکی سەرەتادایە و نەبۆتە هۆی گەشەی وەرزش و ئابووری.
بۆ نمونە وڵاتی قەتەر زیاتر لە 222 ملیار دۆلاری خەرجکرد بۆ رێکخستنی مۆندیالی 2022، ئامانج لەوە گەشەی ئابووریی و وەرزشیی بوو، هەروەها سعودیە لەئێستادا گرنگییەکی زۆر بەوەرزش دەدات، یاریزانی بەناوبانگ و ئەستێرە دەکڕێت بۆ ئەوەی سەرنجی ناوخۆ و دەرەوە بۆلای خۆی ڕابکێشێت کە لەکۆتایدا دەبێتە هۆکار و گەشەی ئابووری و کۆمەڵایەتی و کەلتوری و گەشتکردن.
