زاگرۆس نانەكەلی
لەسەرەتای ساڵانی هەشتاكان باوكی كۆچكردووم زۆرجاران کە ناحەقیەك یان نا دادییەكی ببینیایە دەیگوت: هەژار گڕووە!، لەسەر زاری هەولێریان گڕووە واتە (گەڕە) منیش دەمگوت بۆ باوكە؟ دەیگوت: چونكە هەژار هیچی نییە و حەقبێژە، بۆیە گڕووە، کەسی گڕووش كەس لێی نزیك نابێتەوە لەبەر ئەوەی نەخۆشییەکی پێسستە و ترسناکە و هەژاریش رێك وەك ئەو نەخۆشییە گڕووەیە، بەڵام من هەست دەكەم، ئەم پەندە نیوەی ماوە تەواو بكرێت، ئەویش میدیاكاری وەرزشی كوردیش پێم وایە ئەمیش گڕووە، گەر باسی بەڵگەش بكەین تا بڕوا بەمە بێنین، ئەوە بەڵگە هەیە و ئێستا بۆتانی بەیان دەكەم.
ساڵی 2012 كۆنفرانسێك لەسەر راگەیاندن و زمانی زبر لەهەولێر كرا، منیش نووسیم؛ لووتكەی زمانی زبر لەنێو راگەیاندنی وەرزشیی كوردیدایە، بۆچی بۆ ئەم كۆنفرانسە ئەوان داوەت نەكراون، مەبەستم میدیاكارانی وەرزشیی بوو، لەبری ئەوەی میدیاكارانی وەرزشیی پاڵپشتی ئەو رایەم بكەن، لای بەرپرسێكی ئێستای خانەنشین، خراپ بۆیان تێچەندبووم، بەهەر حاڵ ئەوە بوو بە مێژووێكی قێزەون.
دواتر چەندین كۆنفرانس و وۆرك شۆپ و سیمینار و کۆڕ و خول لەسەر راگەیاندن و زمانی زبر، بەچەندین ناونیشانی جۆراوجۆر بەڕێوەچوون، بەبێ ئەوەی یەك میدیاكاری وەرزشیی داوەتنامەی بۆ بچێت.
ئێمە كاتی خۆی كۆمەڵەی رۆژنامەنووسانی وەرزشییمان هەبوو، دواتر بووبە لیژنەی رۆژنامەنووسانی وەرزشی، تائێستا كە هیچمان دیارنییە، لەسەر ئاستی كۆمەڵە و لیژنە و رێكخراوی ناحكومی و كەسی، یەك میدیاكاری وەرزشی بەفەرمی بۆ هیچ کام لەو بۆنانە داوەت ناکرێن.
میدیای وەرزشیی لە كوردستان مێژوویەكی زیاتر لە (100) ساڵی هەیە، مێژووی وەرزشی كوردیش دێرینە و لەپێش زاینەوە هەیە، ئەوەی لەلام سەیرە داوەت نەكردنەكە نییە، بەڵکو ئەوەی سەیرە ئەوەیە ئایا ئەوان نازانن شتێك هەیە بەناوی میدیای وەرزشیی كوردی و میدیاكاری وەرزشیی كوردی؟ چونكە چەندین كتێب و رۆژنامە و بڵاوكراوەی وەرزشی كوردی هەن، یاخود ئێمەی میدیاكارانی وەرزشیی هیچ زانیاریمان لەم بارەیەوە نییە؟ خۆشمان گرنگیمان بە كۆڕ و كۆبوونەوە و سیمینار و وۆرك شۆپ نەداوە، تا تێكەڵ بە زمان و ئەدەب و فەرهەنگ و مێژووی نەتەوەکەمان ببین؟ ئەم بابەتە قورسە، چونكە هەست دەكەم هەردوولا گوناهبار و كەمتەرخەمین.
