دیدار؛ هه‌وراز كاوه
سه‌رۆكی یانه‌ی سلێمانی و به‌رپرسی ئێستای مه‌ڵبه‌ندی چه‌مچه‌ماڵی یه‌كێتیی نیشتمانیی كوردستان، سه‌ركه‌وت حه‌سه‌ن، له‌م دیداره‌دا باسی رە‌وشی یانه‌ی چه‌مچه‌ماڵ و خولی كوردستان ده‌كات.
سه‌باره‌ت به پشتگیرییه‌كانی بۆ یانه‌ی چه‌مچه‌ماڵ سه‌ركه‌وت حه‌سه‌ن وتی: وه‌رزش له‌مڕۆدا به‌پاره دەکرێت، یاریی تۆپی پێش بەتایبەتی، له هه‌موو یارییه‌كانی دیكه زیاتر پێویستی به پارەیە، بۆیه منیش وه‌كو سه‌رۆكی یانه‌ی سلێمانی و ئه‌و به‌پرسیارێتییه‌ی لەم شاره‌دا هه‌مه، بڕیارمداوه، هه‌رچیم بۆ بكرێت، خزمه‌تی یانه‌ی چه‌مچه‌ماڵ بكه‌م، بۆ ئه‌و مه‌به‌سته چه‌ند جارێک له‌گه‌ڵ ستافی یانه‌كه‌دا كۆبوومه‌ته‌وه، ته‌نانه‌ت له‌گه‌ڵ جه‌نابی قایمقامیش قسه‌م كردووه، بۆ وه‌رزی ئه‌مساڵ به‌ته‌واوی هاوكاریی دارایی تیپی تۆپی پێی یانه‌كه دەکەین، تا به‌باشی له خولی پله یه‌كی كوردستاندا یارییه‌كانیان بکەن.
له‌سه‌ر به‌شداریی یانه‌ی چەمچەماڵیش لە خولی كوردستاندا وتی: هه‌رچه‌نده خولی كوردستان بازنه‌یه‌كی داخراوه و سوودی گه‌وره‌ی بۆ یانه و یاریزانه‌كان نییه، به‌ڵام به‌شدارییكردنی یانه‌ی چه‌مچه‌ماڵ له خولی كوردستاندا پێویسته، چونكه ئه‌وان وه‌كو یانه‌ی سلێمانی و یانەکانی تری پاریزگاكان نین، تا بتوانن به‌شداریی خولی عیراق بكه‌ن، یاخود یاریزانەكانیان بچنه ئه‌و خوله‌وه، بۆیه ده‌بێت هەرچۆنێک بووە، پاڵپشتی دارایی بكرێن و له چالاكییه‌كانیان رانه‌وه‌ستن.
له‌سه‌ر خراپیی یاریگای یانه‌ی چه‌مچه‌ماڵ و چاككردنه‌وه‌ی یاریگاكه‌ش باسی ئەوەی بۆ کردین؛ بڕیاره له‌سه‌ر ئه‌و بڕە پاره‌یه‌ی بەڕێز قوباد تاڵه‌بانی بۆ چاككردنی یاریگاكان تەرخانی کردووە، یاریگای یانه‌ی چه‌مچه‌ماڵیش، به‌تایبه‌تی چیمه‌نی یاریگاكه نوێ بكرێته‌وه، بۆ ئه‌و مه‌به‌سته، تا ئه‌مڕۆ له‌گه‌ڵ سه‌رپه‌رشتیارانی ئه‌و كاره له‌سه‌ر خەتم و ده‌مه‌وێت به‌زووترین كات یاریگاكه نوێ بكرێته‌وه، چونكه هانده‌رانی ئه‌م شاره به‌شێكی گرنگی جه‌ماوه‌ری تۆپی پێی كوردستانن و شایا‌نی ئه‌وه‌ن خۆیان و تیپه‌كه‌یان له‌سه‌ر یاریگا و چیمه‌نێكی نایاب یاری بكه‌ن، هه‌روه‌ها له‌سه‌ر ئاستی هانده‌رانی كوردستان، خه‌ڵكی ئه‌م ناوچه‌یه هانده‌رێكی باش و بێ كێشه‌ن.
له‌سه‌ر بابه‌تی فره‌ڕەنگی و ده‌ستوه‌ردان له كاروباری یانه‌كه، سه‌ركه‌وت حه‌سه‌ت وه‌ك وەڵامی دوا پرسیار وتی: ئێمه ئه‌و فره‌ڕەنگی و پێكه‌وه‌بوونه‌مان پێخۆشه، هه‌ر كه‌سێك خزمه‌تی یانه‌كه بكات، ده‌مانه‌وێت پاڵپشتی بكه‌ین، ته‌نانه‌ت هه‌ر یاریزانێك له ریزی یانه‌كه بێت هه‌ر چۆنێك بیر بكاته‌وه، به‌ڵام رێز له پرەنسیپه‌كانی وه‌رزش بگرێت، ئێمه‌ش پاڵپشتی ده‌كه‌ین و یانه‌ی وه‌رزشیش ده‌بێت بۆ هه‌مووان بێت.
