شێروانە، یەك دەست و یەك دڵە

راهێنەری تیپی تۆپی پێی یانەی شێروانە باسی ئەوە دەكات، یانەكەیان لە خولی نایابی یانەكانی كوردستاندا لەریزبەندیی یەكەمدایە و هەوڵدەدەن ئەو پێگەیە لە دەست نەدەن.

عادل عەلی 

عادل عەلی،  راهێنەری یانەی شێروانە بۆ ستادیۆم رایگەیاند: هەرچەند یەك یاری قۆناغی یەكەممان ماوە، بەڵام لەنیوەی یەكەمی خولی نایابی كوردستانەوە پاڵەوانی خولەكەین، هۆكاری ئەمەش هەوڵی هەمەلایەنە و هەرەوەزیی دەستەی ئیداری و  راهێنەران و یاریزانەكانمانە، چونکە كۆدەنگی و تامەزرۆیی و یەك دەنگیمان هەیە، وەك یەك خێزانین، هەموومان پێكەوە ئەركی خۆمان بەجوانی جێبەجێ دەكەین و خواستی ئەوەمان هەیە ئەنجامی گەورەتر بۆ شێروانە بەدەست بهێنین.
لەبارەی خاڵی بەهێزی سەركەوتنەكانی شێروانەشەوە وتی: چەند خاڵێكی بەهێزمان هەیە، یەك دەنگی و یەك دڵی، لەلایەكی تریشەوە تیپەكەمان گەنجە، یەك دوو یاریزانمان هەیە تەمەنیان لەسەرووی 30 ساڵەوەیە، هەموویان گەنجن، هەروەها ئەو هەموو هاندەرە دڵسۆزەش بەلایەكی تر كە جمەیان دێت لە یاریگادا و لەگەڵ یانەكەیان تاكو كۆتا خولەك هانی تیپەكەیان دەدەن.
هەروەها باسی ئەوەشی بۆ كردین كە لەنیوەی قۆناغی یەكەمدا دوو یاریزانمان یانەكەیان بەجێهێشت، یەكێكیان هێرشبەرێكی بەتوانا بوو، ئەوی تریشیان گۆڵپارێزەكەمان بوو، ئەوەش بۆ یەك دوو یاری كاریگەریی خراپی هەبوو، بەڵام بەهاتنی گۆڵپارێزی دووەم، توانیمان لەسەر ئەنجامە باشەكانمان بەردەوام بین.
عادل عەلی باسی لەوەشیكرد: راستە ئێمە لەریزبەندیی یەكەمداین، هێرشبەرانمان سێیەم هێڵی هێرشبەرن لەخولەكەدا، بەڵام پێویستمان بەهێرشبەری ترە و بۆ قۆناغی دووەم یەك بۆ دوو یاریزان بۆ ئەو هێڵە زیاد دەكەین.
لەكۆتاییشدا وتی: تەواوی هەوڵمان بۆ پاراستنی ریزبەندیی یەكەمە لە  قۆناغی دووەمی خولی نایابی كوردستاندا تا ئەو هاندەر و دۆست و خەڵكە خۆشەویستەی گەرمیان دڵخۆش بکەین.