بارسیلۆنا باری گلاوی لە لالیگادا راست دەبێتەوە؟

ستادیۆم

یانەی بارسیلۆنا لە لالیگادا، بە بارودۆخێكی خراپدا تێپەڕ دەبێت و ئەنجامەكانی بەدڵی هاندەران و ئیدارەی یانەكە و تیمی راهێنەریی نییە.
لەگەڵ ئەوەی لە جامی سوپەری ئیسپانیادا ئاستێكی بێ وێنەی پیشاندا و جامەكەی بەرزكردەوە، ئەویش بە دوو بردنەوەی گەورە و بەنرخ لە ئەتلەتیكۆ بیلباو و ریاڵ مەدرید، كە گەڕانەوە ئیسپانیاش، بە باشی ساڵی 2025 ی دەستپێكرد و یاریی قۆناغی 16 یانەی جامی شای ئیسپانیای 5 - 1 لە ریاڵ بتیس بردەوە، بەڵام لە یەكەم یاریی لالیگادا، شەوی شەممەی رابردوو كەوتەوە داوی ئەنجامە خراپەكانی و لە مەدرید لەگەڵ خیتافی 1 - 1 یەكسان بوو، ئەم ئەنجامە خراپەش دوای ئەو ئەنجامە باشانەی جامی سوپەر و جامی شای ئیسپانیا، دڵخۆشكەر نین بۆ یانەكە، چونكە: ئەوە هەشتەم یاریی یەك لەسەر یەكە لە لالیگای ئیسپانیادا، تەنیا یەك یاریی بردووەتەوە، (1 بردنەوە، 3 یەكسان بوون و 4 دۆڕاندن)، واتە لەكۆی 24 خاڵ تەنیا 6 خاڵی كۆكردووەتەوە، 18 خاڵیشی لە دەستداوە.لە لالیگادا ئەم مانگە یەك یاریی تر دەكات و مانگی ئایندەش، شوباتی 2025، چوار یاریی تر دەكات، نازانرێت لەم پێنج یارییەی ئایندەشدا بەهەمان بارودۆخدا تێپەڕدەبێت و خاڵی بەنرخی تر لەدەست دەدات، یان باری گلاوی راست دەكاتەوە، بە تایبەتی كە بەم ئەنجامە خراپانە، لە لووتكەی ریزبەندیدا و بە 6 خاڵ لەپێش ریاڵ مەدریدی دووەمەوە بوو، لە پلەی یەكەمییەوە دابەزیووە بۆ پلەی سێیەم و تەنانەت ئەتلەتیكۆ مەردیدیش پێشی كەوتووە.
لەوەرزی 2004-2005 –ەوە ئەمە دووەم جارە بارسیلۆنا كەمترین خاڵ پاش تێپەڕبوونی 20 یاریی لە لالیگا كۆدەكاتەوە كە 39 خاڵە، لەو ساڵەوە تا ئێستا تەنیا یەك جار ئەمە روویداوە، ئەویش وەرزی 2021-2022 بووە كە بارسا 32 خاڵی كۆكردووەتەوە، جگە لەمانە، لەوەرزی 1974-1975 –ەوە ئەمە یەکەمجارە لە 8 یاریی یەک لەسەر یەکی لالیگادا و لە کۆی 24 خاڵ تەنیا 6 خاڵ کۆبکاتەوە، یەكەمین جاریشە پاش 17 ساڵ، بارسیلۆنا لە دوا هەشت یاریی لالیگادا یەك بردنەوە تۆمار بكات.
لەپاش بردنەوەكەیان 3 - 1 لە ئیسپانیۆل (هەفتەی 12)، ئەو هەشت یارییەی كە كردوویانە لە لالیگادا، ئەنجامەكانی بەمشێوەیە بوون:
-1 ریاڵ سۆسیداد 1 × 0 بارسیلۆنا (هەفتەی 13).
-2 سێڵتا ڤیگۆ 2 × 2 بارسیلۆنا (هەفتەی 14)
-3 بارسیلۆنا 1 × 2 لاس پاڵماس (هەفتەی 15).
-4 ریاڵ مایۆركا 1 × 5 بارسیلۆنا (هەفتەی 19 پێشخرابوو).
-5 ریاڵ بیتیس 2 × 2 بارسیلۆنا(هەفتەی 16).
-6 بارسیلۆنا 0 × 1 لیگانیس  (هەفتەی 17).
-7 بارسیلۆنا 1 × 2 ئە.مەدرید (هەفتەی 18).
-8 خیتافی 1 × 1 بارسیلۆنا (هەفتەی 20).
ئەم مانگە و مانگی شوباتی ئایندە، پێنج یاریی تر لە یارییەكانی لالیگا بەمشێوەیە دەكات كە بەرامبەریان ئەنجامی یارییەكانی چوونی نێوانیان نووسراوە، سێ یارییان لە یاریگای خۆیدا و دوو یارییان لە دەرەوەی یاریگای خۆیدا.
*لەو پێنج یارییەی دەیانكات، تەنیا یەك یارییان دۆڕاوە، ئەویش 1 - 2 بووە بە لاس پاڵماس و لە نێو یاریگای خۆیشیدا بووە، ئەم یارییەش لە لاس پاڵماس دەكات.
*بارسا 2 × 1 ڤالانسیا -هەفتەی  21(26/1).
*بارسا 3 × 0 د.ئالاڤیس-هەفتەی 22(2/2).
*سیڤییا 1 × 5 بارسا  -هەفتەی 23(9/2).
*بارسا 2×1 رایۆ ڤالیكانۆ-هەفتەی 24(16/1).
*لاس پاڵماس 2×1 بارسا -هەفتەی 25(23/1).