ئاوات كۆكه‌یی
شه‌هیدی سه‌ركرده سه‌عدی عه‌زیز حه‌مه‌ده‌مین ناسراو به‌سه‌عدی گچكه، له‌دایكبووی ساڵی 1943ی گوندی (سێبیران)ی نزیك قوشته‌په‌ی پارێزگای هه‌ولێره، هه‌رله‌وێ چۆته خوێندنگه‌ی ئاینی (حوجره)و تا قۆناغی فه‌قێیه‌تی خوێندووه، فه‌قێیه‌كی زیره‌ك و چاوكراوه بووه، دوای ئه‌وه‌ی له‌گوندی (دووگردكان) قوتابخانه كرایه‌وه، ئه‌ویش وازی له‌خوێندنی حوجره هێناوه‌و چۆته ئه‌و قوتابخانه‌یه، به‌و پێیه‌ی سه‌ره‌تایه‌كی باشی له‌خوێندنی حوجره‌دا به‌سه‌ربردبوو، بۆیه له‌قوتابخانه‌ی تازه‌دا هه‌ر یه‌كه‌مجار له‌پۆلی سێیه‌م وه‌رگیرا‌و پۆلی چواره‌میشی ته‌واوكرد.
به‌ڵام به‌هۆی پێداویستی ژیانی ئه‌و سه‌رده‌مه‌ی خه‌ڵكی لادێ و له‌به‌رسه‌ختیی باروگوزه‌رانی ژیانی ئه‌وسا، به‌ناچاری واز له‌خوێندن هێناو سه‌رقاڵی كاركردن بوو.
ساڵی 1960 له‌گه‌ڵ برایه‌كیدا به‌ناوی سابیر، چونه‌ته شاری هه‌ولێر و له‌گه‌ڕه‌كی سه‌یداوه نیشته‌جێ بوون، له‌وێ تێكه‌ڵ به‌خه‌ڵكی جیاواز بووه و ورده ورده‌ش ئاشنای دنیای سیاسه‌ت بووه.
ساڵی 1962 كراوه به‌سه‌رباز و ساڵی دواتر بووه به پێشمه‌رگه‌ی شۆڕشی ئه‌یلول له‌چه‌می رێزان.
به‌شداریی چه‌ندین شه‌ڕی كردووه له‌ناوچه‌كانی (ده‌شتی هه‌ولێر، ده‌شتی كۆیه، خۆشناوه‌تی، باڵه‌كایه‌تی)و زۆری دیكه.
یه‌كێك بووه له‌سه‌ركرده مه‌یدانییه‌كانی شه‌ڕی سێ مانگه‌ی شاخی ماكۆك‌و شیشار له‌ساڵی 1974و له‌و شه‌ڕه‌شدا بریندار كراوه، ئه‌و پلانه‌ی پێی سپێردراوه بریتیبووه له: سه‌رده‌سته، سه‌رپه‌ل، سه‌رلق و فه‌رمانده‌ی به‌تالیۆن، فه‌رمانده‌یه‌كی ئازابووه، له‌كۆتایی ساڵی 1974 به سه‌رپه‌رشتی راسته‌وخۆی شه‌هید عه‌لی عه‌سكه‌ری، هێزی قه‌ندیل داده‌مه‌زرێت، بۆ به‌رگریكردن له‌باره‌گاكانی سه‌ركردایه‌تی له‌سنووری دۆڵی شه‌هیدانه‌وه شه‌هید سه‌عدی گچكه به‌پله‌ی فه‌رمانده‌ی به‌تالیۆن گوازراوه‌ته‌وه بۆ ئه‌وهێزه.
ساڵی 1975 له هه‌ره‌سی شۆڕشی ئه‌یلولدا ئاواره‌ی ئێران بووه و له‌وێ له‌گه‌ڵ عه‌لی عه‌سكه‌ری، د. خالید، ره‌سوڵ مامه‌ند، عه‌لی هه‌ژار ، عومه‌ر ده‌بابه و چه‌ندین كه‌سایه‌تی دیكه له كۆبوونه‌وه‌كانی شاری ورمێ و دواتریش مهاباد به‌شداریی كردووه بۆ دروستكردنی بزوتنه‌وه‌ی سۆسیالیسیتی كوردستان.
مانگی 10ی هه‌مان ساڵ گه‌ڕاوه‌ته‌وه و له‌به‌غدا نیشته‌جێ بووه، به‌ڵام په‌یوه‌ندیی به‌رده‌وامیشی هه‌بووه له‌گه‌ڵ ئه‌ندامی ده‌سته‌ی دامه‌زرێنه‌ری بزوتنه‌وه.
رۆژی 8/8/1976 ئه‌ندامانی خێزانه‌كه‌ی له‌به‌غدا به‌جێهێشت و له‌گه‌ڵ هه‌ڤاڵه‌كانیدا به‌ره‌و شاخ به‌ڕێكه‌وت بۆ هه‌ڵگیرسانه‌وه‌ی شۆڕش، سه‌ره‌تا چووه بۆ قه‌ندیل و له‌مانگی 10/1976 گه‌ڕاوه‌ته‌وه ده‌شتی هه‌ولێر و ده‌شتی كۆیه‌و خۆشناوه‌تی و سه‌رپه‌رشتی یه‌كه‌م مه‌فره‌زه‌ی كردووه، یه‌كه‌م چالاكی پێشمه‌رگانه‌ش له 4/1/1977 له‌سه‌ر رێگه‌ی نێوان پیرمام- مه‌لائۆمه‌ری كردووه و برینداریش بووه.
له‌یه‌كه‌م كۆبوونه‌وه كه له‌كوردستان ئه‌نجام درا بۆ دیاریكردنی سه‌ركردایه‌تی یه‌كێتیی نیشتمانیی كوردستان له (دۆڵه گۆسته) له ساڵی 1977، به ئه‌ندامی سه‌ركردایه‌تی ده‌ستنیشان كرا، پێشتریش ئه‌ندامی سه‌ركردایه‌تی بزوتنه‌وه‌ی سۆسیالیستی بوو.
هه‌ر له‌سه‌ره‌تای شۆڕشی نوێدا تا كاتی شه‌هیدبوونی به‌شداریی و فەرماندەیی چه‌ندین داستانی كردووه و ئازایانه رووبه‌ڕووی دوژمن بۆته‌وه.
رۆژی 8/ 3/1978 له شه‌ڕه به‌ناوبانگه‌كه‌ی گوندی (ده‌شتێو)ی ناوچه‌ی قه‌ڵادزێ دژی سوپای به‌عس، شه‌هیدكرا و گه‌یشته كاروانی سه‌روه‌ران.
