ته‌ها كاریتانی شه‌هیدی راپه‌ڕینی هه‌ولێر

10:18 - 2025-03-10
ڕاپۆرت
87 جار خوێندراوەتەوە


 
شه‌هیدان ره‌مزی مقاوه‌مه‌ت و به‌رخودانی شۆڕش و گه‌وره‌ترین هێزی نیشتمانن، جوانترین دیاری خواوه‌ندن بۆ میلله‌ته‌كه‌یان، خۆشه‌ویستیی ئه‌وان بۆ خاك گه‌وره‌تربوو له‌ به‌رژه‌وه‌ندیی تایبه‌تیی خۆیان، بۆیه‌ هه‌میشه‌ ئازا و خۆنه‌ویست و به‌هێز بوون به‌رامبه‌ر دوژمن، یه‌كێكیش له‌و شه‌هیدانه‌، شه‌هید ته‌ها رۆسته‌م كاریتانی-یه‌.
شه‌هید ته‌ها گه‌نجێكی رۆشنبیری شاری هه‌ولێر و كوڕی خانه‌واده‌یه‌كی نیشتمانپه‌روه‌ر بوو، براو كه‌سوكاره‌كه‌ی پێشمه‌رگه‌ بوون و خاوه‌ن شه‌هیدی رێگه‌ی رزگاریی نه‌ته‌وه‌یین.
به‌داخه‌وه‌، له‌ سه‌ره‌تای یه‌كه‌م رۆژی راپه‌ڕینی هه‌ولێر شه‌هید كرا و خوێنه‌كه‌ی بووه‌ هه‌وێنی ئازادبوونی پایته‌خت.
 ژیاننامه‌كه‌ی
شه‌هید ته‌ها  رۆسته‌م  عه‌بدوڵڵا  سه‌عدون، له‌دایكبووی ساڵی 1963ی گوندی (كاریتان)ی ناحیه‌ی دیبه‌گه‌ی قه‌زای مه‌خموره‌.
ده‌رچووی كۆلیژی ئه‌ندازیاریی كشتوكاڵ، زانكۆی موسڵه‌.
ساڵی 1979 په‌یوه‌ندیی كردووه‌ به‌ رێكخستنه‌كانی یه‌كێتیی نیشتمانیی كوردستانه‌وه‌، 
ساڵی 1986 به‌هۆی ئه‌وه‌ی له‌ یادی له‌دایكبوونی سه‌دام حسێنی سه‌رۆكی دیكتاتۆری ئه‌وسای عیراق وێنه‌كه‌ی له‌سه‌ر سینگی نه‌داوه‌، له‌لایه‌ن  ئه‌منی دیبه‌گه‌وه‌ ماوه‌ی هه‌فته‌یه‌ك ده‌ستگیركراوه‌ و دواتر به‌هۆی واسیته‌وه‌، ئازادكراوه‌.
له‌ سه‌ره‌تای رۆژی 11/3/1991، له‌ سه‌ره‌تای ده‌ستپێكردنی راپه‌ڕین له‌ سنووری هه‌ولێر، له‌ (ده‌واجینه‌كانی ئه‌حمه‌د ئیسماعیل)، شه‌هیدكرا.  
حه‌یده‌رمه‌نتك

بابەتە پەیوەندیدارەکان