شەمەندۆفەری دیدار رووی لە کەرکوکە و رۆژی چوار شەممە (٢٦-٣-٢٠٢٥) هەڤاڵانی کەرکوک و سەڵاحەدین لە سەرجەم سێکتەرەکان گفتوگۆی گەرمی یەکێتیانە لەسەر روانگە و سیاسەتی لەمەودوای حزبەکەیان دەکەن.
لیژنەی باڵای دووەمین دیداری یەکێتی کۆبۆوە و هەڵسەنگاندنی پێویستی بۆ حەوت کۆنفرانسی پێشووی موسڵ، بادینان، هەولێر، هەڵەبجە- شارەزوور، گەرمیان- خانەقین، سلێمانی- چەمچەماڵ کرد و دەستخۆشی لە هەڤاڵانی تێکرای ئەو سنوورانە کرد کە بە جۆش و خرۆشی گەرمەوە بەهاری دیداریان سەوزتر کرد.
دەربارەی وێستگەی داهاتووش سکرتاریەتی دیداری یەکێتی بە کەناڵەکانی راگەیاند: رۆژی چوارشەممە ( ٢٦-٣-٢٠٢٥ ) کۆنفرانسی هەشتەمی دووەمین دیدار لە کەرکوکی قودسی کوردستانە و هۆڵی سەنتەری رۆشنبیری شایەتی گفتوگۆی هەڤاڵانی کەرکوک- سەڵاحەدین دەبێت لەسەر باشترین سیاسەت بۆ کەرکوک و کوردستان و عیراق و چاکترین رێوشوێنی یەکێتیانەش بۆ سەرخستنی ئامانجەکانی حزبی شەهیدان.
سەرجەم ئەم کۆنفرانسانە لە چوارچێوەی ئامادەکاریدان بۆ دیدارە گەورەکە بە ئامادەبوونی سەرۆک بافڵ جەلال تاڵەبانی سەرۆکی یەکێتیی نیشتمانیی کوردستان.
بە گوێرەی پەیڕەوی ناوخۆی پەسەندکراوی کۆنگرەی پێنجەم، دیداری یەکێتی چالاکییەکی رەسمیی دەورییە و بەشێکە لە وێستگەکانی خەباتی فراوانی هەڤاڵانە.
