دیدار: بادینان
پێشكێشكارە ل كەنالێ عەسمانیێ گەلی كوردستان/ بادینان و دەما مە ژێ خواستی ئەم بكەینە مێھڤانا كوردستانی نوێی بادینان؟ رازەمەندیا خوە دەربری و دڤیا بێژیت، ئەز كچەكم رەنگە دەهان كچێن دی لڤی باژێری هەبن و خەونا راگەهاندنێ یان كارێ ژ دەرڤە ل نك هەبیت و ل ھیڤیێ نە كەسەك رێكێ بۆ ڤەكەت و ئەڤ دیدارێن هەنێ دگەل ژنان د بیاڤێن جودادا، هاریكارن كو ئەو بهێنە پێش و شیانێن خوە پیشان بدەن، ژبەركو ژن پێكهاتەیەكا گرنگا جڤاكییە و دڤێت دروست رۆلێ خوە بگێریت.
ناڤێ وێ (ئاخرەت سلێمان)ە و بۆ دەمێ چوار سالانە ل سەر شاشێ دەردكەڤیت و دبێژیت: «راگەهاندن و دەركەفتن ل سەر شاشا تیڤییێ، خەونا من بوو و ئەز ب خەونا خوە شاد بووم». ئەڤە گوتنێن ئاخرەتێ بوون و دەما مە گوتیێ، ئەگەر گوتبانە تە ناڤەكێ دی شوینا (ئاخرەتێ) هەلبژێرە، دا چ ناڤ بیت؟ گوت: «دا هەر ئەو ناڤ بیت، ژبەركو ناڤدانان، هەلبژاردەیا ھندەك كەسێن دییە و ئەو ژی دەیك و بابێن مرۆڤی نە، ئەو چ ناڤ ل سەر زارۆكێن خوە دانن، دڤێت مرۆڤ رێزێ ل هەلبژاردەیا وان بگریت». لدوور پرسیارەكێ و وەك كچەكا حەز ژ كارێ خوە بكەت، ئەگەر بێژینە تە شیرەتەكێ ل وان كچان بكە یێن بڤێن بهێنە دناڤ كارێ راگەهاندنێ دا، دێ چ شیرەت كەی؟ ئاخرەتێ گوت: «نەبتنێ بۆ كارێ راگەهاندنێ، بەلكۆ بۆ هەر كارێ بیت، هەر كچا بڤێت شیانێن خوە دەربێخیت و چ ئاستەنگ نەكەڤنە درێكا وێدا، دڤێت خوە دگەل كارێ خوە ب گونجینیت. مەبەستا من ب گونجاندنێ، پێزانینێن خوە و شارەزاییا خوە دوی كاری دا پێش بێخیت و چ كارەك ب ساناھی نینە، ئێكەم تشت دڤێت مرۆڤی حەز بۆ هەبیت و دوەم تشت دڤێت بۆ وان حەزان كار بكەت و كچا سەركەفتی ئەوە یا ڤێ چەندێ بكەت». پێنەڤێت هەر كەسەكی هەلبژاردەیێن خوە بۆ ژیانێ هەنە و كەسێن سەركەفتی ژی ئەون یێن چەندین هەلبژاردە هەین، دەما مە گوتیە ئاخرەتێ، ئەگەر كارێ راگەهاندنێ نەبایە، دا چ كار كەی؟ گوت: «هەر چەندە وەك من گوتێ راگەهاندن، لێ ئەگەر راگەهاندن نەبایە دا كارێ دیزاینێ كەم و دیسان دروستكرنا تابلۆیان».
