لە یاریگای تیپە میللییەکانی شارەزوورەوە، بۆ زانکۆی مەنسورە -ی میسر

محەمەد عەبدولرەحمان

مالیک حەسەن نادر، ناسراو بە مالیکی مامۆستا خامۆش، ساڵی  1972 لەدایک بووە، وەرزشکارێکی دیار و ناسراوە لەسەر ئاستی کوردستان و سلێمانی و شارەزوور، سەرۆکی  پێشووی یانەی شارەزوورە، ساڵی   1984 لەقەزای سەیدساق دەستی بەیارییکردن کردووە، ماوەیەکی زۆر یاریی بۆ تیپەکانی سنورەکە کردووە.
ساڵی 1990 لەسلیمانی بەسەرپەرشتی خوالێخۆشبوو سەڵاح  محەمەد کەریم، بەشداریی خولی ناوبژیوانی کردووە و بۆتە خاوەنی بڕوانامەی ناوبژیوانی  پلە 3 -ی عێراق.
 سەبارەت بە یارییکردنیشی بۆ یانەکانی کوردستان ووتی: ساڵی 1997 لەخولی پلە یەکی یانەکانی کوردستاندا، بۆیانەی دەربەندیخان یاریم دەکرد، هەر ئەو ساڵە، گەڕامەوە  بۆ یانەی شارەزوور، ساڵی دواتر، چوومە یانەی کەمال سەلیم لە سلێمانی، زۆری نەخایاند لەیانەی دهۆک بانگ کرام، ماوەی دوو مانگ بۆ یانەی دهۆک یاریم کرد کە هادی موتەنەش راهێنەر و  خەلیل محەمەد عەللاوی یاریدەدەری بوو، هەر ئەو ساڵە، دوای دومانگ گەڕامەوە یانەی شارەزوور، چونکە  پێویستییەکی زۆریان بەمن هەبوو ،  ئەو وەرزە،  وەک راهێنەر و یاریزان، یانەی شارەزوورم لە خولی پلە دووەوە سەرخست بۆ خولی پلە یەکی کوردستان.
 ساڵی دواتریش، وەک راهێنەر و یاریزان یانەی شارەزوورم  لە خولی پلە یەکەوە  بۆ خولی نایاب سەرخست، ساڵی 2000  چومە یانە ئەزمڕ لە سلێمانی، چونکە یانەی شارەزوور راهێنەرێکی عەرەبیان هێنا، بۆیە منیش نەمامەوە، بەڵام ساڵی  2001 گەڕامەوە یانەی شارەزوور پاش لابردنی راهێنەرە عەرەبەکە.
سەبارەت بە بڕوانامەکانی را‌هێنەریش پێی راگەیاندین؛ ساڵی 2003 بۆ یەکەم جار، بڕوانامەی  راهینانم  بەدەست هێنا، هەر ئەو ساڵە، بڕوانامەی پله C یەکێتیی تۆپی پێی ئاسیام بەدەستهێنا  بەسەرپەرشتی  راهێنەر(ناجح حمود).
پاش ئەوەی ساڵی  2009  لەکۆلێجی پەروەردەی بنەڕەتی - بەشی وەرزش  لەهەڵبجە  وەرگیرام، کە ئەوکات سەر بە زانکۆی  سلێمانی بوو، ساڵی  2010 لە هەولێر، بەسەر پەرشتی  راهینەر و مامۆستا وانەبێژی ئەڵمانی پیتەر ڤۆڵمان، بڕوانامەی راهێنانی ئاستی  B -ی راهێنانم بەدەستهێنا.
لەبەر ئەوەی ساڵی  2013 لە کۆلێجی پەروەردەی  بنەڕەت - بەشی وەرزش له دە خوێندکارە یەکەمەکان بووم، هەر پاش تەواوکردنی کۆلێج، ساڵی 2013 لەزانکۆی (مەنسورە) لە میسر، لە بەشی وەرزش وەرگیرام، ساڵی 2016 هەر لەو زانکۆیە، لەبواری زانستی راهێناندا، بڕوانامەی ماستەرم بە دەستهێنا.
پاش گەڕانەوەم، ساڵی  2017  لەزانکۆی هەڵەبجە و لە کۆلێجی  پەروەردەی  بنەڕەت - بەشی وەرزش،  وەک  وانەبێژ  پێنج مادەم دەوتەوە،  بەقۆناغەکانی  یەک تا چوار، تائێستاش لەخزمەتکردنی وەرزش بەردەوامم بەشێوەیەکی  پراکتیکی و تیۆری.