هەمووی درۆ دەلەسەن

جۆرجینا و كریستیانۆ هیچ كێشەیەكیان نییە

بەم دواییە دەنگۆی ناكۆكیی نێوان كریستیانۆ رۆناڵدۆ -ی یاریزانی یانەی نەسر -ی سعودی و جۆرجینا رۆدریگێز -ی هاوسەری بڵاو بۆوە و دایكی كریستیانۆ رۆناڵدۆ و جۆرجینا -ش هەواڵەكە بەدرۆ دەخەنەوە.
چەند راپۆرتێكی رۆژنامەوانی كەناڵەكانی راگەیاندنی پورتوگال و ئیسپانیا ئەوەیان بڵاو كردۆتەوە كە كریستیانۆ زۆر لە جۆرجینا نیگەران و توڕەیە و پەیوەندییەكانی نێوانیان زۆر باش نییە و نیگەرانییەكانی كریستیانۆ بەجۆرێكە كە رەنگە بگاتە رادەی لێك جیابوونەوەیان.
لەكاتی بڵاوبوونەوەی ئەم راپۆرتە رۆژنامەوانییانەدا، دایكی كریستیانۆ ئەم مانگە خۆی گەیاندە سعودییە و وەك خۆی دەڵێت؛ بۆ ئەوە نەچووە تا بزانێت پەیوەندیی نێوان كریستیانۆ و جۆرجینا چۆنە، بەڵكو بۆ پیرۆزبایی خانووە نوێیەكەیان چووەتە سعودیە.
هەر لەگەڵ گەیشتنی بەو وڵاتە، دۆلۆریس ئەڤیرۆ -ی دایكی كریستیانۆ كە تەمەنی 68 ساڵە، هەموو ئەو هەواڵانەی بەدرۆخستەوە كە گوایە نێوانی كوڕەكەی و جۆرجینا خراپ بێت، بەپێچەوانەوە لە باشترین بارودۆخی سۆزداریدان و هیچ كێشەیەكی خێزانییان نییە.
جۆرجینا -ی هاوڕێی كریستیانۆ رۆناڵدۆش خۆی پێ رانەگیراوە و ئەمیش لە تۆڕە كۆمەڵایەتییەكان، وەڵامی ئەو هەواڵانەی داوەتەوە و بەناڕاست و هەڵبەستراو وەسفی كردن و بەكورتی نووسیویەتی: ئەوانەی ئیرەیی دەبەن ئەم هەواڵانە دروستدەكەن، ئەوانەشی كە زۆربڵێن، بڵاویان دەكەنەوە و ئەوانەشی بێ عەقڵن باوەڕیان پێدەكەن.