ئیمان هه‌مه‌وه‌ندی
پاش ساڵ و نیوێك یاریكردن، بۆ یانه‌ی هیلالی سعودی، نیمار دا سیلڤا -ی یاریزانی به‌رازیلی، گه‌ڕایه‌وه به‌رازیل. ئه‌ویش پاش ئه‌وه‌ی یانەی هیلال بە ڕەزامەندیی هەردوولا، گرێبەستەکەی لەگەڵ نەیمار هەڵوەشاندەوە، كه شەش مانگ ماوەی گرێبەستەکەی مابوو تەواو ببێت، لە یاریگای یانەی سانتۆسیش، بە ئاهەنگێکی تایبەت هەزاران هاندەری یانه‌کە، پێشوازییان له گه‌ڕانه‌وه‌ی نەیمار كرد.
كاتێك یانه‌ی سانتۆس گرێبه‌ستەکەیان پێشكه‌شكرد، ناوبراو دەستبەجێ گرێبەستەکەی ئیمزا کرد، هەواڵەکان باس لەوە دەکەن، کە گرێبەستەکە، تا کۆتایی مانگی حوزەیرانی داهاتوو ده‌بێت، له یاریگای ڤێللا بێلمیرۆ، نزیکەی 20 هەزار هاندەری سانتۆس ئاماده‌بوون و ئاهەنگیان بۆ گەڕانەوەی یاریكه‌ره تەمەن 32 ساڵانه‌كه گێڕا.
نەیمار لە میانی ئاهەنگی ناساندنیدا وتی: هەندێک بڕیار هەیە کە لەگەڵ تۆپی پێدا ناکۆکە و هەندێکیشیان کاریگەرن، دان بەوەدا دەنێم کە هەرگیز بە خەیاڵمدا نەهاتووە بگەڕێمەوە بۆ سانتۆس، سه‌ره‌تا له یانه‌ی هیلال زۆر ئاسودە بووم و زۆر خۆم گونجاند، پڕ بووم لە ئارەزوی یاریکردن، كه‌چی هەندێک شت ڕوویاندا و ناچار بووم ئەم بڕیارە بدەم، چونكه له‌كاتی ڕاهێنان و ژیانی ڕۆژانەمدا هەستم بە دڵتەنگی ده‌كرد، ئەوەش بۆ من باش نەبوو.
نیمار لە درێژەی قسەکانیدا وتی: کاتێک دەرفەتی گەڕانەوە بۆ وڵات هاتە پێش، زۆر بیرم نەکردەوە، هەر لە یەکەم ڕۆژەوە بڕیارمدا بگەڕێمەوە و بە باوکمم وت شتەکان خراپ نین و ده‌گه‌ڕێمه‌وه به‌رازیل، هه‌روه‌ها لەوەتەی پێم ناوه‌ته‌وه بەرازیل، هەست دەکەم جارێکی تر تەمەنم 17 ساڵە، زۆر دڵخۆشم، بەڕاستی چاوەڕێی یاریکردنم.
له پێشوودا دەستکەوتی زۆرم بەدەستهێناوه، لە منداڵیه‌وه ئێره‌م جێهێشتووه، دواتر بە شێوەیەکی کردەیی وەک پاڵەوانێک گەڕاومه‌ته‌وه، بۆیه زۆر دڵخۆشم، کە بەم شێوەیە پێشوازیم لێکراوه، ڕۆژێکی تایبەتە لە ژیانمدا.
دوا وته‌كانی نیمار بۆ ئاماده‌بووان ئه‌وه‌بوو وتی: ئێستا بە خۆشییەوە دەگریم، پیشتر لە ژیانمدا ناخۆشی زۆرم بەسەردا هاتووه، به‌ڵام ئه‌مڕۆ لێره‌م، بۆ ئەوەی هەمووان من به درێسی ژمارە 10 - وه ببیننه‌وه، بۆیه سوپاسی هەمووان ده‌كه‌م و چێژ لەم ساتە وه‌رده‌گرم.
