تیپی تۆپی پێی یانەی سەیدسادق، ماوەی چەند ساڵێك وەك یەكێك لە تیپە باش و ئاست بەرزەكانی بەشدار لە خولی نایابی تۆپی پێی یانەكانی كوردستاندا، بینرا و ئاستێكی باش و نایابی پێشكشە دەكرد.
تیپەكە لە سنورەكەی خۆی، هەر لە خولی پلە یەكی كوردستانەوە تا گەیشتنی بە خولی نایاب، هاندەرانێكی دڵسۆز و سەرسەختی هەبوو، هەمیشە بە دوای تیپەكەوە بوون، تیپەکە بۆ یاریی روویان لە هەر شارێكی كوردستان بكردایە، ئەو هاندەرانە بە دوایانەوەبوون و هانیان دەدان و تیپەكەش لە ئاستی ئەو دڵسۆزییەی خەڵكی شارەكە و هاندەرانیدا بوو، بەجۆرێك لە كۆتایی وەرزی 2021-2022 دا سێیەمی خولی نایابی كوردستان بوو.
بەڵام ئەمساڵ زۆر بەداخەوە، ئەم تیپە بێناز كەوت، كەس نەهات بە دەنگ داواكارییەكانیانەوە، كەس نەبوو بە خەمخۆریان، بۆیە تەنیا توانیان بە قەرز و قۆڵە و بە هەناسەبڕكێ و بەبێ پارەیی، تەنیا یەك قۆناغی یارییەكانی خولی نایاب تەواو بكەن، دواجار بە نووسراوی رەسمی، داوایان لە یەكێتیی تۆپی پێی كوردستان كرد كە رەزامەند بن بەوەی تیپەكە لەو خولە بكشێتەوە و یارییەكانی قۆناغی دووەم نەكات، یەكێتیی تۆپی پێی كوردستانیش داواكەیانی پەسەند كردووە.
ئەم تیپە پاش تەواو بوونی یارییەكانی قۆناغی یەكەمی خولی ئەمساڵ و پاش ئەوەی 14 یاریی لە قۆناغی یەكەمدا كرد، بەهۆی ئەو بارودۆخە خراپەوە كەبەسەریهات، هیچ یارییەكی نەبردەوە، پێنج یاریی یەكسان بوو، 9 یارییشی دۆڕاند و دوا تیپی ریزبەندیی بوو، ئێستا تیپەكە بەتەواوی لەبەر یەك هەڵوەشاوەتەوە، یاریزانەكانی لە وادەی زستانەی هاتن و چوونی یاریزاناندا، دابەشبوون بەسەر یانەكانی تری خولەكانی كوردستاندا، بەپێی بڕیاری یەكێتیی تۆپی پێی كوردستان، ئەنجامی یارییەكانیشیان لە خولەكەدا وەك خۆی دەمێنێتەوە، بۆ قۆناغی دووەمی خولەكەش، هەر تیپێكی یاریی بەرامبەر سەید سادق هەبێت، 3 - 0 بەبراوە دادەنرێت، جگەلەوەش بەپێی رێنماییەكانی سەرەتای خولەكەش، تیپەكە وەرزی داهاتوو لەبەر ئەوەی دواتیپی ریزبەندیی دەبێت، بۆ خولی پلەیەكی كوردستان دادەبەزێت.
بەو هیوایەی وەرزی ئایندە لە خولی پلە یەكی كوردستاندا، تیپی یانەی سەیدسادق بەئاست و توانا و لێهاتووییەكی باشەوە ببینینەوە، وەك چۆن سەرەتا لە خولی پلە یەكەوە بۆ نایاب سەركەوت، وەرزی ئایندەش ئەم دەستكەوتە دووبارە بكاتەوە و دەستی یارمەتی هەموو لایەكی پێبگات، تا ئەو هاندەر و خەڵكە دڵسۆزەی دەوری یانەكە و ورزشی سەیدسادق، بەتیپێكی باشتر شاد ببنەوە تا یاریی تۆپی پێی سەیدسادق شانازییان پێوەبكەن.
