شەوی شەممەی رابردوو، لە یەكێك لە یارییەكانی هەفتەی 22 –ی لالیگادا، ریاڵ مەدرید بووبە میوانی یانەی ئۆساسۆنا و یارییەكەش 1-1 كۆتاییهات.
لە یارییەكەدا و لە دەقیقەی 39 دا، ناوبژیوانی یارییەكە، لەسەر قسەی نەشیاو كە بیلینگهام ئاڕاستەی ناوبژیوانی كردبوو، بەكارتی سوور كردیە دەرەوە، ئەم كردنە دەرەوەیەش یاریزانانی یانەی ریاڵ مەدرید و تەنانەت راهێنەر و ئیدارەی یانەكەشی توڕەكرد، ئەوان هەموویان پێیان وایە ئەو كارتە سوورە ناهەقی بووە و نەدەبوو بەڕوی بیلینگهام -دا بەرزبكرێتوە. بۆیە هەر لە یارییەكەدا مۆدریچ -ی یاریزانی یانەی ریاڵ مەدرید، دەچێتە لای ناوبژیوان و پێی دەڵێت؛ بۆچی كارتی سوورت دایە، ناوبژیوانیش دەڵێت؛ قسەی نەشیاو و بەدڕەوشتی ئاراستە كردووم، بێ ئەوەی ووشەكە بڵێت.
دوای تەواو بوونی یارییەكەش، لە بیلینهام دەپرسن؛ چیت بە ناوبژیوان ووتووە، ئەو دەڵێت؛ راستە قسەی نەشیاوم كردووە، بەڵام ئاراستەی ناوبژیوانم نەكردووە، خۆم لەگەڵ خۆم قسەكەم كردووە و كاتێكیش قسەكەم كردووە، پشتم لە ناوبژیوان بووە و ئەو تەنیا گوێی لێبووە و خۆی دەزانێت كە مەبەستم ئەو نەبووە.
ئەنچیلۆتی راهێنەریش نایشارێتەوە كە بیلینگهام قسەی نەشیاوی کردووە، ئەم قسەیەش بە ئینگلیزی مانای ناشیرینی نییە و لە خولی ئینگلیزیدا لەكاتی تووڕە بوونی یاریزاندا بەكاردێ و كارتی سووری لەسەر نادرێت.
ئەم كارتە سوورە و پاشان ئەو پەناڵتییەش كە لەسەر ریاڵ حساب دەكرێت، كێشە و ناكۆكییەكی توندی لە نێوان ئیدارە و راگەیاندن و تیمی ریاڵ مەدرید لەلایەك و یەكێتیی تۆپی پێی ئیسپانیا لە لایەكی ترەوە درووستكردووە، ئێستا ئەم ناكۆكییە گەیشتۆتە لووتكە، بەجۆرێك یەكێك لە
رۆژنامەنووسەكانی ماركا دەڵێت؛ با ریاڵ مەدرید لالیگای پیس جێبهێڵێت و بەشداریی خولی یانەكانی ئینگلتەرا بكات، ئەمەش وەك لووتكەی تووڕەبوونی رۆژنامە نووسانی نزیك لە یانەی ریاڵ مەدرید.
