ئارۆ سامان
راهێنەری تیپی تۆپی پێی یانەی رزگاری لە گەرمیان، دەڵێت: دەتوانین درێژە بە ئەنجامە باشەكانمان پێبدەن و بە باشیش خۆمان ئامادە کردووە.
ئەنوەر رەشید راهێنەری یانەی رزگاری بۆ ستادیۆم ووتی: لە قۆناغی یەكەمی خولی نایابی كوردستاندا، توانیمان ئەنجامێكی باش بەدەست بهێنین، بەتایبەت بۆ یانەیەك كە میوانی نوێی خولەكە بوو، بەپێچەوانەی تیپەكانی ترەوە كە هەموویان ئەزمونیان هەیە و پێشتر لەم خولەدا بەشداربوون.
وتیشی: لە تەواوی یارییەكانی نێو یاریگای خۆمان، هیچ یارییەكمان نەدۆڕاند، زۆربەی یارییەكانمان بردۆتەوە، ئەمە بۆ ئێمە زۆر گرنگ بوو، لەدەرەوەی یاریگای خۆشمان، تەنها یەك یاری دۆڕاین، ئەویش پەیوەندی بەهەڵەیەكی تەكنیكییەوە هەبوو، كە زۆر كاریگەری خراپی لەسەر بەجێهێشتین، بەڵام دەست بەجێ خۆمان گرتەوە و توانیمان چەند یارییەكی یەك لە سەر یەك ببەینەوە.
بۆ هۆكاری ئەنجامە باشەكانیشیان، راهێنەرەكەی یانەی رزگاری دەڵێت: یەك دەستی و كاری بەكۆمەڵی دەستەی كارگێڕی و هونەریی و یاریزانان و دواتر هاندەران، كە بەباشترین شێوە جیاواز لەهاندەری هەموو یانەكانی تر بە جوانی دەركەوتن، لەهەموو یاریەكدا لەگەڵمان بوون، ئەمانەپاڵپشتی باشمان بوون.
سەبارەت بە ئامادەكاریەكانیشیان بۆ قۆناغی دووەم، وتی: ئامادە كارییەكانمان بەردەوامە، هەوڵ دەدەین ئاستمان باشتر بكەین، چونكە قۆناغی دووەم سەختە، یانەكان هەوڵی بەدەستهێنانی ئەنجامی باش دەدەن، شایانی باسە ئەنوەر رەشید بە باشترین راهێنەری مانگی جەنیوەری رابردووی خولی نایابی تۆپی پێی یانەکانی کوردستان دیارییکرا.
