پاش بردنەوەی دێربی كوردستان لە هەولێر، نەورۆز لەگەڵ زەوراش یەكسان بوو

رۆژی پێنجشەممەی رابردوو 13/2، كاروانی یارییەكانی هەفتەی 20 لە خولی تۆپی پێی ئەستێرەكانی یانەكانی عیراق كەوتەڕێ و لە ماوەی سێ رۆژدا سەرجەم یارییەكانی كران كە 10 یاریی بوون.
تیپی یانەی نەورۆز، پاش ئەوەی هەفتەی پێشوو دێربی كوردستانی 2-0 لە هەولێر بردەوە، رۆژی شەممەی رابردوو 15/2، لە نێو یاریگا و هاندەرانیدا میوانداریی لە زەورای بەناوبانگ و دووەمی ریزبەندیی خولەكە كرد، لە یارییەكەدا، یاریگای نەورۆز لێوان لێو بوو لە هاندەران، لەنێویشیاندا ژمارەیەك لە هاندەرانی زەورا -ش لە بەغداوە هاتبوون، یارییەكە پڕ ململانێ و بەهێز بوو، لەئەنجامیشدا هەردوولا 1-1 یەكسان بوون.
تایمی یەكەمی یارییەكە هەردوولا 0-0 یەكسان بوون، توندوتیژی زیاتر لەیاریی باڵی بەسەر یارییەكەدا كێشابوو، ئەمەش بووە هۆی ئەوەی یاریزانێكی نەورۆز بە كارتی سوور بكرێتە دەرەوە، ئاسۆ رۆستەم -یش زۆر نزیك بوو لەوەی ئەمیش كارتی سوور وەربگرێت.
تایمی دووەم یارییەكە زۆر گەرمتر و بەهێزتر بوو، سەرەڕای ئەوەی نەورۆز یاریزانێكیشی كرابووە دەرەوە و بە 10 یاریزانەوە یاریی دەكرد، بەڵام پاش ئەوەی زەورا 1-0 پێشكەوت، بەو نوقسانییەوە، ئاسۆ رۆستەم گۆڵی یەكسانبوونی نەورۆزی کردەوە و هەربەم ئەنجامەش1 - 1 یارییەكە كۆتاییهات.
ئێستا نەورۆز لە ناوەڕاستی لیستی ریزبەندیی یانەبەشدارەكاندایە و پلەی 11 -ی گرتووە و 27 خاڵی هەیە.
هەر سەبارەت بە یانە بەشدارەكانی كوردستان لەم خولەدا، دهۆكی پێنجەمی ریزبەندیی، بوو میوانی ئەلقاسمی حەوتەمی ریزبەندیی، بەڵام یارییەكەی 1-2 بە ئەلقاسم دۆڕاند، لە دێربییەكی تری كوردستانیشدا، هەولێر و زاخۆش 0-0 لە یاریگای هەولێر یەكسانبوون، ئێستا یانەی زاخۆ هەرلە لووتكەی ریزبەندیدا ماوەتەوە و شورتە دووەم و زەورا سێیەمە و یەكەم تا شەشەمی ریزبەندییش بەمشێوەیەیە:
-1 زاخۆ         (20 یاری) (39 خاڵ).
-2شورتە         (19یاری) (38 خاڵ).
-3 زەورا         (20 یاری) (37 خاڵ).
-4 دهۆك       (19 یاری) (34 خاڵ).
-5 تەڵەبە       (19 یاری) (34 خاڵ).
-6 قووە جەوی(20 یاری) (34 خاڵ).

یارییەكان
*كەرخ 1 × 0 نەوتی بەسرە.
*شورتە 2 × 0 كارەبا.
*نەوت 0× 0 نەجەف.
*ئەلقاسم 2 × 1 دهۆك.
*هەولێر 0 × 0 زاخۆ.
*تەڵەبە 0×  0 دیالا.
*نەورۆز 1 × 1 زەورا.
*حدود 3 × 2 مینا.
*كەرمە 2 × 1 قووە جەوی.
*كەربەلا 1 ×  3 نەوتی مەیسان.
شایانی باسە، ئەمڕۆ سێشەممە 18/2، یارییەكانی هەفتەی 21 دەستپێدەكەن و سێ یاریی دەكرێن، سبەی چوار شەممەش سێ یاریی تر و رۆژی پێنجشەممەش چوار یارییەكەی تر دەكرێن، یاریی تیپەكانی كوردستان بەمشێوەیە دەكرێن:
*دهۆك   ×  شورتە  - سێشەممە     18/2.
*نەجەف ×  هەولێر - چوار شەممە 19/2.
*زاخۆ    ×  تەڵەبە  - چوار شەممە  19/2.
*دیالا    ×  نەورۆز  –پێنجشەممە    20/2.